Abanengi babandlulula abanye kusiya ngokuthi badabuka ngaphi, ngabasiphi isizwe, bangumhlobo bani lokuthi bakhuluma luphi ulimi. Baphinde babandlulule abanye kusiya ngokuthi ngabesilisa kumbe ngabesifazana, ukuthi bakholwani kanye lokuthi bakhangelwa njani emphakathini. Abanye bakhangelela phansi abantu abakhubazekileyo njalo indlela abaphatha ngayo abanye iya ngokuthi umuntu unganani, ufundile yini lokuthi ubukeka njani. Lanxa kunjalo bayabe bezitshela ukuthi kababandlululi.

Wena uyabandlulula yini? Kulula ukunanzelela ukuthi abanye bayabandlulula. Kodwa kunzima ukuthi umuntu abone ukuthi laye uyabandlulula. Kodwa iqiniso elikhona yikuthi sonke siyake sibabandlulule abanye. Isikhwicamfundo esihlola ngokuhlalisana kwabantu, uDavid Williams, sananzelela ukuthi nxa abantu belombono ongaqondanga ngeqembu elithile labantu, bajayele ukuthi bangahlangana lomuntu weqembu lelo ‘bamphathe ngendlela etshiyene lendlela abaphatha ngayo abanye abantu futhi lokhu bakwenza bengananzeleli.’

Ngokwesibonelo, kwelinye ilizwe elise-Europe lapho okuhlala khona indoda okuthiwa nguJovica kulomhlobo wabantu ozondwa ngabantu abanengi. UJovica uthi, “Ngangicabanga ukuthi akulamuntu olungileyo ebantwini bomhlobo lowo. Ngangizitshela ukuthi engikucabangayo ngabo kuqondile. Kodwa ngangingananzeleli ukuthi ngiyababandlulula.”

Ohulumende abanengi bafaka imithetho yokulwisana lobandlululo. Lanxa kunjalo abantu baqhubeka bebandlululana. Kungani kunjalo? Ngoba imithetho leyo itshela umuntu lokho okumele akwenze lokungamelanga akwenze kuphela. Kayenelisi ukutshintsha lokho akucabangayo lokusenhliziyweni yakhe. Phela ubandlululo luqalisa engqondweni lasenhliziyweni yomuntu. Yikho singazibuza ukuthi ubandlululo luzafa lwaphela yini.