Amo. Tejuan tikmatij amo timomakixtiskej san porque titetlapouiaj (Efesios 2:8). ¿Tleka?

 Matikijtokan se tlakatl yolkuali kineki kintliokolis itlaj nochtin akinmej yaskej kanin ye kinmiluis uan ijkuak ye kinmiluis. Tla melauak titlaneltokaj itech nin tlakatl, ¿amo ompa tiyetoskej? Uan amo san tejuan tiaskiaj, noijki tikiluiskiaj tofamilia uan toyolikniuan para noijki uelis kiseliskej itlaj. Pero amikaj kiselis tetliokolil san para okichi ken okijto tlakatl. Amo uelis tikmotlaniliskej tetliokolilmej.

 Noijki iTlaixpantijkauan Jehová tikneltokaj toTajtsin Dios kinmakas yolilistli tlen amo keman tlamis nochtin akinmej kitlakamatij (Romanos 6:23). Uan ken tiknekij oksekimej makiselikan nin tlateochiualistli, timochijchikauaj tikintlapouiaj inkalijtik. Pero tikmatij amo timomakixtiskej san para tikintlapouiskej (Romanos 1:17; 3:28). Amo itlaj uelis tikchiuaskej para tikseliskej nin ueyi tetliokolil tlen kitemaka toTajtsin Dios. Biblia kijtoua: “Otechmakixtiko, amo por tejwah otikchijkeh itla kuali, yej porke Ye satlawel otechiknoma” (Tito 3:5, Itlajtol Totajtsi Dios).