Odokotela ababona ngoku-opharethwa kwabantu sebelesikhathi bedinga izinto ezinganceda ukuvala amanxeba nxa be-opharetha umuntu. Ama-glue amanengi asetshenziswa khathesi ngeke asetshenziswe ngaphakathi komzimba womuntu. Kawanamatheli lapho okumanzi khona, ayingozi futhi ayawoma aqine nko. Ngakho abezesayensi bahlolisise amanzi anamathelayo aphuma emnenkeni ongelagebhezi, * bathola indlela yokulungisa uhlupho lolu.

 Cabanga ngalokhu: Nxa umnenke lo ubona ingozi, uyakhipha amanzi anamathelayo futhi amanzi la yiwo enza ukuthi unamathele lasehlamvini elimanzi. Lokhu kuyawuvikela umnenke lo njalo okumangalisayo yikuthi lanxa uyabe unamathele, uyenelisa ukunyakaza.

 Abachwayisisayo sebehlolisise amanzi la bathola ukuthi kuyini okwenza anamathele ngalindlela. Okunye abakutholayo yikuthi alamakhemikhali abangela ukuthi anamathele lula. Ayangena entweni ethile umnenke ofuna ukunamathela kuyo njalo nxa umnenke unyakaza ayanembuluka aqhubeke ewubambile. Abezesayensi balingisele okwenziwa ngumnenke lo benza i-glue eqine ukwedlula imithi yokunamathisela esetshenziswa ezibhedlela. I-glue le abayenzileyo iyenelisa ukunamathela ezithweni zomuntu eziphakathi komzimba. Kuthiwa yenza “izitho zomzimba zinamathelane angathi yinyama enamathele ethanjeni.”

 Abezesayensi bacabanga ukuthi i-glue le ingasetshenziswa ngodokotela bonke kucine kungaselasidingo sokuthunga abantu. Ingasetshenziswa lasekunamathiseleni inyama etholakala lapho okuhlangana khona amathambo kumbe ukufaka izinto zokwelapha emzimbeni womuntu lapho abafuna zihlale khona. I-glue le ike yasetshenziswa ukuvala isikhala enhliziyweni yengulube lokuvala izikhala ezibindini zamagundwane njalo lokho kwaphumelela.

 Abezesayensi bajayele ukuthola amacebo ngokuhlolisisa izinto ezidaliweyo. UDonald Ingber, umaqhuzu wenhlanganiso eyasungula i-glue le uthi: “Okuqakathekileyo yikwazi ukuthi ukhangele ngaphi ukuze uthole amacebo, ubusunanzelela ukuthi okubonayo ungakusebenzisa njani.”

 Ubona njani? I-glue yomnenke ongelagebhezi yazenzakalela yini kumbe yadalwa?