Genesisi 2:1-25
2 Ngo kudaro, kudenga, pasi pano no zvese zvirimo, zvakapera kusikwa.
2 Mwari wakapeja basa rake mukati mo njiku ndhandhatu,* wozorora pa njiku yo cinomwe.
3 Ngo kudaro, Mwari wakakomborera njiku yo cinomwe woicenesa, ngokuti mu njiku iyi wakazorora mu zvese zvaakasika, mu zvese zvaaida kuita.
4 Masoko anovonesa manera akaitwa kudenga no pasi, mukuzwirana no nguva yo zvakasikwaro, pa njiku yo kuti Jehovha* Mwari wakaita pasi pano no kudenga nga aya:
5 Pasi pano painga pacina no pfiba haro,* nee sora rainga ricito ramera ngokuti Jehovha Mwari wainga acito anisa nvura pasi pano, nee apacainga no mundhu kuti arime.
6 Asi mbhute yaivha ngo pasi, ndiyona yaidirijira nyika yese.
7 Jehovha Mwari wakaita mundhu ngo mavhu, iyena wakamufurijira* mu miro mwiha wo upenyu, ngo kudaro mundhu wakava cisikwa cinopona.*
8 Kusiyapo izvo, Jehovha Mwari wakasima* munda mu Edheni, ngo kumavhazuva. Pondhopo wakadira mundhu waakasika.
9 Jehovha Mwari wakaita kuti mu munda mumere mufumbo wese wo muti jakanaka jinofanera kuhiwa, muti wo upenyu wainga pakati po munda no muti wokuziva zvakanaka no zvakashata.
10 Kwainga no murambo waitangira mu Edheni, iwona waipopoma wecidirijira munda, kuvhira pondhopo waiparajana woita murambo murongomuna.
11 Murambo wo kutanga waidanijwa Pishoni; nga wiyana unoterereraya nyika yese yo Havhira, kuno goridhi weya.
12 Goridhi ro kondhono rakanaka maningi. Kunowanikazve ngeji,* no mapuwe o onikisi.
13 Murambo wo cipiri waidanijwa Gihoni; nga wiya waitendereraya nyika yese ya Kushi.
14 Murambo wo citatu waidanijwa Hidhekeri; nga wiya waiendaya ku mavhazuva ko Siriya. Murambo wo cirongomuna waidanijwa Eufarate.
15 Jehovha Mwari wakatora mundhu womudira mu munda wo Edheni, kuti aurime no kuungwarira.
16 Jehovha Mwari wakapekejazve mundhu mupango wo kuti: “Unotendehwa kuha mucero jese jo mu munda wakasujunuka.
17 Asi audikani kuha mucero wo muti wo kuziva zvakashata no zvakanaka. Ngokuti pa njiku yaunozouha, zvokadi kamare unozofa.”
18 Perapo Jehovha Mwari wakati: “Azvizivi kudakaja kuti Mwanarume agare ega, ndinomuitira mubeseri anonasa kuzwirana naye.”
19 Jehovha wainga apera kuita zvinyama zvese zvo pasi pano ngo mavhu, no zvinyama zvese zvinomburuka kudenga. Iyena wakazvitora wozviendesa kuno mundhu kuti avone kuti anozvidanijisa kudini. Madanijire aaizoita cinyama cimwe nga cimwe, zina rondhoro raizova ro cinyama condhoco.
20 Ngo kudaro, mundhu wakadura mazina zvifuyo zvese no zvinyama zvese zvinomburuka kudenga no zvinyama zvese zvo mukumwa, asi mundhu wainga acina mubeseri wakaezana naye.
21 Ngo kudaro, Jehovha Mwari wakaita kuti mwanarume avate hope huru. Paainga akavata, Mwari wakamuvhisa mbavhu wojiva ngo nyama pa mbavhupo.
22 Ngo mbavhu yaakavhisaya ku mwanarume, Jehovha Mwari wakaita ndiyona mwanakaji womuviisa ku mwanarume.
23 Ngo kudaro, mwanarume wakati:
“Uwu i phondo ro maphondo* anguNo nyama yo nyama yangu.
Iyena anozodanijwa kuti Mwanakaji,Ngo kuti wakavhiswa ku mwanarume.”
24 Ngo ndava yazvo, mwanarume anozosiya baba wake na mai wake wozobatana no mukaji wake vovaviri wozova nyama imwe.
25 Vese vovaviri vainga vari mitu, mwanarume no mukaji wake, asi avacaipserukepi.
Masoko o Pasi
^ Gama ngo Gama: “pa njiku yo cinomwe Mwari wainga wapeja basa rake.”
^ Apa ndipona pakatanga kushandiswa zina ra Mwari rakasiyana no amweni, irona raitariswa kudari, יהוה (YHWH). Vonanyi Masoko Okuengejera A4.
^ Kana: “no cimiti haco.”
^ Kana: “wakamufutijira.”
^ Kana: “mwiha; mundhu.” Mu Cihebheru, i ne′phesh. Gama iri rinoda kureva “cisikwa cinofema.” Vonanyi Kudurujihwa ko Magama pa gama ro kuti “mwiha.”
^ Kana: “wakanasirira.”
^ Mukhaindi umweni wo ngeji jaishandiswa inga phurufumi mu nguva jo Bhaibheri.
^ Kana: “i fupa ro mafupa.”
