Pashiholelwa, Sally, * ngoka ha kala moAmerika, okwa li a kanithile iiniwe ye moshikungulu shombepo noshomvula. Okwa ti: “Olundji onda li handi kala ndi uvite kutya itandi vulu we okwiidhidhimikila onkalo ndjika.”

Uudhigu wumwe mboka hawu vulu okuholoka po owo uuna wa silwa. Janice gwokuAustralia okwa ti: “Sho aamwandjemati yaali ya si, omwenyo gwandje ogwa li gwa tekauka nonda li nda gwililwa po noonkondo. Ihe onda li nda kambadhala okwiidhidhimika. Onda li nda lombwele Kalunga nda ti: ‘Oshili, itandi vulu we okwiidhidhimikila oluhodhi nduka. Hwepo owala ndi se.’”

Daniel okwa li u uva nayi noonkondo sho omukadhi a yi pondje yondjokana. Okwa ti: “Sho omukulukadhi gwandje e shi lombwele ndje osha li she ehameka ndje noonkondo nda fa owala nda tsuwa nomwele pomutima. Osha li shu uvitha ndje nayi lela, nuuwehame mboka onda kala nawo uule wethimbo.”

MOshungolangelo ndjika otamu ka kundathanwa nkene tatu vulu okukala tu na onkalamwenyo tayi ti sha nokuli nuuna

• pwa holoka iiponga yopaunshitwe

• twa silwa

• kuume ketu kopandjokana a ya pondje

• tu na uvu wa kwata miiti

• twa dhigupalelwa komaupyakadhi monkalamwenyo

Ngashingeyi natu ka taleni kunkene tatu vulu okwiidhidhimika uuna pwa holoka iiponga yopaunshitwe.