•  Amazwi Okuvula 2

•  Amagugu AseLizwini LikaNkulunkulu 3-5

  •  Inkulumo 3

  •  Ukuchwayisisa IMibhalo 4

  •  Ukubalwa KweBhayibhili 5

•  Zinikele Emsebenzini Wokutshumayela 6-14

  •  Ukuqalisa Ingxoxo 7

  •  Ukuphindela 8

  •  Ukwenza Abafundi 9

  •  Ukuchasisa Esikukholwayo 10

  •  Inkulumo 11

  •  Ongakukhuluma 12

  •  Indlela Ongatshumayela Ngayo 13

  •  Ukusebenzisa Amavidiyo Lamabhuku 14

•  Impilo YamaKhristu 15-16

  •  ISifundo SeBhayibhili Sebandla 16

•  Amazwi Okuphetha 17

•  Ukuncoma Leseluleko 18

•  Isikhathi 19

•  Nxa Kulombonisi Wesiqinti 20

•  Nxa Kulomhlangano Wesiqinti Kumbe Owesabelo 21

•  Iviki YeSikhumbuzo 22

•  Umbonisi Womhlangano Wempilo Lenkonzo 23

•  Umgcinisihlalo Womhlangano Wempilo Lenkonzo 24

•  Umeluleki 25

•  Iklasi Yesibili 26

•  Amavidiyo 27

1. Iziqondiso ezilapha zizanceda bonke abalezabelo emhlanganweni Wempilo Lenkonzo YamaKhristu. Bonke abalezabelo kumele balandele iziqondiso lezi kanye lalezo ezisenkulumeni abayiphiweyo ezitholakala ku-Gwalo Lomhlangano Wempilo Lenkonzo YamaKhristu. Abamemezeli kumele bakhuthazwe ukubhalisa ukwenza izinkulumo. Abanye abangena imihlangano zikhathi zonke bangaphiwa inkulumo nxa besamukela lokho okufundiswa liBhayibhili futhi belandela elikutshoyo. Umbonisi Womhlangano Wempilo Lenkonzo kumele axoxe laloba ngubani ofisa ukwenza izabelo zabafundi kodwa engakabi ngummemezeli ukuze abone ukuthi sefanele yini. Ingxoxo le kumele bayenze bebathathu lalowo omfundisa iBhayibhili (kumbe umzali onguFakazi nxa kungumntwana). Okumele kuxoxwe ngakho kuyafanana lalokho okusetshenziswa nxa kuxoxwa lomuntu ofuna ukuba ngummemezeli ongakabhabhathizwa.—od isahl. 8 indima 8.

2. 1 umzuzu. Ngemva kwengoma lomthandazo umgcinisihlalo Womhlangano Wempilo Lenkonzo kumele athi fahlafahla ngokuzafundwa mhlalokho. Kumele agxile kulokho okuzalinceda kakhulu ibandla.

 3. Inkulumo: 10 imizuzu. UGwalo Lomhlangano luba lesihloko kanye lemicijo okumele isikhulumi sixoxe ngayo enkulumeni le. Inkulumo le kumele iphiwe umdala kumbe inceku ekhonzayo efaneleyo. Nxa kuqaliswa ibhuku leBhayibhili kuba levidiyo ebukelwayo yokwethula ibhuku lelo. Umzalwane olenkulumo angatsho ukuthi eminye imicijo ekuvidiyo ihambelana njani lenkulumo yakhe kodwa kumele abe leqiniso lokuthi uyayichasisa yonke imicijo eku-Gwalo Lomhlangano. Nxa isikhathi sivuma, kumele asebenzise amapikitsha asenkulumeni yakhe. Ukhululekile ukuxoxa ngeminye imicijo ayithole emabhukwini enhlanganiso nxa isekela indaba okukhulunywa ngayo ngalelolanga.

 4. Ukuchwayisisa IMibhalo: 10 imizuzu. Le yingxenye yemibuzo lezimpendulo futhi owenza ingxenye le akumelanga atsho ukuthi kuzafundwa ngani kumbe aphethe ingxoxo yakhe ngokutsho ukuthi sifundeni. Kumele yenziwe ngumdala loba inceku ekhonzayo efaneleyo futhi kumele ayibuze yomibili imibuzo. Kanti njalo angakhetha ukuthi amavesi abalwe yini loba hatshi. Umuntu ngamunye ophendulayo akumelanga adlulise imizuzwana engu-30 (30 seconds).

