Momumvo 1949, tate okwa tembukile koAustralia okuza kOndowishi. Okwe ya okukonga iilonga koomina nokoofabilika dhomalusheno, nokwa kala kuushayi waVictoria. Hoka oko a monene meme e taya hokana, nonda valwa mo 1953.

Konima yomimvo omishona, meme okwa tameke okukonakona Ombiimbeli nOonzapo dhaJehova. Onkee ano, omalongo gOmbiimbeli onde gu uva okuza kuunona wandje. Nonando ongawo, tate ka li ha tsu kumwe nomalongelokalunga nando. Okwa ningi omukolokoshi nomukwanyanya, nameme okwa kala he mu tila nokuli. Meme okwa tsikile nokukonakona Ombiimbeli meholamo nokwa tameke okukala ehole omalongo gayo. Uuna tate a za mo megumbo, meme okwa li he tu lombwele tse nomumwamemekadhona kombinga yaashono i ilonga mo. Okwa li e tu lombwele kombinga yoparadisa ndjoka tayi ka kala kombanda yevi monakuyiwa nankene tatu vulu okukala twa nyanyukwa, ngele otwa landula omithikampango dhOmbiimbeli. — Episalomi 37:10, 29; Jesaja 48:17.

Sho ndi na omimvo 18, uukolokoshi watate owa ningitha ndje ndi kale nda hala okutembuka mo megumbo. Nonando okwa li ndi itaala shoka meme a longa ndje okuza mOmbiimbeli, kanda li ndu ulika olupandu. Onkee ano, onda ndopa okukala metsokumwe naashoka nda longwa kumeme. Onda tameke okulonga momina yomakalamanya, handi longo nomalusheno. Onda hokana sho ndi na omimvo 20. Okamwanakadhona ketu kosheeli oka ka valwa konima yomimvo ndatu nonda li te dhiladhila natango kwaashoka sha simana monkalamwenyo yandje. Onda li nda tseya kutya Ombiimbeli otayi vulu oku tu kwathela naanegumbo lyandje, nomolwaashono nda tameke okukonakona Ombiimbeli nagumwe gwomOonzapo dhaJehova. Mupyamunene, omukulukadhi gwandje ka li e hole Oonzapo. Oshikando shimwe sho nda yi kokugongala, omukulukadhi gwandje okwa pendje ehogololo kutya otandi etha po okukonakona Ombiimbeli nenge otandi tembuka mo megumbo? Onda shuna omutse miipeta, e tandi ningi shoka a hala, kokutya onde etha po okukonakona nOonzapo. Konima onde ki ipa uusama sho inaandi landula shoka shi li mondjila.

Esiku limwe, aaniilonga pamwe nangame oya li ya talitha ndje omathano giipala. Onda li nda tyapula oku ga tala niishewe oga li taga ningile ndje nayi, noga thiga ndje nda gwililwa po keyeme. Sho nda dhiladhila kwaashoka ndi ilonga mOmbiimbeli, ondi itaale lela kutya Kalunga ota geele ndje. Ashike sho nda tsikile nokutala omathano giipala, eihumbato lyandje li na ko nasha nago olya lunduluka. Mokweendela ko kwethimbo, oga piki ndje.

 Konima yomimvo 20 dha ka landula ko, onda hedha kokule lela naashoka meme a li a kambadhala okulonga ndje. Eihumbato lyandje olya holola shoka sha li momadhiladhilo gandje. Onda li handi popi iinima tayi sitha ohoni nonda li he ningi omashendjo omawinayi. Onda kala ndi na etaloko lya puka li na ko nasha niipala. Nonando onda li nomukulukadhi gwandje, onda kala wo ndi na po yalwe. Esiku limwe ondi italele mesipili nondi ipopile nda ti ‘kandi ku hole.’ Pehala lyokukala ndi isimaneka, onda kala ndi itonde.

Ondjokana yetu oya teka nonkalamwenyo yandje oya kala mehalakano. Onkee onda galikana Jehova nomutima gwandje aguhe. Onda tameke ishewe okukonakona Ombiimbeli, nonando opwa li pwa piti omimvo omilongo mbali. Pethimbo mpoka tate okwa adhika a sa, nameme okwa ninga Onzapo yaJehova ya niginithwa.

