Bhaibheri rinonanga kuti zvaushoni, atee zvinodikana kuva no manera akaezanana ngo pamusoro po kuzvida wega. Mushovo uu wo rudo unobatanija kuzvitaja, kuzvireremeja no kuziva zvauri. (Mateu 10:31) Asi Bhaibheri rinonanga kuti tinodikana kudira rudo uwo pa ndau pawo kamare zve totama kujirangarira maningi pacedu.

Tinodikana kuda ani pakutanga?

1. Rudo na Mwari unodikana kuva wokutanga mu mwoyo mwedu. Bhaibheri rinojijisa kuti mupango mukuru ngo wokuti: “Disai Tenji Mwari wako ngo mwoyo wako wese” —Marko 12:28-30; Deuteronòmio 6:5.

2.   Mupango wo cipiri unoti: “Disai mudoni wako, inga madire wounojiita iwewe” —Marko 12:31; VaLevi 19:18.

3.   Pikija Bhaibheri arinangi mutemo wakajeka ngo pamusoro po kuzvida wega, asi mupango “idai mudoni wako inga madire awunoujita wega”izvi zvinotatija kuti atee pa kuti-kuti kuva no rudo wo kuzvida wega zve no kuzvireremeja zvaushoni zve zvinobesera.

Jesu wakada ani pakutanga?

 Jesu wakava no manera akaezanana ngo pamusoro po kuda Mwari, kuda mudoni no kuzvida ega zve iyena wakajijisa vajiji vake kuti vatevejere muezaniso wake —Johani 13:34, 35.

1.   Jesu waida Jehovha Mwari pakutanga zve waivangisira kuti aite basa Rake. “Kaveta nyika yo pasi inodikanavo kuziva kuti inini ndinodisa Baba no kuita bzo ndakatumwa ndi Baba”—Johani 14:31.

2.   Jesu waida mudoni, iyena wakatatija izvo ngo kusapota vamweni zve no kupira upenyu wake kovari —Mateu 20:28.

3.   Iyena waijida ngo manera akaezanana zve waijipsakira nguva yo kuzorora, yo kuha yo kubungaija no vateveri vake zve no vajiji vake —Marko 6:31, 32; Ruka 5:29; Johani 2:1, 2; 12:2.

Kunanga kuti kuda vamweni pakutanga zvinoreva kuti munoruza nderemejo no mudakaro wenyu here?

 Haiwa, ngokuti takasikwa ngo muezaniso wa Mwari, uwo ano mugariro mukuru wo rudo. (Genesi 1:27; 1 Johani 4:8) Izvi zvinotatija kuti takasikwa kuti titatije rudo vamweni. Kuzvida tega zvinosisira asi tinodakara maningi patinoda Mwari pakutanga zve no kubatikana kuita zvaushoni kuno vamweni. Ndizvona zvinoitisa kuti Bhaibheri rinange kuti: “Anodakara anopa, kupinda wiya anopuwa”—Mabasa o Vapostori 20:35

 Nyamasi vazinji vanotenda kuti vanowana mudakaro ngo kudira zviro zvavo pakutanga. Kuno vandhu ava “kuda mudoni” kwakafakeiwa ngo “kujida pacavo”. Nyamasi zvinozivika kuti vano utano no mudakaro waushoni ngo vaya vanoshandisa ngwajo yo Bhaibheri yo kuti: “Mucadopsanga bzenyu basi rangariranyi bzo vamwenivo” —1 VaKorinte 10:24.