Itech tonal 1, metstli febrero, xiuitl 1943, opejki se tlamachtil tlen miak ipati itech altepetl Nueva York. Axkan nin tlamachtil itoka Tlamachtil ika Biblia tlen kichiua Watchtower itech Galaad. Yokiselijkej nin tlamachtil kanaj ocho mil tlakamej uan siuamej tlen uitsej itech nochi Tlaltikpak.

Jonathan, akin okiseli tlamachtil itech Galaad, okijto: “Tlamachtil tlen onikseli, nochi okiski itech iTlajtol toTajtsin Dios, onechpaleui pampa okachi kuali san kanin nitetlapouis uan san akin niktlapouis”. Uan isiua tlen itoka Marnie, noijki okijto: “Axkan okachi nikneki kinpaleuis tlaltikpaktlakamej ma kajsikamatikan okachi kuali kipiaskej innemilis tla kichiuaj itlanekilis akin oTechchijchi. Melauak nikneltoka tla nikinpaleuia ma kixmatikan Jehová okachi kuali kipiaskej innemilis”.

Nin Tlamachtil itech Galaad uejkaua makuili metstli uan akinmej ompa momachtiaj amo itlaj kitlaxtlauaj. Okachi momachtiaj ika Biblia uan kinpaleuiaj ma kipatioitakan tetlapouilistli. Noijki ika nin tlamachtil kinpaleuiaj ma kichikauakan intlaneltokilis, ma kimatikan ken kinpaleuiskej oksekimej uan ken kipiaskej inyelis ken Cristo pampa kixikoskej ouijkayotl tlen kipiaskej. Itech nin tlamachtil nochtin kuali momachtiaj principios bíblicos tlen kinpaleuis okachi kuali ma mouikakan iuan Jehová.

Nochtin akinmej okiselijkej tlamachtil itech Galaad yomonamiktijkej uan axkan yikimatij ken chikauak kitekichiuiliskej toTajtsin Dios. Ijkuak tlamij momachtiaj, sekimej mokuepaj kanin okatkaj noso kintitlanij itech okse ueyi altepetl. Sekimej kintitlanij itech Kalmej kanin tekitij iTlaixpantijkauan Jehová, katej kanaj noventa itech nochi Tlaltikpak. Uan oksekimej kintitlanij kanin katej sapanoa miakej tlaltikpaktlakamej pampa okachi ma tetlapouikan.

Achto tlamachtil itech Galaad omochi itech kali tlen itoka Hacienda del Reino itech altepetl South Lansing (Nueva York). Pero itech xiuitl 1961, nin tlamachtil opejkej kichiuaj itech Kali kanin kinyekanaj iTlaixpantijkauan Jehová itech altepetl Brooklyn (Nueva York). Uan itech xiuitl 1988 hasta 1995, omochiuaya itech Haciendas Watchtower itech altepetl Wallkill (Nueva York). Pero itech xiuitl 1995, nin tlamachtil opejki mochiua itech Kali kanin kinmachtiaj iTlaixpantijkauan Jehová tlen kajki itech altepetl Patterson (Nueva York). Tlamachtil 134 itech Galaad otlanki itech metstli marzo, xiuitl 2013.

Yikipia setenta xiuitl nochtin akinmej kiseliaj Tlamachtil ika Biblia tlen kichiua Watchtower itech Galaad mochijchikauaj tetlapouiskej ika yolmelajkayotl itech Jehová.