Gama rokuti “karu” rikashandiswa pa Sandujo yo Nyika Imbza no ndumiyo kamare ringanangira mukhaindi wo zvifambiso zvakasiyana-siyana. (Mabasa o Vapostori 8:28, 29, 38) Zvingaita kuti karu yakashandiswa ngo mwanarume uwu wo Etiyopia yainga yakakura kupinda karu jinoshandiswa ku hondo no kumuphikizano. Vonanyi mathangwe amweni anotiitisa kuti tigume pa mbhejiso iyi.

Muetiyopiya wainga mwanarume wainga no basa rinosisira maningi mu utongi, cimwenizve waaita hwendo hwakareba kamare. Wainga “mushandiri wa Kandasi, hosi wo Etiyopiya, waingwarira upfumi hwa Kandasi.” (Mabasa o Vapostori 8:27) Ndau yo ku Etiyopiya kareko yaibatanija nyika yo Sudhau nyamasi uno kunozivika inga Ejipita. Kangaije iyena wakashandisa karu jakasiyana-siyana mukati mo hwendo uhwu, asi iyena waida karu huru yaizokwana kangaije zvese zvaaithwara mu hwendo uhwu wakareba. Mu nguva yo vapostori, kazinji ajicaiwanikepi karu jainga no marodha marongomuna no jainga jakashama kuitira kuthwara vandhu. Bhuku rimweni rakananga kuti: “Karu imwe yainga no ndau kuitira kudira zviro zvamunazvo, kuitira hwendo nokutizve zvondhozvo zvaaita kuti ave akajiviririka mu hwendohwo kangaije kuitira hwendo hwakareba.”

Mu Etiyopiya wainga eciverenga Firipi paakamukhwederera. Bhuku ra mabasa rinoti: “Firipi wakagogoma ngo mumbhiripiri mo ngoro, wozwa mwanarume wiya eciverenga zvakatahwa ngo muporofeti Isaya.” (Mabasa o Vapostori 8:30) Karu jaishandiswa kuita hwendo hwakakura ajicaiithwepi kuitira kufamba ngokukasika. Kufamba padoko-padoko uku kwakabesera muetiyopiya wiya kuti averenge matahwa, cimwenizve zvakabesera Firipi kuti akwanise kukhwedera phedo no karu pikija waifamba ngo soka.

Muetiyopiya “wokumbira Firipi kuti akhwire mungoromo agare naye.” (Mabasa o Vapostori 8:31) Karu zinji jaishandiswa kuitira muphikizano mufambisi waigara akaima. Ngo kudaro, karu yaishandiswa kuitira hwendo yainga no ndau yakakwana kuti agare muetiyopiya na Firipi.

Mukuzwirana no zvatinoverenga mu cipauko 8 co bhuku ra Mabasa no zviitiko zvimweni, mabhuku edu avha kubuda wari anokhombija mafoto o muetiyopiya ecifamba no karu huru kuciripi jiya jaishandiswa ku hondo no kumuphikizano.