Kungani Umhlatshelo KaJesu Ubizwa Ngokuthi “Yinhlawulo Yabanengi”?
Impendulo yeBhayibhili
Umhlatshelo kaJesu yindlela kaNkulunkulu yokukhulula abantu esonweni lasekufeni. IBhayibhili lithi ukuchitheka kwegazi likaJesu yikho okuyinhlawulo. (U-Efesu 1:7; 1 UPhetro 1:18, 19) UJesu laye wathi ulande ‘ukuzonikela ngempilo yakhe ibe yinhlawulo yabanengi.’—UMathewu 20:28.
Kungani kwakudingeka ‘inhlawulo yabanengi’?
Umuntu wokuqala u-Adamu wadalwa engelasono. Wayelesibusiso sokuphila kuze kube phakade kodwa samlahlekela ngenxa yokukhetha kwakhe ukungalaleli uNkulunkulu. (UGenesisi 3:17-19) Ngesikhathi esesiba labantwana wabathelela isono ayeselaso. (KwabaseRoma 5:12) Ngenxa yalokho okwenziwa ngu-Adamu, iBhayibhili lithi ‘wazithengisa’ yena labantwabakhe ebugqilini besono lokufa. (KwabaseRoma 7:14) Ngenxa yesono lesi akula ngitsho loyedwa owayengenelisa ukuthenga lokho okwakulahlwe ngu-Adamu.—IHubo 49:7, 8.
UJehova waba lozwelo ebantwaneni baka-Adamu ngoba babengaselalo ithemba lokuphila phakade. (UJohane 3:16) Ukulunga kwakhe akuzange kumvumele ukuthi aphongusidlulisa isono leso singahlawulwanga. (IHubo 89:14; KwabaseRoma 3:23-26) UNkulunkulu uyabathanda abantu yikho wenza indlela yokuthi bathethelelwe izono lokuthi azisuse ngokupheleleyo. (KwabaseRoma 5:6-8) Indlela le ibizwa ngokuthi yinhlawulo.
Isebenza njani inhlawulo?
EBhayibhilini ibala elithi “inhlawulo” ligoqela izinto lezi ezintathu:
Imbadalo.—AmaNani 3:46, 47.
Ukuhlenga loba ukukhulula.—U-Eksodusi 21:30.
Ukuhambelana kolutho olubhadalelwayo. a
Ake sibone ukuthi izinto lezi zingenelana njani lenhlawulo kaJesu Khristu.
Imbadalo. IBhayibhili lithi amaKhristu ‘athengwa ngentengo.’ (1 KwabaseKhorinte 6:20; 7:23) Intengo le ligazi likaJesu ‘athengela ngalo uNkulunkulu abantu abavela kuzo zonke izizwana, lezindimi, lemihlobo yabantu kanye lezizwe.’—ISambulo 5:8, 9.
Ukuhlenga. Umhlatshelo kaJesu wenza ‘sakhululwa’ esonweni.—1 KwabaseKhorinte 1:30; KwabaseKholose 1:14; KumaHebheru 9:15.
Ukuhambelana. Umhlatshelo kaJesu uhambelana kuhle lalokho okwalahlwa ngu-Adamu okutsho impilo epheleleyo. (1 KwabaseKhorinte 15:21, 22, 45, 46) IBhayibhili lithi: “Njengoba nje abanengi benziwa baba yizoni ngokungalaleli komuntu oyedwa [u-Adamu], abanengi kuzathiwa balungile ngokulalela komuntu oyedwa [uJesu Khristu].” (KwabaseRoma 5:19) Ivesi le isichasisela indlela ukufa komuntu oyedwa okungahlawulela ngayo abantu abanengi. Yikho umhlatshelo kaJesu “uyinhlawulo efaneleyo yabantu bonke.” Abantu laba ngabenza okufaneleyo ukuze bancedwe yiyo.—1 KuThimothi 2:5, 6.
a Ibala elahunyutshwa ngokuthi “inhlawulo” eBhayibhilini lilomqondo wentengo loba isisindo salokho okubhadalelwayo. Ngokwesibonelo, ibala lesiHebheru elithi ka·pharʹ litsho ‘ukuvala.’ (UGenesisi 6:14) Lisetshenziswa kanengi nxa kukhulunywa ngokuvala isono. (IHubo 65:3) Elinye ibala elihambelana lalo ngelithi koʹpher elitsho intengo ebhadalwayo ukuze kuvalwe kumbe kukhululwe okuthile. (U-Eksodusi 21:30) Elinye ibala lesiGrikhi elithi lyʹtron elijayele ukuhunyutshwa ngokuthi “inhlawulo,” lingahunyutshwa langokuthi “intengo yokuhlenga.” (UMathewu 20:28; The New Testament in Modern Speech, eyahunyutshwa nguR. F. Weymouth) Abalobi abangamaGrikhi babesebenzisa ibala leli nxa bekhuluma ngembadalo yokuhlenga isibotshwa empini kumbe eyokukhulula isigqili.