Ik bün in República Dominicana geboore, in São Domingos stad, un bün dai jüngst fon fair kiner. Mijn papa un mama wäire uutgelërte lüür un wule dat wij gaud uptrekt wäire. Fair jåre airer as ik geboore bün, häwe sai wek mórmons kent wat nå andrer stele rëse däire taum preegen. Mijn papa un mama häwe sich wunert soo as dai mórmons wäire, dat sai wäire gaud angetrekt un wäire forständig. Soo, häwe sai glijk uutsöcht dat oos familg wäir ain fon dai airste fon dës gëgend wat rinergüng in dai Igreja de Jesus Cristo dos Santos dos Últimos Dias, urer Mórmons kirch.

Solang as ik groot ware däir, ik häw anfånge sër gërn mage dai daile wat dai kirch måke däir, woo sai respektijre däire dat leewend ine familg un däire oos lëre taum fornünftig sin. Mij däir gefale mórmon sin un ik wul uk rëse taum preegen.

As ik 18 jår har, mijn familg is hentrekt nam Estados Unidos, woo ik wijrer lëre küün ine faculdade. Bijnå air jår nåheer mijn unkel un tante, wat Jehovaas Tüügen sin, häwe oos besöcht un häwe oos innöögt taum ain bijblisch kongress mit eer mitmåke. Ik häw mij sër wunert dat ale saie däire ine Bijbel dai sprüüch un däire daile ansrijwe. Soo, häw ik uk kreege ain papijr un ain caneta taum upsrijwe.

Nå dem kongress, mijn unkel un tante häwe sägt soo’s ik rëse wul taum preege, sai küüne mij helpe mër lëre oiwer dai Bijbel. Mij hät dat sër gefale weegen in dere tijd ik däir mër lëre oiwer dai bauk fon Mórmon as wirklig oiwer dai Bijbel.

Wen wij fortele däire doir dai telefon, mijn unkel un tante, sai däire ümer mij säge dat ik schul t’hoopmaine wat dai Bijbel sägt mit wat dai Mórmon kirch inlërt. Sai häwe mij lust geewt taum mër lëre.

Ik har annåme feel daile wat dai mórmons inlëre däire, åwer ik däir ni waite of dat wirklig stime däir mit wat dai Bijbel sägt. Mijn tante hät mij schikt dai revista Wåkt Up!, 8 november 1995, wat updrükt is fon dai Jehovaas Tüügen, un wat wijse däir daile oiwer dai Mórmon religion. Ik häw mij wunert as ik saie häw dat ni kene däir feel fon eer inlëren. Dårweegen häw ik söcht in dem site fon der Mórmon of dat wirklig soo wäir as stüün in der revista Wåkt Up!. Un häw dat saie ni bloos in der site, åwer uk as ik besöcht häw der museus mórmons in Utah, Estados Unidos.

Ik häw ümer lërt dat dai Mórmon Bauk un dai Bijbel t’hoopstime däire. Åwer as ik anfånge häw mër dai Bijbel leese, häw ik saie dat wek daile wat dai mórmons inlëre däire ni t’hooppasse däire mit dat wat dai Bijbel inlëre däit. Soo as, in Ezequiel 18:4, dai Bijbel sägt dat dai sël doodblijwt. Åwer in dai Mórmon Bauk, in dai stük Alma 42:9, sägt: “Dai sël küün nij ais doodblijwe.”

Hät mij ni gefale dat wat dai mórmons inlëre däire ni t’hooppasse däir mit dai Bijbel un uk dat sai inlëre däire dat dai Estados Unidos dai best land fon ale wäir. Soo as, dai mórmons daue inlëre dat dai Éden gåre in Jackson gëgend blijwt, Missouri, Estados Unidos. Un dai schefs fon dai kirch säge dat “dat God sij Regirung anfänge däit dai gans Ër regijre doir Estados Unidos sij regirung, un dat dës regirung fraihët un recht taum ale oiwerain geewe däit”.

Ik däir mij fråge wat däir den passijre mit mijn land un dai andrer. Air nacht, air jong mórmon wat studijre däir taum rëse un preegen in andrer land, hät mij telefonijrt, un wij häwe dåroiwer fortelt. Ik häw em gans klår frågt wen hai strijre däir gëgen andrer mórmons fon andrer land in ain krijg. Ik häw mij wunert as hai sägt hät dat jå! Dun häw ik beeter upsuikt oiwer dat wat dai mórmons inlëre däire. Häw uk dai schefs fon dai Mórmon kirch frågt dåroiwer, un sai häwe sägt dat dat wat ik waite wul wäir ain haimligkët wat kair waite däir.

Dat wat sai uutdüürt häwe, hät mij ni gefale, dårweegen häw ik nådacht woweegen ik nam anerd land rëse wul taum preege. Ik häw saie dat ik dat måke wul taum dai lüür helpe, un ik küün dat måke un wäir ni nöörg mórmon dårtau sin. Ik wul uk häwe dat ik ërt ware schul soo as dai mórmons wat nam anerd land rëse taum preege häwe daue. Åwer, oiwer God, wüst ik bijnå går nischt. Ik har dai Bijbel al feelmåls leest, åwer ik däir eer ni wirklig wërd geewe. Ik däir går nischt waite oiwer wat God häwe wil tau dai lüür un tau dai Ër.

Dat ik anfånge häw dai Bijbel lëre mit Jehovaas Tüügen, häw ik lërt God sijne nåme, wat passijre däit nå dem dood, wosoo God, doir sij Kind Jësus, sijne wile måke däit un feel andrer daile. Dun däir ik mër lëre oiwer dës fain bauk, dai Bijbel, un däir mij sër gefale dai wårhët wat ik lëre däir mit dai andrer fortele. Ik däir ümer waite dat dat aine God geewe däir, åwer nuu wäir hai mij best amigo un nuu küün ik mit em fortele doir dat beeren. Ik häw mij tauwe låte as Tüügen fon Jehovaa in 12 juli 2004, un söss månate nåheer ik häw anfånge mijn mëst tijd benutse taum dai wårhët fone Bijbel preege.

Doir fijw jåre lang ik häw in Brooklyn, Nova York, Estados Unidos mit fraiwile dijnt. Dår häw ik hulpe dai Bijbels, buiker un andrer daile måke wat Jehovaas Tüügen måke daue taum dai lüür ine ganse wild dai wårhët inlëre un ik blijw sër fröölig dat ik nog dai lüür helpe dau oiwer God lëre.