ISIFUNDO 7
Uyini UMbuso KaNkulunkulu?
1. Uyini uMbuso kaNkulunkulu?
Kungani uJesu eyiNkosi engcono kakhulu?—MAKHO 1:40-42.
UMbuso kaNkulunkulu unguhulumende wasezulwini. Uzakhipha bonke abanye ohulumende wona kube yiwo obusayo njalo wenze ukuthi intando kaNkulunkulu yenziwe emhlabeni njengoba isenziwa ezulwini. Kuyizindaba ezinhle ukuthi uNkulunkulu uzasebenzisa uMbuso wakhe ngalindlela. Sekuseduze ukuthi uMbuso kaNkulunkulu usuthise isidingo sabantu sokuba lohulumende omuhle. Uhulumende lo uzakwenza ukuthi bonke abantu emhlabeni bamanyane.—Bala uDanyeli 2:44; uMathewu 6:9, 10; 24:14.
Umbuso kumele ubelenkosi. UJehova wabeka iNdodana yakhe, uJesu Khristu, ukuthi ibe yiNkosi yoMbuso wakhe.—Bala iSambulo 11:15.
Bukela ividiyo ethi Uyini UMbuso KaNkulunkulu?
2. Kungani uJesu eyiNkosi engcono kakhulu?
INdodana kaNkulunkulu iyiNkosi engcono kakhulu ngoba ilomusa njalo ima iqine kulokho okulungileyo. (Mathewu 11:28-30) Ilamandla okusiza abantu ngoba izabusa umhlaba isezulwini. Isivusiwe, yaya ezulwini njalo yahlala esandleni sikaJehova sokunene ilindele ukunikwa ubukhosi. (Hebheru 10:12, 13) UNkulunkulu wacina eyinike amandla okuthi iqalise ukubusa.—Bala uDanyeli 7:13, 14.
3. Ngobani abazabusa loJesu?
Iqembu okuthiwa ‘ngabangcwele’ lizabusa loJesu ezulwini. (Danyeli 7:27) Abangcwele abakhethwa kuqala ngabaphostoli bakaJesu abathembekileyo. UJehova usaqhubeka ekhetha abafazi lamadoda athembekileyo ukuthi babe ngabangcwele. Bavuswa belemizimba yomoya njengoJesu.—Bala uJohane 14:1-3; u-1 Khorinte 15:42-44.
Bangaki abantu abaya ezulwini? UJesu wababiza ngokuthi ‘ngumhlambi omncane.’ (Lukha 12:32) Bazacina bengu-144 000. Bazabusa umhlaba loJesu.—Bala iSambulo 14:1.
4. Kwenzakalani lapho uJesu eqalisa ukubusa?
UMbuso kaNkulunkulu waqalisa ukubusa ngo-1914. * Lapho uJesu eqala ukuba yiNkosi waqalisa ngokuphosa uSathane lamadimoni akhe emhlabeni. USathane wazonda kakhulu, wenza kwaba lenhlupho emhlabeni wonke. (ISambulo 12:7-10, 12) Kusukela lapho, inhlupho zabantu zibe zinengi kakhulu. Izimpi, indlala, imikhuhlane ememethekayo lokuzamazama komhlaba kuyingxenye ‘yesibonakaliso’ sokuthi uMbuso usuzalungisisa izinto emhlabeni.—Bala uLukha 21:7, 10, 11, 31.
5. UMbuso kaNkulunkulu wenzani khathesi njalo uzakwenzani esikhathini esizayo?
UMbuso kaNkulunkulu usumanyanise ixuku elikhulu elivela ezizweni zonke ngomsebenzi wokutshumayela owenziwa emhlabeni wonke. Izigidi zabantu abathobekileyo ziba ngaphansi kokubusa kukaJesu. UMbuso kaNkulunkulu uzabavikela lapho usubhubhisa umumo omubi okhona emhlabeni khathesi. Ngakho labo abafuna ukuthola izibusiso eMbusweni kaNkulunkulu kumele bafunde ukulalela uJesu.—Bala iSambulo 7:9, 14, 16, 17.
Eminyakeni eyinkulungwane, uMbuso uzagcwalisa lokho uNkulunkulu ayekujongile ngabantu ekuqaleni. Umhlaba wonke uzakuba lipharadayisi. Ekucineni, uJesu uzabuyisela uMbuso kuBaba wakhe. (1 Khorinte 15:24-26) Kulomunye yini omaziyo ongathanda ukumtshela ngoMbuso kaNkulunkulu?—Bala iHubo 37:10, 11, 29.
^ indima 6 Ukuze uthole okunengi ngokuthi isiphrofetho seBhayibhili sabikezela njani umnyaka ka-1914, bona amakhasi 217-220 ebhukwini elithi IBhayibhili Lisifundisani?
