Ngesikhathi ngizalwa, abazali bami babelepulazi elincane endaweni esemaphandleni okuthiwa yiGalicia, eSpain. Ngangingumntwana wesine kwabangu-8. Sasiziphilela impilo emnandi ngekhaya. Ngalesosikhathi eSpain kwakujayelekile ukuthi phakathi kwabantwana emulini kube loyedwa kumbe abedlula lapho abazinikela ukuthi bayehlala esontweni yamaRoma babe ngosista khonale. Ngakithi saba bathathu esakhetha ukwenza njalo.

Ngathi sengileminyaka engu-13, ngalandela usisi wami lapho ayesengusista khona eMadrid. Kwakungamnandi ukuphila endaweni leyo. Kwakungelamuntu ongumngane womunye. Ababekuqakathekisa yimithetho lokukhuleka futhi bengahleki ngokulandela imithetho yabo. Sasivuka ekuseni kakhulu siyebuthana esontweni ukuze siyecabangisisa njalo sithandaze lanxa mina ngangihlala ngiphelelwa ngokokucabanga. Ngemva kwalokho sasihlabela izingoma zesonto senze lenkonzo zakhona ngesiLatin. Akulanto engangiyizwisisa vele, futhi ngangisizwa angani uNkulunkulu ukhatshana kakhulu lami. Insuku zaqhubeka zihamba ngilokhu ngifela ngaphakathi. Ngitsho lanxa sasihlangana losisi wami, sasiphongubingelelana ngendlela yakhona eyabosista beRoma kuphela. Osista babesivumela ukuthi sixoxe okwemizuzu engu-30 kuphela ngemva kokudla. Impilo yakhona yayingamnandi njengaleyo engangiyiphila ngingekhaya. Ngangizizwa ngilahlekile njalo ngangihlala ngikhala.

Lanxa ngingazange ngizizwe ngisondela kuNkulunkulu, ngasenza isifungo sokuba ngusista weRoma sengileminyaka engu-17. Iqiniso yikuthi ngakwenza ngoba yikho okwakukhangelelwe ukuthi ngikwenze, kodwa kungakayingaphi ngaqalisa ukuzibuza ukuthi kambe uNkulunkulu wayengikhethile sibili ukuthi ngibe ngusista. Osista babejayele ukusitshela ukuthi labo ababethandabuza njengami babezatshiswa esihogweni! Lanxa kunjalo, imibuzo engangilayo yaqhubeka ingihlupha. Ngangikwazi ukuthi uJesu Khristu kazange azisuse ebantwini, kodwa wayekhuthele efundisa njalo encedisa abantu. (UMathewu 4:23-25) Ngathi sengileminyaka engu-20 ngangingasasiboni isizatho sokuqhubeka ngingusista weRoma. Isimanga yikuthi umama owayengomkhulu wabosista wangitshela ukuthi nxa ngasengithandabuza, kwakungaba ngcono ukuthi ngiphangise ngitshiye. Ngicabanga ukuthi wayesesaba ukuthi ngangizacina sengisenza labanye bathandabuze. Ngakho ngatshiya ngazihambela.

Ngathi ngifika ngekhaya, abazali bami bangizwisisa sibili. Kodwa njengoba imisebenzi yayingatholakali lapho esasihlala khona, ngathuthela eGermany lapho umnawami ongumfana ayehlala khona. Wayelilunga leqembu elithile elalibunjwa ngabantu beSpain ababehlala khonale eGermany. Ngazizwa ngikhululekile ukuba phakathi kwabantu ababelwela amalungelo ezisebenzi kanye lawokuphathwa kuhle kwabesifazane. Ngakho lami ngalijoyina iqembu leli ngacina sengitshada lomunye wamalunga alo. Ngangicabanga ukuthi ngenza into eloncedo, nginika abantu amabhuku aphathelane lamalungelo esasiwalwela njalo ngisenza lama-demonstration.