 5. Ukubalwa KweBhayibhili: 4 imizuzu. Ingxenye le kumele yenziwe ngumfundi wesilisa. Kumele abale amavesi awaphiweyo njalo inkulumo yakhe akufanelanga ibe lesethulo loba isiphetho. Umgcinisihlalo womhlangano kufanele enze konke okusemandleni akhe ukuze ancedise abafundi ukuthi babale khona kanye okubhaliweyo, babale ngendlela etshengisa ukuthi bayakuzwisisa lokho abakubalayo, babale ngendlela ecacileyo, bagcizelele imicijo eqakathekileyo, batshintshatshintshe ilizwi, bafake amakhoma labongqe ezindaweni zakho futhi babale ngendlela abakhuluma ngayo. Umbonisi Womhlangano Wempilo Lenkonzo kumele abeyazi indlela umfundi ngamunye abala ngayo ukuze abekwazi amavesi angamnika wona ngoba amanye ayabe emanengi ikanti amanye emalutshwane.

6. 15 imizuzu. Ingxenye le yenzelwe ukunceda abamemezeli ukuthi bathuthukise indlela abaqalisa ngayo izingxoxo, abatshumayela ngayo labafundisa ngayo. Abadala labo bavunyelwe ukwenza inkulumo zabafundi. Umfundi ngamunye kumele asebenzele emcijweni othethwe ebhukwaneni elithi Ukubala Lokufundisa kumbe elithi Thanda Abantu. Ku-Gwalo Lomhlangano umcijo wakhona utholakala ezibayeni ezisekucineni kwenkulumo yakhe. Ngezinye izikhathi kuba lengxoxo esekelwe kuvidiyo. Ingxenye le kumele yenziwe ngumdala kumbe inceku ekhonzayo efaneleyo.—Khangela  indima 15 ukuze ubone ukuthi ingxenye lezi zenziwa njani.

 7. Ukuqalisa Ingxoxo: Isabelo lesi singaphiwa umfundi wesilisa kumbe owesifazana. Nxa sinikwe umfundi wesilisa kumele asenze lomunye owesilisa kumbe owesifazana olilunga lemuli yakhe. Nxa sinikwe umfundi wesifazana kumele asenze lomunye owesifazana kumbe owesilisa olilunga lemuli yakhe. Umfundi lomsizi wakhe bangazikhethela ukuthi bafuna ukwenza inkulumo yabo bemile kumbe behlezi.—Ukuze uthole okunengi mayelana lendlela ongayisebenzisa nxa utshumayela kumbe lokho ongakutsho khangela  indima 12 lo- 13.

 8. Ukuphindela: Isabelo lesi singaphiwa umfundi wesilisa kumbe owesifazana. Nxa sinikwe umfundi wesilisa kumele asenze lomunye owesilisa. Nxa sinikwe umfundi wesifazana kumele asenze lomunye owesifazana. (km-ZU 5/97 k. 3) Umfundi lomsizi wakhe bangazikhethela ukuthi bafuna ukwenza inkulumo yabo bemile kumbe behlezi. Umfundi kumele atshengise ukuthi usephindela emuntwini ake waxoxa laye.—Ukuze uthole okunengi mayelana lendlela ongayisebenzisa nxa utshumayela kumbe lokho ongakutsho khangela  indima 12 lo- 13.

 9. Ukwenza Abafundi: Isabelo lesi singaphiwa umfundi wesilisa kumbe owesifazana. Nxa sinikwe umfundi wesilisa kumele asenze lomunye owesilisa. Nxa sinikwe umfundi wesifazana kumele asenze lomunye owesifazana. (km-ZU 5/97 k. 3) Umfundi lomsizi wakhe bangazikhethela ukuthi bafuna ukwenza inkulumo yabo bemile kumbe behlezi. Akulasidingo sokuthi ingxenye le ibe lesethulo loba isiphetho ngaphandle nxa umfundi esebenzela emcijweni okhuluma ngesethulo loba isiphetho. Kumele kube yisifundo seBhayibhili esesivele siphakathi. Akulasidingo sokubala zonke indima eliziphiweyo, kodwa likhululekile ukuzibala nxa isikhathi sivuma.

