Itech ninmej tonalmej iTlaixpantijkauan Jehová opejkej itlamian siglo XIX. Itech non siglo, sekimej opejkej momachtiaj Biblia ompa Pittsburgh (Pensilvania, Estados Unidos) uan okijtojkej ken momachtiskiaj Biblia. Omomachtijkej uan okitakej tlen otlamachtiayaj oksekimej religiones uan okitakej tlen melauak tlamachtia Biblia. Satepan okitematiltiayaj tlen omomachtiayaj. Okinchijchijkej amochmej, okijkuilouayaj seki tlamachtilmej itech periódicos uan okichijkej se revista tlen axkan moixmati ken Akin Tetlapouijtok. Kitematiltia iTekiuajkayo Jehová.

 Se tlakatl tlen omomachtiaya Biblia inmiuan omotokayotiaya Charles Taze Russell. Maski ye opejki kichiua revista Akin Tetlapouijtok uan otlayekanki mamotetlapoui ika Biblia itech nonmej tonalmej, non amo kijtosneki ye okipeualti se yankuik religión. Russell uan akinmej Momachtiaj Biblia (achto ijkon omotokayotiayaj), okinekiayaj kitematiltiskej tlen melauak itech Jesucristo uan kichiuaskej tlen omoijto itech tlanechikol tlen okatka itech achto siglo. Uan akin okipeualti cristianismo ye Jesús, tikmatij ye akin okipeualti toreligión (Colosenses 1:18-20).