Omangoye abafuyiweyo baziwa ngokuthanda inhlanzeko. Izikhathi ezinengi nxa umangoye ekhangele uyabe eziklina esebenzisa ulimi lwakhe. Ulimi lolu lwenziwe ngendlela emangalisayo kakhulu yikho esala ehlanzekile ngemva kokuzikhothakhotha.

 Cabanga ngalokhu: Ulimi lukamangoye lulokuyizinto okuncane (okuthiwa ngama-papillae) okusamazinyo ekama encane. Okungamazinyo lokhu kungu-290 njalo kuqine njengenzipho zomuntu. Ngesikhathi umangoye ezikhothakhotha, i-papilla ngayinye iyabe ilamathe okuyiwo enza umangoye asale ehlanzekile. Nxa umangoye ezikhotha, ama-papillae ayatshona eboyeni ukuze amathe enelise ukuyafika lasesikhumbeni.

 Umangoye uzigezisa uboya lesikhumba sakhe esebenzisa amathe angaba ngamamililitha angu-48 ngelanga. Amathe la alemithi ebulala izibungu ezingaba yingozi emzimbeni kamangoye. Ukuzikhothakhotha kukamangoye kumnceda lokuthi angahlali etshiselwa ngoba amathe akhe ayamqandisa.

 Nxa amazinyo la angahlangana lolutho oluqinileyo eboyeni kumbe esikhumbeni sikamangoye lawo, ayaqina ukuze enelise ukulukhipha. Umangoye uphinda asebenzise ama-papillae ukuzinwaya. Abachwayisisayo bakopa indlela ulimi lukamangoye olusebenza ngayo ukuze benze isibhrasho senwele. Isibhrasho lesi sisebenziseka lula futhi akunzima ukusiklina nxa siqathaniswa lezinye esizijayeleyo. Abachwayisisayo bathi ukukopa indlela ulimi lukamangoye olusebenza ngayo izabanceda ukuthi bathuthukise imitshina yokuklina abafuna ukuyenza. Bathi kungabanceda lokuthi balungise lezibhrasho ezingasetshenziswa ukugcoba amafutha kumbe imithi emizimbeni elehwanqa.

 Ubona njani? Indlela ulimi lukamangoye olusebenza ngayo yazenzakalela yini kumbe yadalwa?