MUBVUNJO 9
Ndinodavira Kuphinduka-phinduka Here?
ZVICINYI ZVAUNGAITA?
Rangarirai ciitiko ici: Arishandre ari kubararika hwiru. Nguva jese anodavira Mwari no kusikwa. Asi nyamasi porosori wake wo bhiorojhia wananga ngo kukhohwa kwese kamare kuti kuphinduka-phinduka ngo kocokwadi, kwakacijikira pa zvakavoneka pa kupsakisisa ko masientista. Areshandre aadi kuvoniwa inga benji. Iyena anozvinangira ega kudari; ‘Kunja ka zvese, kudari masientista vanozvavakawana kamare zvinovonesa kuti kuphinduka-phinduka ngo kocokwadi, ndini ani kuti ndikuphikize?’
Kudari nowainga Areshandre, waizotendera kuphinduka- phinduka basi ngo kuti mabhuku o zvojijo anokuvonesa kuti ngo kocokwadi here?
IMAI URANGARIRE!
Vandhu vari pa mativi maviri o ganijano kazinji vanokasikira kunanga zvavanotenda vacikanasi kuziva kamare kuti ngenyi vanozvitendera.
-
Vandhu vamweni vanodavira kusikwa basi ngo kuti ngozvavakajijiswa kuceci.
-
Vandhu vamweni vanodavira kuphinduka-phinduka basi ngo kuti ngozvavakajijiswa kucikora.
MUBVUNJO MUTANDHATU JINODIKANA KUJIJWA
Bhaibheri rinoti: “Nyumba iriyese inovakwa ngo mundhu. Kaveta, muvaki wo bzese ndi Mwari.” (Vaheberi 3:4) Zvina musoro kuzvitendera izvi?
Kunanga kuti upenyu ahuna Musiki i upenji kufanana no kunanga kuti nyumba iyi aizivi kuvakwa
ZVINONANGWA: Zviro zvese zviriyo zvakavepo ngo kuputika kukuru.
1. Ndiani wakaitisaro kuti kuputika kukuru kuitike?
2. Ngozvapi zvinozika—kuti zvese zvakavepo kubva pacina ciro kana zvese zviripo ngo kuti aripo wakazviitisa?
ZVINONANGWA: Vandhu vakabva ku zvinyama.
3. Kudari vandhu vakabva ku zvinyama—inga muezaniso, kubva ku zindhede—ngenyi pano musiano mukuru kamare ngo pamusoro po kuziva ko vandhu no ko mandhede?
4. Ngenyi pikija upenyu “hucitori kutanga kamare” hunonesa kuhusanangura?
ZVINONANGWA: Kuno ucokwadi hunovoneka hwo kuphinduka-phinduka.
5. Mundhu ari kuzvinangaro wakanasa kuzvipsakisisa ushoni ozvivona kamare?
6. Ngenyi vandhu vazinji vanodavira kuphinduka-phinduka basi ngo kuti vakaita kubvunjwa kuti mundhu wese wakangwara anodikana kukutenda?
“Kudari uri kufamba mugwasha wovona nyumba yakaseja maningi, waizorangarira kuti: ‘Mushamaiso wakadini! Miti jakawira kudivi kwaro kuti jikwanise kuimisa nyumba iyi.’ Zvokadi kamare haiwa! Azvicaizovepi no revo. Waro ngenyi tinodikana kudavira kuti zviro zvese zviriyo zvakaitika zvega?”—Julia.
“Rangarira kuti ari wese wakubvunja kuti ciripo cakaputika ku fabirika yo kuphirinta ngo kudaro tinta yadondhera pa mativi o mabiravira no denga otoita tsamba yo dhisionario. Waizozvidavira here?”—Gwen.
NGENYI KUDAVIRA KUTI MWARI ARIYO?
Bhaibheri rinokuvangisa kuti “ungwarire hwiru”. (Mazwi Akangwara 3:21) Izvi zvinoreva kuti kutenda kwako kuvepo ka Mwari, akubviri kucijikira basi pa
-
MAZWIRO (Ndinoita kuzwa basi kuti kunodenga kuno simba guru)
-
KUKHWINDIJIHWA NGO VAMWENI (Ndinoraramira mu ndharaundha munonamatiwa)
-
KUVANGIRIJWA (Vabari vangu vakandirera veciti tendai Mwari —andicaikwanisa kuramba)
Kunja kwa izvi, unodikana kuva no mathangwe anovoneka ngo pamusoro po zvaunotenda.
“Pandinonga ndiri mu sara yokujijira ndecizwa porosori ecisanangura mashandire anoita muviri wedu, apana kukana-kana kwandiri kuti Mwari ariyo. Divi ngo divi rese ro muviri rino mashandire aro, mashandire madoko kamare, zvokutoti kazinji atimazivi. Muviri wo mundhu zvokadi kamare auzwisisiki!”—Tereza.
“Pandinovona nyumba jakareba maningi (arranha-céu), piketi inozwi cruzeiro, kana karu, ndinozvibvunjisa ndega kudari: Ndiani wakaita izvi?” Cinotora vandhu vanoungwaru kuti vaite karu, inga muezaniso, ngo kuti zviro zvizinji zvitotori zvinodikana kushanda ushoni kuitira kuti zvese zvifambevo ushoni. Waro karu inoizwa ngo mundhu, zvakadinivo ndisu vandhu.”—Richard.
“Pandaijijavo maningi siensia, ngopandaitamavo maningi kudavira kuphinduka-phinduka. . . . Kwandiri ndinoda kuti pawanike mathangwe akajeka anopupurira kuti zviro zvakaita kuphinduka-phinduka, kunja kokuita kusikwa.”—Anthony.
KUTI URANGARIRE
Pikija hazvo pakapera makumi o makore o kupsakisisa, masientista anodikana kuti agume pa sananguro yovanodikana kuzwirana ngo pamusoro po kuphinduka-phinduka. Waro kudari masientista aawirirani ngo pamusoro po kuphinduka-phinduka—zve anozviita akangwara—unonga wecishaisha kuphikiza zvokuita kujijwa here?