 10. Ukuchasisa Esikukholwayo: Nxa kuyinkulumo kumele yenziwe ngumfundi wesilisa. Kodwa nxa kuyisiboniso, isabelo lesi singenziwa ngumfundi wesilisa kumbe owesifazana. Nxa sinikwe umfundi wesilisa kumele asenze lomunye owesilisa kumbe owesifazana olilunga lemuli yakhe. Nxa sinikwe umfundi wesifazana kumele asenze lomunye owesifazana kumbe owesilisa olilunga lemuli yakhe. Umfundi kumele asebenzise umthombo wolwazi awuphiweyo ukuze aphendule umbuzo ngendlela ecacileyo futhi akhethe kuhle amabala. Ukhululekile ukutsho ukuthi indaba akhuluma ngayo uyithethe ngaphi.

 11. Inkulumo: Isabelo lesi kumele senziwe ngumfundi wesilisa. Nxa inkulumo le ithethwe kusengezo A sebhukwana elithi Thanda Abantu, umfundi kuyabe kumele atshengise ukuthi amavesi alapho angasetshenziswa njani ekutshumayeleni. Ngokwesibonelo angatsho ukuthi ivesi le ingasetshenziswa nini, ukuthi itshoni lokuthi singayisebenzisa njani ukuze sibonisane lomuntu esiyabe sixoxa laye. Nxa kuyikuthi inkulumo isekelwe emcijweni osebhukwaneni elithi Thanda Abantu, umfundi kumele ancedise abalaleleyo babone ukuthi umcijo lowo usebenza njani ekutshumayeleni. Angasebenzisa isibonelo esitholakala emcijweni wokuqala osesifundweni leso kumbe asebenzise amanye amavesi atholakala lapho.

   12. Ongakukhuluma: Okusendimeni le lakwelandelayo kusebenza engxenyeni ethi “Ukuqalisa Ingxoxo” lethi “Ukuphindela.” Nxa ingxenye le ingelasiqondiso sokuthi kukhulunyweni, umfundi kumele adinge ivesi abona ukuthi izanceda umuntu axoxa laye abesetshiya ebuze umbuzo ozakwenza ukuthi baphinde baxoxe ngesikhathi esizayo. Umfundi kumele axoxe ngendaba engakhanga abantu abasensimini akuyo. Angakhetha ukuthi uzamnika yini okuthile kumbe ambukelise ividiyo etholakala eBhokisini Elilamathuluzi Okufundisa. Kulokuthi abambe intshumayelo ethile ngekhanda, umfundi ukhuthazwa ukuthuthukisa indlela axoxa ngayo labanye ukuze atshengise ukuthi ulendaba labo ngokungagijimeli ukubatshumayeza.

   13. Indlela Ongatshumayela Ngayo: Umfundi kumele atshumayele ngendlela ejayelekileyo ensimini akuyo. Ngokwesibonelo:

1.  (1) Endlini Ngendlu: Umfundi kumele atshumayeze umuntu ngokumlanda mathupha emzini wakhe, ngokumfonela kumbe ngokumbhalela incwadi. Kanti njalo angabe ephindela emuntwini ake waxoxa laye ngesikhathi etshumayela endlini ngendlu.

2.  (2) Ukutshumayela Lapho Kuvela Ithuba: Umfundi ukhangelelwe ukuthi aqalise ingxoxo ezacina imnika ithuba lokuthi atshumayele. Angaxoxa lalabo asebenza labo, afunda labo, omakhelwane, ahlangana labo emoteni zomphakathi, kumbe loba ngaphi ahlangana khona labantu.

3.  (3) Ukutshumayela Obala: Umfundi ukhangelelwe ukuthi atshumayele esebenzisa inqola yamabhuku, atshumayele endaweni yamabhizimusi, emaphakhi kumbe loba ngaphi lapho okutholakala khona abantu.

 14. Ukusebenzisa Amavidiyo Lamabhuku: Nxa kuvuma umfundi angazikhethela ukubukelisa umninimuzi ividiyo kumbe ukumtshiyela okuthile. Nxa ekhethe ukumbukelisa ividiyo kumbe isabelo sakhe sisithi abukelise umuntu ividiyo, kumele ayethule futhi baxoxe ngayo kodwa angayidlali.

