“OFakazi babengatshengisi umusa ebantwini kuphela kodwa lasezinjeni zami. Ngelinye ilanga kwakulomunye umama owayethiwa ngu-Elaine owayeme khonapho enqoleni. U-Elaine wanika izinja zami amabhiskiti. Kusukela lapho ngangisithi nxa ngisedlula izinja zami zihle zidonse intambo sezifuna amabhiskiti aboFakazi.

“Kwadlula izinyanga. Izinja zazikholisa amabhiskiti mina ngikholisa ingxoxo ezimfitshane laboFakazi. Kodwa ngangingafuni ukubajayela kakhulu. Ngasengileminyaka edlula 70 futhi ngangingakwazi okukholwa ngoFakazi. Ngangibona kungcono ukuthi ngizibalele ngedwa iBhayibhili ngoba ngasengidaniswe ngamasonto amanengi azithi ngawesiKhristu.

“Ngaqalisa ukunanzelela abanye oFakazi bemi endaweni ezitshiyeneyo zedolobho eceleni kwenqola zabo. Labo babelomusa. Babephendula imibuzo yami besebenzisa iBhayibhili futhi lokhu kwenza ngaqalisa ukubathemba.

“Ngelinye ilanga u-Elaine wangibuza wathi: ‘Uyakukholwa yini ukuthi inyamazana ziyisipho esivela kuNkulunkulu?’ Ngamphendula ngathi: ‘Ye, angikuthandabuzi lokho.’ Wangibalela u-Isaya 11:6-9. Ngasengifuna ukufunda okunengi okuseBhayibhilini kodwa ngangingafuni ukuthatha amabhuku abo.

“Kusukela lapho ngasengikholisa ingxoxo ezimfitshane ezimnandi engangisiba lazo lo-Elaine kanye lomkakhe uBrent. Bangicela ukuthi ngibale kusukela kuMathewu kusiya kumiSebenzi ukuze ngibone ukuthi kutshoni ukuba ngumKhristu weqiniso. Lakanye ngakwenza lokho. Ngo-2016 ngavuma ukufunda iBhayibhili loBrent lo-Elaine.

“Ngangihlala ngikukhangelele ukufunda iBhayibhili lokungena imihlangano eWolu yoMbuso maviki wonke. Kwangithokozisa kakhulu ukuthi ngasengifunda lokho okufundiswa liBhayibhili sibili. Kusanda kudlula umnyaka ngabhabhathizwa. Khathesi sengileminyaka engu-79 futhi ngiyathokoza ngokuthi ngayithola inkolo yeqiniso. UJehova ungibusisile sibili ngokungamukela emulini yezinceku zakhe ezizinikeleyo.”