Yiuejkika toTajtsin Dios okinmilui israelitas omonekiaya kitemakaskej diezmo a para uelis kiueyichiuaskiaj. Okinmilui: “Moneki tiktemakas diez porciento [“diezmo”, Nueva Reina-Valera] de nochi xinachtli tlen kitemakas motlal sejse xiuitl” (Deuteronomio 14:22).

 Omonekiaya kitemakaskej diezmo porque ijkon okijtouaya itlanauatil Moisés, ninmej tlanauatilmej toTajtsin Dios okinmakak israelitas. Pero axkan akinmej kichiuaj ken Cristo ayakmo moyekanaj ika nonmej tlanauatilmej, ik non, ayakmo moneki kitemakaskej diezmo (Colosenses 2:13, 14). Axkan akinmej tikchiuaj ken Cristo uelis tiktemakaskej tlen tikpiaj ijkon ken kijtoua Biblia, “xiktemakakah ijkó kemi yononkitlalijkeh itech nomoyolo, amo manomechixkoko nion xiktemakakah ijkuak nomechchijchikawah, porke Dios kitlasojtla akin kitemaka ika pakílistli” (2 Corintios 9:7).

•  Biblia kijtoua okitemakayaj diezmo: “Antiguo Testamento”

•  Biblia kijtoua okitemakayaj diezmo: “Nuevo Testamento”

 Itech Antiguo Testamento miak uelta kijtoua okitemakayaj diezmo uan kijtoua opejki kitemakaj satepan ijkuak okinmakakej itlanauatil Moisés, pero noijki kijtoua sekimej okitemakakej diezmo achto kiseliskiaj nonmej tlanauatilmej.

Ijkuak ayamo okipiayaj itlanauatil Moisés

 Abrán (Abrahán) ye achto tlakatl tlen okitemakak diezmo (Génesis 14:18-20; Hebreos 7:4). Ye okitliokoli noso okimakak diezmo, tekiua uan teopixki Salem. Itech Biblia amo moijtoua Abrahán noso ikoneuan oksepa okitemakakej diezmo.

 Biblia kijtoua Jacob ixui Abrahán, noijki okitemakak diezmo. Jacob okilui toTajtsin Dios tla kiteochiuaskia, ye kimakaskia 10% itech nochi tlamantli tlen ye kiseliskia (Génesis 28:20-22). Sekimej ixtlamatkej kijtouaj, xamo okitemakak diezmo ika yolkamej. Pero maski Jacob okijto kitemakaskia diezmo, amo okichi ifamilia noijki ijkon makichiua.

Ijkuak yokipiayaj itlanauatil Moisés

 Israelitas omonekiaya kitemakaskej diezmo porque ijkon okitlaxtlauayaj seki tlamantli ijkuak okiueyichiuayaj toTajtsin Dios.

•   Diezmo okitekitiltiayaj para kinpaleuiskiaj akinmej san okitekichiuiliayaj toTajtsin Dios uan amo okipiayaj kanin tlatokaskej. Ijkon okinpaleuiayaj levitas uan teopixkej (Números 18:20, 21). Israelitas okinmakayaj diezmo levitas tlen amo okatkaj teopixkej uan yejuan okixelouayaj 10% itech non diezmo uan okinmakayaj teopixkej (Números 18:26-29).

•   Sejse xiuitl noijki omonekiaya kitemakaskej diezmo uan nin okinpaleuiaya levitas uan akinmej amo okatkaj levitas (Deuteronomio 14:22, 23). Israelitas okitekitiltiayaj nin diezmo ijkuak oiluichiuayaj uan yokijtojkaj seki xiuitl noijki kinpaleuiskiaj akinmej amo itlaj okipiayaj (Deuteronomio 14:28, 29; 26:12).

 ¿Ken okimatiayaj kech omonekiaya kitemakaskej? Sejse xiuitl, israelitas okixelouayaj 10% tlen okololouayaj ijkuak otlatokayaj (Levítico 27:30). Tla okitemakayaj diezmo ika tomin omonekiaya kajxitiliskej 20% (Levítico 27:31). Noijki omonekiaya kitemakaskej 10% itech yolkamej tlen okinpiayaj (Levítico 27:32).