15. Ihlandla leli liqalisa ngengoma. Ngemva kwayo kuzakuba lengxenye eyodwa kumbe ezimbili ezizathatha imizuzu engu-15 ezizanceda abalaleleyo ukuthi basebenzise lokho okutshiwo liLizwi likaNkulunkulu. Izingxenye lezi zingenziwa ngabadala kumbe izinceku ezikhonzayo ezifaneleyo, ngaphandle nxa kulezinye iziqondiso. Izidingo zebandla zona zenziwa ngabadala. Nxa kuyingxenye elengxoxo, oyenzayo kumele abuze imibuzo efakiweyo kumbe angezelele eminye azibumbele yona. Isethulo sakhe kumele sibe sifitshane ukuze abe lesikhathi eseneleyo sokuveza imicijo eqakathekileyo lesokubuza imibuzo elapho. Nxa isikhulumi sizaxoxa lomunye ebandleni, kumele abuye eplathifomu nxa kuvuma kulokuthi axoxe laye ehlezi endaweni yakhe.

  16. ISifundo SeBhayibhili Sebandla: 30 imizuzu. Ingxenye le kufanele iphiwe umdala webandla ofaneleyo. (Amabandla alabadala abalutshwana angasebenzisa izinceku ezikhonzayo ezifaneleyo.) Iqula labadala kumele likhethe ukuthi ngobani abafaneleyo abazabe beqhuba iSifundo SeBhayibhili Sebandla. Abakhethiweyo kumele bafundise kuhle, bangadli isikhathi, bagcizelele imibhalo eyisiqokoqela futhi bancede wonke umuntu abone ukuthi lokho okufundwayo kumsiza njani. Abaqhubayo bangathola amacebo amahle ngokuhlola iziqondiso ezibhalelwe labo abenza izingxenye ezilemibuzo lezimpendulo. (w23.04 k. 24, ibhokisi) Nxa imicijo yonke eqakathekileyo isiveziwe esifundweni samhlalokho, akulasidingo sokuthi isifundo siqhubeke kungelani lokuthi isikhathi osiphiweyo sisasele. Nxa izimo zivuma, kungasetshenziswa abazalwane abatshiyeneyo ukuqhuba kanye lokubala izindima iviki ngayinye. Nxa umgcinisihlalo angacela ukuthi isifundo sifitshaniswe, oqhubayo kumele akhethe ukuthi uzasifitshanisa njani mhlawumbe ngokutshela obalayo ukuthi eqe ezinye indima.

17. 3 imizuzu. Umgcinisihlalo Womhlangano Wempilo Lenkonzo uzafinqa imicijo eqakathekileyo efundiweyo abesesithi fahlafahla okuzafundwa ngeviki ezayo. Nxa isikhathi sivuma angaqamba amabizo abafundi abazabe belezabelo ngeviki elandelayo. Ngemva kwalokho kumele enze izaziso kumbe abale izincwadi okumele zibalwe, ngaphandle nxa kulezinye iziqondiso. Izaziso ezijayelekileyo eziphathelane lokuphuma ekutshumayeleni kanye lokuklina iWolu yoMbuso akufanelanga zenziwe kodwa kumele zifakwe ebhodini yezaziso. Nxa isikhathi singavumi ukuthi atsho zonke izaziso aziphiweyo kumbe abale izincwadi, kufanele acele abazalwane abalezinkulumo kuhlandla elithi Impilo YamaKhristu ukuthi bafitshanise ingxenye zabo. (Khangela  indima 16 lo- 19.) Umhlangano kumele uphethe ngengoma lomthandazo.

18. Ngemva kwesabelo somfundi ngamunye, umgcinisihlalo Womhlangano Wempilo Lenkonzo kufanele ancome umfundi kumbe amnike iseluleko esebenzisa umcijo asebenzela kuwo. Nxa umgcinisihlalo esethula umfundi ngamunye akumelanga atsho ukuthi usebenzela kuwuphi umcijo. Kodwa nxa umfundi eseqedile inkulumo futhi esemncomile, usengatsho ukuthi ubesebenzela kuwuphi umcijo. Kanti njalo kufanele atsho lokuthi yikuphi akwenze kuhle emcijweni lowo lokuthi kungaphi lapho adinga ukuthuthukisa khona. Lokhu kumele akwenze ngendlela elomusa. Umgcinisihlalo angakhetha lokukhuluma okunye akunanzeleleyo enkulumeni acabanga ukuthi kunganceda umfundi kumbe ibandla. Ngemva komhlangano kumbe ngesinye nje isikhathi umfundi angaphiwa iseluleko kusetshenziswa ibhukwana elithi Thanda Abantu lelithi Ukubala Lokufundisa kumbe ibhuku elithi iSikole Senkonzo. Iseluleko leso singabe siphathelane lomcijo abecelwe ukuthi asebenzele kuwo kumbe omunye nje umcijo.—Khangela  indima 19,  24 lo- 25 ukuze uthole okunengi ngomsebenzi kamgcinisihlalo Womhlangano Wempilo Lenkonzo kanye lomsebenzi womzalwane ongumeluleki.

