Inhlanzi okuthiwa yi-dolphin ikhipha imisindo etshiyeneyo nxa ihamba futhi leyomisindo ifika itshayelele kuloba yini esendleleni ibisiphenduka. Lokhu kwenza inhlanzi le yenelise ukwazi ukuthi kulani endaweni ethile. Ukuhlola umhlobo we-dolphin okuthiwa yi-bottlenose kuncede abezesayensi ukuthi benze umtshina ozathuthukisa indlela abasebenza ngayo.

 Cabanga ngalokhu: Ukukhipha imisindo le kwenza i-dolphin yenelise ukwehlukanisa phakathi kwenhlanzi lelitshe. Iyenelisa lokuthola inhlanzi ezisemhlabathini ongaphansi kolwandle. UKeith Brown isikhwicamfundo esisebenzela eHeriot-Watt University, eScotland siveza ukuthi i-dolphin iyenelisa ukuzwa umahluko okhona phakathi kwegabha elile-oyili, elilamanzi ahlanzekileyo loba alesawudo lanxa ikhatshana ngamamitha alitshumi. Abezesayensi bafuna ukwenza umtshina owenelisa ukwenza okufananayo.

 Ababona ngezendalo bahlolisisa ngemisindo ekhutshwa yi-dolphin lokuthi kwenzakalani nxa imisindo leyo isiphendukile. Ngemva kokuhlolisisa lokhu bazama ukukopa indlela inhlanzi le eyenza ngayo basebesenza umtshina omangalisayo ohlala phakathi kwegabha elingaba yimitha ubude. Igabha leli lifakwa emtshineni owenelisa ukuhamba ngaphansi kwamanzi. Umtshina oyabe uphakathi kwegabha leli uyenelisa ukuzwa ukuthi ngaphansi komhlabathi kulezinto ezithile lanxa ukhatshana. Abantu abenza umtshina lo bacabanga ukuthi uzabanceda ngesikhathi esizayo ekukhipheni i-oyili. Bakhangelele ukuthi ukwazi okunengi ngalokho okwenziwa yi-dolphin kuzabanceda bathuthukise imitshina yabo. Ukuyithuthukisa khona kuzabasiza bakwazi ukuthi bangafaka ngaphi imitshina edonsa i-oyili ngaphansi kwamanzi.

 Ucabangani? Kwazenzakalela yini ukuthi i-dolphin yenelise ukukhipha imisindo eyenza ikwazi okuphambi kwayo kumbe kwadalwa?