Johani 20:1-31
20 Pa njiku yokutanga yo sumana, Mariya Madharena wakaguma pa guva* comangwanani matete, kunja kucakasvipa, wovona kuti buwe riya ravhiswa pa guva.*
2 Ngo kudaro, iyena wakagogoma kuenda kuna Simoni Pedhru no mujiji umweni waidiwa maningi ndi Jesu, wovavhunja kuti: “Mambo wakavhiswa mu guva, atikuzivi kwavakamudira.”
3 Pedhru no mujiji umweni wiya vakaenda ku guva.
4 Vovaviri vakatanga kugogoma pamwepo, asi mujiji umweni wiya wakagogoma ngo kukasika kupinda Pedhru, wotanga kuguma pa guva.
5 Iyena wakadongorira, wovona nguvo jiri pasi, asi aazivi kunghwinemo.
6 Perapo, Simoni Pedhru waimuteveraya, wakagumavo, wonghwina mu guva. Iyena wakavona nguvo jiri pasi.
7 Nguvo yainga mu musoro ma Jesu aicainga pondhopo no nguvo jaipomberaya muviri wake, asi yainga yakapetwa yogara ngo pamutivi.
8 Mujiji umweni wiya, wakatangaya kuguma pa guva, wakanghwinavo. Ngo zvaaivonaro, iyena wakatenda zvaainga akavhunjwa.
9 Ngokuti vainga vacito vazwisisa matahwa anonanga kuti, iyena anodikana kumuswa ko vakafa.
10 Ngo kudaro, vajiji ava vakahwirira mu mamuzi mavo.
11 Asi Mariya wakasara akaima ngo kunja ko guva, ecicema.* Paainga ecicema,* iyena wakadongorira mu guva,
12 wovona ngirozi mbiri jakasimira nguvo jakacena, jakagara painga pakadihwa muviri wa Jesu, imwe ku musoro, imweni ku murenje.
13 Ijona jakamuvhunjisa kuti: “Mwanakaji, uri kucemenyi?* Iyena wakadavira kuti: “Ivona vatora Mambo wangu, inini andikuzivi kovamudira.”
14 Paakapera kunanga izvi, iyena wakasika wosota sure, wovona Jesu wakaima pondhopo, asi aazivi kumuziva kuti wainga Jesu.
15 Jesu wakamuvhunjisa kuti: “Mwanakaji, uri kucemenyi?* Ndiyani wauri kupsakaro?” Ecirangarira kuti wainga murimi, wakati kwaari: “Kudari ndimwi makamutora, ndivhunjenyi kwamamudira, ndiende komutora.”
16 Jesu wakati kwaari: “Mariya!” Paakasota sure Mariya, wakati kwaari ngo Cihebheru: “Rabhoni!” (zvinoreva kuti: “Mujijisi!”)
17 Jesu wakamuvhunja kuti: “Ucandibatirira, ngokuti andito ndakhwira kuna Baba. Asi endai ku hama jangu, ujivhunje kuti: ‘Ndiri kukhwira kuna Baba wangu na Baba wenyu, kuna Mwari wangu na Mwari wenyu.’”
18 Mariya Madharena wakaenda kovhunja vajiji masoko okuti: “Ndavona Mambo!” Wovavhunja zvaainga avhunjwa.
19 Ainga aamadeko o njiku yondhoyo. Njiku yondhoyo yainga njiku yo kutanga yo sumana, musuvo jo ndau yainga no vajiji jainga jakafungwa ngo kuthya Vajudha. Jesu wakaguma woima pakati pavo, wovavhunja kuti: “Ivanyi no runyararo.”
20 Naapera kunanga izvi, iyena wakavatatija nyara jake no pamutivi pake. Vajiji vakadakara maningi ngo kuvona Mambo.
21 Jesu wakavavhunjazve kuti: “Ivanyi no runyararo. Inga zvavakandituma Baba, inini ndiri kumutumavo.”
22 Pasure po kunanga masoko aya, wakavafurijira, wovavhunja kuti: “Ashiranyi mujimu mucena.
23 Kudari mukaregerera zvishaishi zvo mundhu ari wese, izvona zvinonga zvaregerehwa; kudari mukatama kuregerera zvishaishi zvo mundhu ari wese, izvona zvinonga zvicizivi kuregerehwa.”
24 Tomasi, umwe wo Gumi na Vaviri, anodanijwa kuti Manyambiri, wainga acipo pakaguma Jesu.
25 Ngo kudaro, vajiji vamweni vaimuvhunja kuti: “Tavona Mambo!” Asi iyena wakavavhunja kuti: “Kudari ndikatama kuvona mbanga jo peregu mu nyara jake, ndodira cikunwe cangu pa mbanga jo peregu no kudira nyara yangu pa mutivi pake, andizozvitendi.”
26 Pasure po njiku sere, vajiji vake vakaunganazve, Tomasi waingepovo. Pikija musuvo jaifungwa, Jesu wakaguma, woima pakati pavo, wovavhunja kuti: “Ivanyi no runyararo.”
27 Tevere, wakavhunja Tomasi kuti: “Nghwinisai cikunwe cako apa, vonai nyara jangu, tambanujai nyara yako, udire pa mutivi pangu. Ucava mundhu anokana-kana,* asi tendai.”
28 Tomasi wakamudavira kuti: “Mambo wangu na Mwari wangu!”
29 Jesu wakamuvhunja kuti: “Watenda ngokuti wandivona? Vanodakara vacizivi kuvona, asi pikija zvakadaro, vanotenda.”
30 Zvokadi, Jesu wakaitazve mushamaiso muzinji jimweni pambeji po vajiji, jicizivi kutahwa mu bhuku iri.
31 Zviro izvi zvakatahwa kuti mutende kuti Jesu ndiyena Kristu, Mwana wa Mwari. Kuti ngo kumutenda, muwane upenyu ngo zina rake.
Masoko o Pasi
^ Kana: “guva rinoceukijwa.”
^ Kana: “guva rinoceukijwa.”
^ Kana: “acirira.”
^ Kana: “acirira.”
^ Kana: “kurirenyi.”
^ Kana: “kurirenyi.”
^ Gama ngo Gama: “acikatendi.”