Kodwa ngokuhamba kwesikhathi ngaqalisa futhi ukudana. Ngananzelela ukuthi iqembu leli lalisehluleka ukwenza izinto elalihlala lizihlabela ebantwini. Ngasola lalokho abakwenza ngo-1971 lapho amanye amalunga eqembu leli etshisa amawofisi amele iSpain eFrankfurt. Lokhu bakwenza besithi balwisana lokungaphathwa kuhle kwabantu eSpain. Kodwa ngangikubona kuyindlela engayisiyo yokutshengisela inzondo.

Kuthe umntanami wokuqala esezelwe, ngatshela umkami ukuthi ngangingasafuni ukuqhubeka ngisiya emihlanganweni yeqembu lethu. Ukungayi emihlanganweni leyo kwenza ngaba lesizungu ngoba kakho loyedwa wabangane bami owabuya ukuzongivakatshela lomntanami. Ngaqalisa ukuzibuza ukuthi kanti siphilelani. Kwakuloncedo yini ukuzama ukuthuthukisa izinto emphakathini?

Ngo-1976, ngavakatshelwa ngoFakazi ababili abasuka eSpain bacela ukunginika amabhuku aphathelane leBhayibhili, ngawamukela sibili. Ekungivakatsheleni kwabo kwesibili, ngabahlohla ngemibuzo ephathelane lokuhlupheka, ukukhangelelwa phansi kwabantu kanye lokungaphathwa kuhle kwabo. Kwangimangalisa ukubabona bephendula yonke imibuzo yami besebenzisa iBhayibhili! Ngahle ngavuma ukufunda iBhayibhili.

Ekuqaliseni ngangikholisa ukuphongufunda kuphela. Kodwa izinto zatshintsha ngesikhathi mina lomkami siqalisa ukungena imihlangano eWolu yoMbuso yaboFakazi bakaJehova. Sasesilabantwana ababili. OFakazi basitshengisa umusa ngokusithwala ngezimota langokusincedisa ukukhangela abantwana ngesikhathi sisemihlanganweni. Lokhu kwangenza ngaqalisa ukubathanda kakhulu oFakazi.

Lanxa kunjalo ngangilokhu ngilokuthandabuza endabeni zokukhonza. Ngasuka ngayavakatshela abangakithi eSpain. Umalume owayengumfundisi wazama ukungiyekelisa ukufunda iBhayibhili. Kodwa oFakazi engabathola ekhaya banginceda kakhulu. Labo baphendula imibuzo yami besebenzisa iBhayibhili njengalabana abaseGermany. Ngabona kungcono ukuthi ngiqhubeke ngesifundo sami seBhayibhili ngemva kokubuyela eGermany. Lanxa umkami yena wakhetha ukuyekela ukufunda, mina ngaqhubeka ngenza engasengikukhethile. Ngo-1978, ngabhabhathizwa ngaba nguFakazi kaJehova.

Ulwazi lweqiniso olutholakala eBhayibhilini lungenze ngaba kwazi ukuthi ngiphilelani njalo lwangenza ngaphila impilo engcono. Ngokwesibonelo, u-1 Phethro 3:1-4 ukhuthaza abesifazane ukuthi ‘bazehlise’ kubomkabo, ‘babahloniphe kakhulu’ njalo ‘babe lomoya omnene oqakatheke kakhulu phambi kukaNkulunkulu.’ Izimiso ezinjengalezi sezingincede ukuthi ngibe ngunkosikazi kanye lomama ongcono kakhulu.

Sengileminyaka engaba ngu-35 nginguFakazi. Kuyangithokozisa ukukhonza uNkulunkulu ngiphakathi kwemuli yomhlaba wonke yabafowethu labodadewethu, futhi ngiyajabula ukuthi phakathi kwabantwabami abangu-5, abangu-4 labo bakhetha ukukhonza uNkulunkulu.