Opu na eyooloko enene pokati konkalamweyo yandje yomonakuziwa naandjika yi li metsokumwe nomithikampango dhOmbiimbeli. Onda li nda tokola toko ndi lalakanene ombili yopamadhiladhilo, ndjoka yu uvanekwa kOmbiimbeli. Onda kambadhala okukala handi popi oohapu oombwanawa, nonda lundulula omikalo dhandje omiwinayi. Onda tokola wo okweetha po onkalamwenyo yandje ombwinayi, okundombola, okunwa sha pitilila nokuyaka iinima yomuhona gwandje.

Aaniilonga pamwe nangame kaya li ye shi uvite ko kutya omolwashike nda hala okuninga omalunduluko omanene ge thike mpono. Uule womimvo ndatu, oya kala taya kondjitha ndje ndi shune konkalo yandje yonale. Uuna nda ningi okapuko okashona ngaashi okugeya nenge okupopya okatya okawinayi, oya li haya igidha ya nyanyukwa taya ti: “Iyaloo! oye nee Joe twa kala tu shi ngo.” Shoka okwa li hashi uvitha ndje nayi. Olundji onda li handi kala ndu uvite kutya itandi pondola.

Kiilonga yetu kehe pamwe to tala omathano giipala owala kwa li, kutya nduno omiikwaelektronika nenge oongoka ga pilindwa. Aaniilonga ooyakwetu oya li haya tuminathana aluhe omathano giipala kookompiuta dhawo nangame ya kwatela ndje mo. Onda kambadhala okuyanda okukala omupika gwiinima mbyoka, ihe oya li ya tokola okulongitha ompito kehe, opo ya nwethe ndje mo. Onda li nda kongo ekwatho komulongi gwandje gwOmbiimbeli. Okwa li a pulakena nawa sho tandi mu mbumbulile omutima gwandje. Okwa li a longitha omanyolo gontumba, opo a kwathele ndje ndi vule okukondjitha uupyakadhi wandje. Okwa li wo a kumagitha ndje ndi konge ekwatho kuJehova, mokukala handi galikana nda mana mo. — Episalomi 119:37.

Esiku limwe onda tokola okuninga oshigongi pamwe naaniilonga ooyakwetu. Sho twa gongala, onde ya lombwele ya pe aalumentu yaali ombiila, mboka ya li ya pikwa kiikolitha. Aaniilonga pamwe nangame oyi igidha ya ti: “Ito vulu okuninga ngaaka! Aalumentu mbaka otaya kambadhala okweetha po iikolitha!” Onde ya yamukula nda ti: “Eeno, nangame osho naanaa te kambadhala okuninga ngaaka.” Okuza ngaa kesiku ndyoka, aaniilonga mboka oya li ye shi ndhindhilike kutya otandi kambadhala shili okweetha po okutala omathano giipala. Kaya li we ya thiminike ndje ndi shune konkalamwenyo yandje onkulu.

Mokweendela ko kwethimbo, kekwatho lyaJehova onda pondola mokukala ihaandi tala we omathano giipala. Momumvo 1999, onda ningi Onzapo yaJehova ya ninginithwa, nonda li nda nyanyukwa sho ndi na ompito yokukala nonkalamwenyo ombwanawa.

Ngashingeyi ondu uvite ko kutya omolwashike Jehova e tonde iinima mbyoka nda kala ndi hole ethimbo nuule. Jehova ngoka e li Tate omunahole, okwa li a hala okugamena ndje koshiponga shoka hashi etwa kokutala omathano giipala. Oohapu dhOmayeletumbulo 3:5, 6 kadhi shi tuu dhoshili! Ndhoka tadhi ti: “Inekela Omuwa nomutima gwoye aguhe noino igameka koondunge dhoye mwene. Mu tseya moondjila dhoye adhihe, nena oondjila dhoye ote dhi yelekanitha.” Omithikampango dhOmbiimbeli inadhi gamena ndje owala, ihe odha kwathela ndje wo ndi pondole monkalamwenyo. — Episalomi 1:1-3.

Monakuziwa, onda kala ndi tonde onkalamwenyo yandje, ihe ngashingeyi ondi isimaneka nondi na ombili yokomwenyo. Ngashingeyi onkalamwenyo yandje oya yogoka nondi uvite kutya Jehova okwa dhimina ndje po noha ambidhidha ndje. Mo 2000, onda hokana Karolin, ngoka tu li naye meitaalo limwe nokuhole lela Jehova a fa ndje. Egumbo lyetu ngashingeyi ehala lyombili. Otu uvite etumba okukala twa yogoka notu li uumwayinathana wopaKriste muuyuni awuhe mboka wu holathane.