19. Zonke inkulumo kumele ziphele ngesikhathi. Umgcinisihlalo laye akumelanga alandise. Akulasidingo sokuthi umuntu olenkulumo asebenzise sonke isikhathi asiphiweyo nxa kuyikuthi imicijo yonke isiveziwe. Nxa ekhona odle isikhathi umgcinisihlalo kumbe umeluleki kumele amnike iseluleko bebodwa. (Khangela  indima 24 lo- 25.) Umhlangano wonke okugoqela izingoma lemithandazo kufanele kuthathe ihola lemizuzu engu-45.

20. Nxa kulombonisi wesiqinti, umhlangano kufanele wenziwe kulandelwa uGwalo Lomhlangano. ISifundo SeBhayibhili Sebandla yiso esingasoze sibe khona. Esikhundleni saso kuzakuba lenkulumo yombonisi wesiqinti ethatha imizuzu engu-30. Umgcinisihlalo engakethuli inkulumo yombonisi wesiqinti, kufanele aqale afinqe okufundiweyo mhlalokho njalo abesesithi fahlafahla ngalokho okuzafundwa ngeviki ezayo. Kanti njalo angatsho izaziso kumbe abale lezincwadi okumele zibalwe abesecina ngokwethula umbonisi wesiqinti. Ngemva kwenkulumo, umbonisi wesiqinti uzaphetha umhlangano ngengoma ayabe ezikhethele yona. Angathandaza kumbe acele omunye umzalwane ukuthi aphethe ngomthandazo. Nxa kulombonisi wesiqinti akumelanga kube lamaklasi amabili. Kodwa iqembu elisebenzisa olunye ulimi lingenza umhlangano ngolimi lwalo lanxa umbonisi wesiqinti evakatshele ibandla. Kumele lihlangane lebandla nxa sekuyinkulumo yombonisi wesiqinti.

21. Ngeviki yomhlangano wesiqinti kumbe owesabelo akusoze kube lemihlangano yebandla. Abafowethu labodadewethu kumele bakhunjuzwe ukuthi lokho okuyabe kuku-Gwalo Lomhlangano ngaleyoviki kufanele bazibalele bebodwa kumbe beyimuli.

22. Nxa iSikhumbuzo sikhona phakathi kweviki, akumelanga kube lemihlangano yebandla yaphakathi kweviki.

23. Umdala okhethwe liqula labadala uzakuba ngumbonisi Womhlangano Wempilo Lenkonzo. Nguye okumele abe leqiniso lokuthi umhlangano lo wenziwa ngendlela ehlelekileyo kulandelwa iziqondiso lezi. Kanti njalo kufanele ahlale exoxisana lomzalwane ongumeluleki. Nxa uGwalo Lomhlangano lungaba khona, umbonisi Womhlangano Wempilo Lenkonzo kufanele ahle enze uhlelo lwezabelo olwenyanga ezimbili. Lokhu kugoqela zonke izabelo zomhlangano waphakathi kweviki, kungaba ngezabafundi kumbe ezingayisizo zabafundi. (Khangela  indima 3 kusiya ku-16 lo- 24.) Nxa esenza izabelo zabafundi kumele acabange ngokuthi umfundi uleminyaka emingaki, ulesikhathi esinganani esenza izinkulumo lokuthi ulenkululeko yokukhuluma ngendaba ayabe eyiphiwe yini. Kumele enze okufananayo nxa enika abazalwane ezinye izingxenye zemihlangano. Labo abelezabelo kumele batshelwe kusasele phose amaviki amathathu. Kumele kusetshenziswe ifomu lezabelo, i-S-89. Umbonisi Womhlangano Wempilo Lenkonzo kumele abe leqiniso lokuthi uhlelo lwezabelo luyafakwa ebhodini yezaziso. Iqula labadala lingakhetha omunye umdala kumbe inceku ekhonzayo ukuthi imncedise. Kodwa nxa kukhethwe inceku ekhonzayo ukuthi incedise kumele ikhethe labo abazakwenza izabelo zabafundi kuphela.

