NgoMgqibelo mhlaka 13 April 2024, i-Iran ihlasele i-Israel. Ngemva kwesenzakalo lesi unobhala jikelele we-United Nations u-António Guterres wathi: “Khathesi sekumele kube lento esiyenzayo ukuze isimo lesi singaqhubeki sisiba sibi. Sekuyisikhathi sokuthi abantu bafunde ukungavuki ngolaka.”

 Izimpi ezisemazweni ase-Middle East zikhona lakwezinye indawo.

 “Kusukela eMpini Yomhlaba Yesibili sekube lezimpi ezinengi kakhulu kumbe iziphithiphithi ezilodlakela ezingakaze zibekhona. Iziphithiphithi lezi ziphambanise impilo zabantu abangu-2 bhiliyoni emhlabeni wonke.”—United Nations Security Council, January 26, 2023.

 Amazwe aleziphithiphithi lezi ahlanganisa i-Israel, iGaza, iSyria, i-Azerbaijan, i-Ukraine, iSudan, i-Ethiopia, iNiger, iMyanmar leHaiti. a

 Kuzaphela nini ukulwa lokhu? Kambe ohulumende bangenelisa yini ukwenza ukuthi kube lokuthula emhlabeni? IBhayibhili lona lithini?

 Izimpi kanye leziphithiphithi ezikhona lamuhla zitshengisa ukuthi sekuseduze ukuthi konke lokhu kuphele. Izimpi lezi zigcwalisa isiphrofetho esiseBhayibhilini esimayelana lesikhathi esiphila kuso esibizwa ngokuthi yisikhathi ‘sokuphela komumo lo wezinto.’—UMathewu 24:3.

•   “Lizakuzwa izimpi lemibiko yezimpi. . . . Isizwe sizavukela isizwe, lombuso uvukele umbuso.”—UMathewu 24:6, 7.

 Bala isihloko esithi “Zibonakala Ngani ‘Izinsuku Zokugcina,’ Noma ‘Isikhathi Sokuphela’?” ukuze ubone ukuthi izimpi ezenzakala lamuhla zisigcwalisa njani isiphrofetho esiseBhayibhilini.

 IBhayibhili lithi zizaphela zonke izimpi kanye leziphithiphithi ezikhona lamuhla. Kodwa kuzakwenzakala njani lokhu? Azisoze ziqedwe ngabantu kodwa zizaqedwa ‘yimpi yosuku olukhulu lukaNkulunkulu uSomandla’ ebizwa ngokuthi yimpi ye-Amagedoni. (ISambulo 16:14, 16) Ngemva kwempi le, uNkulunkulu uzagcwalisa isithembiso sakhe sokuletha ukuthula okungapheliyo emhlabeni okuzakholiswa ngabantu okwesikhathi eside.—IHubo 37:10, 11, 29.

 Ukuze uthole okunengi ngempi uNkulunkulu azaqeda ngayo izimpi ezikhona lamuhla, bala isihloko esithi “Kuyini I-Amagedoni?”