Ngobani Abazakuya Ezulwini?
Impendulo yeBhayibhili
UNkulunkulu ukhethe inani elincane lamaKhristu athembekileyo ukuthi nxa angafa ahle avuswe aye ezulwini. (1 UPhetro 1:3, 4) Nxa bangakhethwa kumele baqhubeke beqinisa ukholo lwabo futhi baziphathe kuhle ukuze bangathathelwa umvuzo wokuyaphila ezulwini.—Kwabase-Efesu 5:5; KwabaseFiliphi 3:12-14.
Bayakwenzani ezulwini?
Bazabe beloJesu bebusa njengamakhosi labaphristi okweminyaka engu-1 000. (ISambulo 5:9, 10; 20:6) Bazabumba “izulu elitsha,” loba uhulumende osezulwini ozabusa “umhlaba omutsha,” okutsho umphakathi wabantu abazabe besemhlabeni. Amakhosi asezulwini azancedisa abantu ukuthi baphinde babe yilokho uNkulunkulu ayevele ekuhlosile ekuqaleni.—U-Isaya 65:17; 2 UPhetro 3:13.
Bangaki abazakuya ezulwini?
IBhayibhili lisitshela ukuthi bangu-144 000 abazavuswa bayephila ezulwini. (ISambulo 7:4) Embonweni esiwuthola kuSambulo 14:1-3, umphostoli uJohane wabona “iMvana imi phezu kweNtaba iZiyoni ilabangu-144 000.” Embonweni lo, “iMvana” imela uJesu. (UJohane 1:29; 1 UPhetro 1:19) “INtaba iZiyoni” imela isikhundla esiphakemeyo sikaJesu labangu-144 000 abazabusa laye ezulwini.—IHubo 2:6; KumaHebheru 12:22.
Labo “ababiziweyo labakhethiweyo” ukuthi bayebusa loKhristu eMbusweni babizwa langokuthi “ngumhlambi omncane.” (ISambulo 17:14; ULukha 12:32) Lokhu kutshengisa ukuthi balutshwane sibili nxa beqathaniswa lenani lazo zonke izimvu zikaJesu.—UJohane 10:16.
Imibono engaqondanga mayelana lokuthi ngobani abazakuya ezulwini
Umbono ongaqondanga: Bonke abantu abalungileyo bazakuya ezulwini.
Okuqondileyo: UNkulunkulu uthembisa abantu abanengi abalungileyo ukuthi bazaphila phakade khonapha emhlabeni.—IHubo 37:11, 29, 34.
UJesu wathi: “Kakho osewake waya ezulwini.” (UJohane 3:13) Ngokutsho njalo wakwenza kwacaca ukuthi abantu abalungileyo abafa kudala yena engakafi abanjengo-Abrahama, uMosi, uJobe loDavida, babengekho ezulwini. (ImiSebenzi 2:29, 34) Kodwa babelethemba lokuvuswa baphile lapha emhlabeni.—UJobe 14:13-15.
Ukuvuselwa ukuyaphila ezulwini kubizwa ngokuthi ‘yikuvuswa kwabafileyo kokuqala.’ (ISambulo 20:6) Lokhu kutshengisa ukuthi kuzakuba lokunye ukuvuswa kwabafileyo okuzakwenzakala lapha emhlabeni.
IBhayibhili lisitshela ukuthi nxa sekubusa uMbuso kaNkulunkulu “ukufa ngeke kusabakhona.” (ISambulo 21:3, 4) Isithembiso lesi sizagcwaliseka lapha emhlabeni njengoba ezulwini kungakaze kube lokufa.
Umbono ongaqondanga: Umuntu ngamunye uyazikhethela ukuthi ufuna ukuphila ezulwini loba emhlabeni.
Okuqondileyo: UNkulunkulu nguye okhethayo ukuthi yiwaphi amaKhristu athembekileyo azathola “umvuzo wokubizwa ezulwini,” okutsho ithemba lokuyaphila ezulwini. (KwabaseFiliphi 3:14) Ukuba lesifiso ayisikho okwenza umuntu afanele ukukhethwa.—UMathewu 20:20-23.
Umbono ongaqondanga: Ithemba lokuphila emhlabeni ngelalabo abangafanelanga ukuyaphila ezulwini.
Okuqondileyo: UNkulunkulu ubiza labo abazaphila emhlabeni ngokuthi “ngabantu bami,” “abakhethiweyo bami,” lokuthi “ngabantu abusisiweyo nguJehova.” (U-Isaya 65:21-23) Bazakuba lesibusiso sokugcwalisa inhloso uNkulunkulu ayevele elayo yokuthi umhlaba ube lipharadayisi futhi uhlale abantu abapheleleyo.—UGenesisi 1:28; IHubo 115:16 lo-Isaya 45:18.
Umbono ongaqondanga: Inani labantu abangu-144 000 elikuSambulo lingokomfanekiso.
Okuqondileyo: Lanxa ibhuku leSambulo lilamanye amanani angokomfanekiso, amanye amanani kumele athathwe njengoba enjalo. Ngokwesibonelo, lithi “kwakulamabizo alitshumi lambili abaphostoli beMvana abalitshumi lambili.” (ISambulo 21:14) Ake sihlole obunye ubufakazi obenza siphethe ngokuthi i-144 000 yilo inani lakhona sibili.
USambulo 7:4 ukhuluma ‘ngenani lalabo ababefakwe uphawu [loba abalesiqinisekiso sokuthi bazaphila ezulwini],’ ukuthi ‘babeyi-144 000.’ Kanti njalo nxa ubala amavesi alandelayo kuhle kukhulunywe ngeqembu lesibili, “ixuku elikhulu” okungelamuntu “owayesenelisa ukulibala.” “Ixuku elikhulu” lalo lizathola insindiso evela kuNkulunkulu. (ISambulo 7:9, 10) Nxa kuyikuthi inani labangu-144 000 lingokomfanekiso futhi litsho iqembu labantu elingeke libalwe kutsho ukuthi okutholakala emavesini la kuliphutha ngoba wona akubeka ngokuthi kulamaqembu amabili. a
Kanti njalo abangu-144 000 kuthiwa “bathengwa ebantwini baba yizithelo zokuqala.” (ISambulo 14:4) Umutsho othi “izithelo zokuqala” utsho inani elincane elikhethiweyo lalabo abazabusa loJesu ezulwini bebusa abantu abazabe bephila lapha emhlabeni.—ISambulo 5:10.
a Isikhwicamfundo uRobert L. Thomas laye wabhala ekhuluma ngenani labantu abangu-144 000 okukhulunywa ngabo kuSambulo 7:4 wathi: “lnani leli libekwe njengoba linjalo laseliqathaniswa lenani elingeke libalwe elikusahluko 7:9. Nxa singathi lingokomfanekiso kutsho ukuthi akulanani elisebhukwini leli okumele silithathe linjengoba linjalo.”—ISambulo 1-7: An Exegetical Commentary, ikhasi 474.
Nanku Okunye
ESSENTIAL BIBLE TEACHINGS
Uyini UMbuso KaNkulunkulu?
Ngesikhathi esemhlabeni uJesu wakhuluma kanengi ngoMbuso kaNkulunkulu. Sekuleminyaka eminengi abalandeli bakhe bethandazela ukuthi uMbuso lo ubuye.
