Umama okuthiwa nguDesicar okhulisa umntwana eyedwa wayefuna ukwenzela uJehova okunengi ngokuba liphayona lesikhathi sonke. Umama lo uhlala eVenezuela futhi ilizwe leli alimanga kuhle kwezomnotho. Kodwa ngenxa yokuthi wayezimisele ukuba liphayona wenelisa ukukwenza. Esazikholisela ukuphayona thutshu i-COVID-19.

 Kwathi umkhuhlane lo uqalisa uDesicar wathwala nzima ukutshumayela ngoba wayengazijayelanga indlela ezintsha zokutshumayela. Kwakumthwalisa nzima ukubhala izincwadi. Kanti njalo wayengenelisi ukuqhuba izifundo ngevidiyo ngenxa yokuthi i-data iyadura kakhulu. Uthi: “Lokhu kwangidanisa kakhulu ngoba ngangingasenelisi ukwenza okunengi enkonzweni ngendlela engangisenza ngayo. Ngangibona angani sengiliphayona elingawenzi kuhle umsebenzi walo.”

 Igatsha laboFakazi bakaJehova eVenezuela latshela abamemezeli ukuthi kwakuzakuba lomkhankaso oqakathekileyo ngoJanuary 2021. Kwahlelwa ukuthi izintshumayelo zethu ezisekelwe eBhayibhilini zisakazwe ezititshini zerediyo ezingaba ngu-60 lasezititshini ze-TV ezingu-7. Intshumayelo lezo zasakazwa kuzo zonke impelaviki zenyanga leyo. OFakazi bakhuthazwa ukuthi banxuse abanye abantu ukuthi balalele intshumayelo lezo. Igatsha lanika abamemezeli imibuzo kanye lamavesi entshumayelo ngayinye ukuze bakusebenzise nxa betshumayela ngezincwadi langefoni. Laphinda labakhuthaza ukuthi batshumayele ngokubhala amameseji. Le kwakuyindlela entsha yokutshumayela kuboFakazi abanengi beVenezuela.

 UDesicar wathi esizwa ngomkhankaso lo wathokoza kakhulu. Lanxa nje wayengakaze atshumayele ngokubhala amameseji wazimisela ukuke akuzame. Kodwa wayefuna ukuncediswa. Uthi: “Ezempucuko ziyangiphica.” Yikho wacela indodakazi yakhe ukuthi imfundise. Kungakayi ngaphi wayesekwazi ukukwenza lokhu. UDesicar wayesewulungele sibili umkhankaso.

 UDesicar wathumela abantu amameseji esebenzisa ifoni yakhe, ebanxusa ukuthi balalele intshumayelo ezirekhodiweyo. Okwenzakala ngemva kwalokho kwammangalisa. Abanengi ayebathumela amameseji balalela intshumayelo lezo basebembuza imibuzo. Abanye abenelisanga ukulalela intshumayelo lezo yikho babuza uDesicar ukuthi kwakukhulunywa ngani. UDesicar uthi: “Ngabhala ngamafitshane okwakukhulunywe ezintshumayelweni lezo ngasengibathumela. Ngangingakaze ngibe lezimpindela ezidlula 5 inyanga ngayinye kodwa umkhankaso wathi ususiyaphela ngasengilezimpindela ezingu-112!” a

 UDesicar waphinda wanxusa lodadewabo ohlala duze laye ukuthi alalele intshumayelo lezo kurediyo. Uthi: “Ngangingakhangelelanga ukuthi udadewethu uzavuma. ISonto ngayinye ngo-8 ekuseni ngangisiya lapho ahlala khona silalele irediyo ndawonye. Wayengibuza imibuzo eminengi khonapho sisalalele langesikhathi intshumayelo isiphelile.” Udadewabo kaDesicar waphinda wangena iSikhumbuzo sokufa kukaJesu esebenzisa ezempucuko. Watshela loDesicar ukuthi ukhululekile ukusebenzisa i-inthanethi yakhe ukuze atshumayele.

 UDesicar uthi: “Ngiyambonga kakhulu uJehova. Ngiyababonga labadala abasebandleni lami ngokungincedisa langokungikhuthaza ukuthi ngiphinde ngithole intokozo enkonzweni yami.” (UJeremiya 15:16) UDesicar ulokhu ephayona futhi exoxa ngeBhayibhili labantu abathumela amameseji ababefuna ukufunda okunengi.