24. Iviki ngayinye umdala oyedwa uzakuba ngumgcinisihlalo Womhlangano Wempilo Lenkonzo. (Nxa kulabadala abalutshwana ebandleni, kungasetshenziswa izinceku ezikhonzayo ezifaneleyo.) Umgcinisihlalo nguye ozakutsho amazwi okuvula umhlangano lawokuphetha futhi uyabe esethula zonke izinkulumo. Nxa ibandla lilabadala abalutshwana, umngcinisihlalo angenza ezinye izabelo ikakhulu ingxenye ezilamavidiyo angelangxoxo. Akumelanga alandise kakhulu nxa esethula izinkulumo kumbe ebonga. Iqula labadala yilo elikhethayo ukuthi yibaphi abadala okumele babe ngabagcinisihlalo. Abadala abakhethiweyo yibo abazabe betshintshana ukuba ngabagcinisihlalo. Kusiya ngezimo zebandla, umbonisi Womhlangano Wempilo Lenkonzo angaba ngumgcinisihlalo izikhathi ezinengi kulabanye abadala. Nxa umdala ekhethwe ukuthi aqhube iSifundo SeBhayibhili Sebandla, angaba ngumgcinisihlalo. Sicela likhumbule ukuthi umdala oba ngumngcinisihlalo ukhangelelwe ukuthi ancome bonke abafundi njalo abaphe iseluleko esizabanceda. Konke lokhu kumele akwenze ngendlela elothando. Umgcinisihlalo kufanele abe leqiniso lokuthi umhlangano uphela ngesikhathi. (Khangela  indima 17 lo- 19.) Nxa kuvuma kungafakwa imayikhi yesibili ezasetshenziswa ngumgcinisihlalo ukwenzela ukuthi nxa esethula inkulumo elandelayo isikhulumi laso sibe sesimi endaweni yaso. Kanti njalo umgcinisihlalo angakhetha ukuhlala esitulweni esiseplathifomu ngesikhathi kusenziwa inkulumo yokubalwa kweBhayibhili lezabelo ezisengxenyeni ethi Zinikele Emsebenzini Wokutshumayela. Lokhu kunganceda ukuthi isikhathi singadliwa.

25. Nxa kusenza, umzalwane ongumeluleki kumele abe ngumdala ofundisa kuhle njalo oselesikhathi eside esenza izinkulumo. Umsebenzi wakhe ngowokweluleka izinceku ezikhonzayo kanye labadala abenza izinkulumo Zomhlangano Wempilo Lenkonzo, ezikazulu wonke, labazalwane ababala izindima labaqhuba iNqabayokulinda loba iSifundo SeBhayibhili Sebandla. (Khangela  indima 19.) Nxa ibandla lilabadala abanengi abafundisa kuhle, bangatshintshana minyaka yonke ukuba ngabeluleki. Kodwa akulasidingo sokuthi umeluleki ahlale eseluleka abazalwane ngazo zonke izikhathi.

26. Nxa kulabamemezeli abanengi ebandleni, kungaba lamanye amaklasi. Iklasi ngayinye kufanele ibe lomeluleki wayo njalo kungaba kuhle ukuthi abe ngumdala. Nxa kulesidingo, inceku ekhonzayo efaneleyo ingakhethwa ukuthi ibe ngumeluleki. Iqula labadala yilo elikhetha umeluleki kanye lokuthi uzabe etshintshana labanye yini. Umeluleki kufanele alandele iziqondiso ezibhalwe  kundima 18. Nxa kuleklasi yesibili, abafundi kufanele bacelwe ukuthi baye kuyo ngemva kwengxenye ethi Ukuchwayisisa iMibhalo. Kufanele baphenduke ngemva kwehlandla elithi Zinikele Emsebenzini Wokutshumayela.

27. Kuzakuba lamavidiyo azabukelwa emhlanganweni lo. Amavidiyo akhona atholakala ku-JW Library® futhi angadawunilodwa kusetshenziswa ezempucuko ezitshiyeneyo.

© 2023 Watch Tower Bible and Tract Society of Pennsylvania

S-38-NBZ 11/23