Kuzake Kube Lokulingana Yini Kwezomnotho?
Emazweni amanengi abantu bayatoyitoya betshengisa ukuthi abayithandi ngitsho indlela ababandlululwa ngayo ezindabeni zomnotho. Umkhuhlane weCOVID-19 wenza izinto zaba zimbi kakhulu ngoba abantu babengasavunyelwa ukuphuma ezindlini, lezinto eziqakathekileyo sezishota njalo lemithi isibiza kakhulu. Lokhu kwawuveza egcekeni umehluko phakathi kwabantu abanothileyo labangabayanga.
Zizake ziphele yini inhlupho zomnotho ezihlasele umhlaba wonke? Ye. IBhayibhili lisitshela lokho uNkulunkulu azakwenza ukuze alungise inhlupho esiphakathi kwazo.
Inhlupho zomnotho ezizalungiswa nguNkulunkulu
Uhlupho: Abantu behlulekile ukwenza ukuthi ezomnotho zincede wonke umuntu.
Indlela uhlupho lolu oluzalungiswa ngayo: UNkulunkulu uzasusa ohulumende babantu afake owakhe obizwa ngokuthi nguMbuso kaNkulunkulu. UMbuso lo uzabusa umhlaba wonke usezulwini.—UDanyeli 2:44; UMathewu 6:10.
Impumela: UMbuso kaNkulunkulu uzaqeda inhlupho zabantu bonke. Abantu abasoze baphinde babe yizigqili zobuyanga loba bathwale nzima ngenxa yezimo zomnotho. (IHubo 9:7-9, 18) Esikhundleni salokho, bazawukholisa umsebenzi wezandla zabo njalo bazaphila impilo ethokozisayo ndawonye lezimuli zabo. IBhayibhili lithembisa ukuthi: “Bazakwakha izindlu bahlale kuzo, balime amasimu amagilebisi badle izithelo zawo. Abasoze bakhe besekuhlala omunye umuntu kumbe balime kudle abanye abantu.”—U-Isaya 65:21, 22.
Uhlupho: Abantu abalawo amandla okuvimba izenzakalo ezibangela ukuhlupheka lokuswela.
Indlela uhlupho lolu oluzalungiswa ngayo: UNkulunkulu uzasebenzisa uMbuso wakhe ukuthi asuse konke okwenza abantu besabe futhi bangahlaliseki.
Impumela: Nxa abantu sebebuswa nguNkulunkulu, kabasoze baphinde behlelwe yizimo ezibangela ukuthi bona lezimuli zabo bahlupheke. Ngokwesibonelo akusoze kuphinde kube lezimpi, ukuswelakala kokudla kanye lemikhuhlane ememethekayo. (IHubo 46:9; 72:16; U-Isaya 33:24) UNkulunkulu uthi: “Abantu bami bazahlala endaweni elokuthula, ezindaweni ezivikelekileyo lasezindaweni zokuphumula ezilokuthula.”—U-Isaya 32:18.
Uhlupho: Abantu bahlezi becindezelwa ngabantu abayizihwaba labagijimisa okufunwa yibo kuphela.
Indlela uhlupho lolu oluzalungiswa ngayo: Abazabuswa nguMbuso kaNkulunkulu bazafunda ukuthanda abanye ngenhliziyo yonke futhi bazaqakathekisa okufunwa ngabanye hatshi okufunwa yibo.—UMathewu 22:37-39.
Impumela: Nxa sekubusa uMbuso kaNkulunkulu, bonke abantu bazakuba lothando olunjengolukaNkulunkulu ‘olungazifuneli okwalo.’ (1 KwabaseKhorinte 13:4, 5) IBhayibhili lithi: “Akukho okuzalimaza loba kudilize kuyo yonke intaba yami engcwele, ngoba emhlabeni kuzagcwala ulwazi olumayelana loJehova a njengamanzi agcwele ulwandle.”—U-Isaya 11:9.
IBhayibhili litshengisa ukuthi siphila ensukwini zokucina futhi lithi sekuseduze ukuthi uNkulunkulu agcwalise isithembiso sakhe sokususa zonke inhlupho ezibangelwa ngezomnotho. b (IHubo 12:5) Okwakhathesi, iBhayibhili lingakunceda ukuthi wenelise ukubekezelela ubunzima ongabe uphakathi kwabo ngenxa yezomnotho. Ngokwesibonelo, bala isihloko esithi “Ungenzani Ukuze Wenelise Ukuphila Ngemali Encane?” lesithi “Umbono Olinganiselayo Ngemali.”
a IBhayibhili lithi ibizo likaNkulunkulu nguJehova.—IHubo 83:18.
b Ukuze ubone ukuthi ungalithemba yini iBhayibhili, bala isihloko esithi “IBhayibhili Libhuku Elileqiniso.”
Nanku Okunye
INQABAYOKULINDA
UMbuso KaNkulunkulu Uzabenzelani Abantu?
UJesu wayekwazi ukuthi uMbuso kaNkulunkulu yiwo kuphela ongenelisa ukulungisa inhlupho zabantu. Kuyini osekwenziwe nguMbuso lo okwenza siwuthembe?