 Ijkuak israelitas okitemakayaj diezmo ika se yolkatl, okitlapouayaj corral kanin okatkaj yolkamej uan ijkuak okisayaj okinpouayaj hasta majtlaktli uan non yolkatl okixelouayaj para kitemakaskiaj. Tlanauatil okijtouaya amo uelis kipatlaskiaj noso kitaskiaj kox non yolkatl omokokouaya noso amo. Noijki amo uelis san kitemakaskiaj tomin (Levítico 27:32, 33). Pero diezmo tlen okitemakayaj sejse xiuitl ijkuak oiluichiuayaj, uelis kitlaxtlauaskiaj ika tomin. Nin okinpaleuiayaj israelitas tlen uejka oualayaj para iluichiuaskiaj (Deuteronomio 14:25, 26).

 ¿Keman omonekiaya kitemakaskej diezmo? Israelitas omonekiaya kitemakaskej diezmo sejse xiuitl (Deuteronomio 14:22). Pero ijkuak omoajxitiaya chikome xiuitl amo okitemakayaj, porque non xiuitl amikaj omonekiaya tlatokas (Levítico 25:4, 5). Ijkuak ayamo omoajxitiaya chikome xiuitl, israelitas okitemakayaj diezmo itech xiuitl eyi uan chikuase, ika tlen okitemakayaj okinpaleuiayaj akinmej amitlaj okipiayaj uan levitas (Deuteronomio 14:28, 29).

 ¿Tlen okinchiuiliayaj akinmej amo okitemakayaj diezmo? Itlanauatil Moisés amo okijtouaya itlaj omonekiaya kichiuiliskiaj akin amo okitemakaya diezmo. Porque israelitas okimatiayaj omonekiaya kitemakaskej uan noijki omonekiaya kiluiskej toTajtsin Dios makinteochiua porque okitlaxtlajkej diezmo (Deuteronomio 26:12-15). Akinmej amo okitemakayaj diezmo yetoskia ken okitlachtekiliayaj toTajtsin Dios (Malaquías 3:8, 9).

 ¿Okatka oui kitemakaskiaj diezmo? Amo, tla yejuan kitemakaskiaj diezmo toTajtsin Dios kinteochiuaskia uan amitlaj kinpoloskia (Malaquías 3:10). Ijkuak yejuan amo okitemakayaj diezmo, amo kuali okatkaj porque Jehová amo okinteochiuaya. Noijki levitas uan teopixkej ayakmo okichiuayaj tekitl tlen okipiayaj porque ayakmo okinpaleuiayaj ika diezmo (Nehemías 13:10; Malaquías 3:7).

 Ijkuak nikan okatka Jesús ok okitemakayaj diezmo, pero ijkuak okimiktijkej ayakmo omonekiaya kitemakaskej.

Ijkuak nikan okatka Jesús

 Itech Biblia kanin miakej kixmatij ken Nuevo Testamento, kijtoua ijkuak Jesús nikan okatka israelitas ok okitlaxtlauayaj diezmo. Jesús okimatiaya israelitas omonekiaya kitemakaskej, pero okijto amo kuali tlen okichiuayaj teopixkej porque okinmiluiayaj oksekimej omonekiayaj kitemakaskej diezmo, pero amo okichiuayaj tlen okachi ipati, ik non, okinmilui: “Mach nonkichiwah tlan okachi weyi kijtosneki inawak Dios, kemi xiyeknemikah, xiteiknomatikah iwa xikneltokakah Dios” (Mateo 23:23).

Satepan ijkuak oixpoliuik Jesús

 Satepan ijkuak oixpoliuik Jesús ayakmo omonekiaya kitemakaskej diezmo, porque ayakmo omonekiaya kitlakamatiskej itlanauatil Moisés “kan kijtoa, n tiopixkeh non walewatokeh de Leví makiselikah májtlaktli por siento” (Hebreos 7:5, 18; Efesios 2:13-15; Colosenses 2:13, 14).