ITECH achto siglo akinmej okichiuayaj ken Cristo omochijchikajkej kintlapouiskej miakej tlaltikpaktlakamej itech “kuali tlajtolmej itech Tekiuajkayotl” (Mat. 24:14, TNM). Sekimej oyajkej itech okseki altepemej. Se neskayotl, tlatitlanil Pablo oyaya tetlapouiti itech se altepetl tlen axkan moixmati ken Turquía. * Kanaj dos mil xiuitl satepan, itech 2014 omochi se campaña para tetlapouiskej itech non altepetl. ¿Akin okichi uan tleka?

Itech Turquía katej kanaj 2,800 akinmej tetlapouiaj pero itech non altepetl chantij kanaj 79 millones tlaltikpaktlakamej. Nin kijtosneki se iTlaixpantijka Jehová moneki kintlapouis 28,000 tlaltikpaktlakamej. Ken amo miakej tokniuan, amo nochtin kintlapouiaj. Ika nin campaña, omonekiaya nochtin kintlapouiskej uan amo uejkauaskiaj. Uan kanaj 550 tokniuan tlen tlajtoaj turco tlen ochantiayaj itech okseki altepemej, oyajkej Turquía para kinpaleuiskej tokniuan. ¿Tlen opanok?

Miakej okintlapouijkej. Sekimej tokniuan tlen pouij itech tlanechikol Estambul, okijtojkej: “Ken san kanin otechitayaj tiiTlaixpantijkauan Jehová, otechtlajtlanijkej kox omochijtoka se ueyi nechikol”. Uan noijki sekimej tokniuan tlen chantij itech altepetsintli Izmir, otechtlajkuililijkej: “Se tlakatl, okitlajtlani se tlayekanki: ‘¿Tlen panotok? ¿Okachi nantetlapouiaj?’”. Nin campaña melauak okintlajtlachialti.

Tokniuan tlen oualayaj itech okseki altepemej noijki sapanoa oyolpakej ompa otetlapouitoj. Steffen tlen chanti Dinamarca, okijto: “Nochi tonalmej onikintlapouiaya akinmej amo keman itlaj okikakiayaj itech Jehová. Onikmachili melauak oniktematiltijtoka itoka Jehová”. Se tokni tlen itoka Jean-David tlen chanti Francia, okijto: “Itech se ojtli miak horas otitetlapouiayaj. ¡Sapanoa kualtsin! Miakej amo okinmixmatiayaj iTlaixpantijkauan Jehová. Nochtin akinmej otechtlatlapoliayaj, otechkakiayaj uan otikinmititiayaj se video uan otikinmakayaj se amatlajkuilol”.

 Itech ome semanas, 550 tokniuan okintemakakej kanaj 60,000 amatlajkuilolmej. Ken tikitaj, nin campaña otlapaleui miakej ma kintlapouikan.

Nin campaña okinpaleui tokniuan okachi ma tetlapouikan. Nin campaña okinpaleui tokniuan tlen ompa chantij okachi ma tetlapouikan. Miakej opejkej mokuayejyekoaj okachi kitekichiuiliskej Jehová. Ijkuak otlanki campaña itech Turquía, opanok se xiuitl uan omochijkej 82 precursores.

Tokniuan tlen otetlapouitoj okijtojkej ken okinpaleui ompa otetlapouitoj uan noijki ok okinpaleui ijkuak omokuepkej inmialtepe. Se tokni tlen itoka Şirin tlen chanti Alemania, okijkuilo nin: “Tokniuan tlen inchan Turquía amo oui kintlapouiaj oksekimej. Ne amo ueli ijkon nikchiua porque amo okachi nitlajtoa. Pero axkan ueli nikchiua porque onechpaleuijkej tokniuan tlen otechpaleuikoj, tokniuan tlen katej itech totlanechikol uan noijki onechpaleui nimotlatlaujtis. ¡Hasta onitetlapoui itech metro uan onikintemakak amatsitsintin! Uan axkan okachi nitlajtoa”.

Tokni tlen itoka Johannes tlen chanti Alemania, okijto: “Onimomachti seki tlamantli tlen nechpaleuia ken nitetlapouis. Tokniuan tlen chantij Turquía melauak mochijchikauaj nochtin kintlapouiskej uan san kanin tetlapouiaj. Onikijto ijkon nikchiuas ijkuak nimokuepaskia Alemania. Uan axkan okachi miakej nikintlapouia”.

Se tokni tlen itoka Zeynep tlen chanti Francia, okijto: “Nin campaña tlen onikpixki sapanoa nechpaleuia ijkuak nitetlapouia. Okichi ma niyeto okachi niyolchikauak uan okachi ma nitlaneltoka itech Jehová”.

Tokniuan okimachilijkej okachi san sekan katej. Ken tokniuan motlasojtlaj uan san sekan katej, nin okinpaleui tokniuan tlen oualajkej itech okseki altepemej. Jean-David tlen itech yotimotlapouijkej, okijto: “Tokniuan kuali otechselijkej. Otechselijkej ken tiinyolikniuan, ken inkalchanejkauan uan otechkalotijkej. Ne onikmatiaya otikatkaj ken se kalchanejke itech nochi Tlaltikpak  porque oniktlajtolti itech toamatlajkuiloluan. Pero axkan melauak yonikitak. Nin okichi kuali ma nimomachili niktekichiuilijtok Jehová. Melauak niktlasojkamati nin tlateochiualistli”.

Se tokni tlen itoka Claire tlen chanti Francia, okijto: “Otikatkaj ken san se kalchanejke, maski otiualayaj itech okseki altepemej ken Alemania, Dinamarca, Francia noso Turquía. Nin yetoskia ken toTajtsin Dios okichi ma yeto san se altepetl”.

Se tokni tlen itoka Stéphanie tlen chanti Francia okijto: “Nin campaña otechititi amo techsetilia tlen kichiuaj itech toaltepe nion totlajtol, techsetilia tlasojtlalistli tlen tikpialiaj Jehová”.

Miakej tokniuan tlen otetlapouitoj, omokuayejyekojkej chantitiuij Turquía porque ompa okachi moneki ma tetlapouikan. Miakej yoyajkej itech non altepetl uan melauak tikintlasojkamatiliaj nochi tlen kichiuaj.

Se neskayotl, okatka se grupo tlen okinpiaya san 25 akinmej tetlapouiaj. Uan miak xiuitl san okatka se tlayekanki. Pero itech 2015, otlapaleuitoj chikome tokniuan tlen inchan Alemania uan Países Bajos. ¡Akinmej ompa tetlapouiaj melauak oyolpakej!

¿Ken momachiliaj tokniuan tlen otetlapouitoj Turquía? Okipixkej ouijkayotl pero noijki okipixkej tlateochiualistli. Ma tikitakan tlen kijtoaj sekimej tokniuan:

Se tokni tlen itoka Federico tlen ichan España uan noijki yomonamikti uan kipia kanaj 40 xiuitl, okijto: “Amo nikpias miak tlamantli nechpaleuia amo ma nimotekipachojto uan okachi ma niktemo itech tlen okachi moneki”. ¿Kinyolchikaua oksekimej ijkon ma kichiuakan? Ye kijtoa: “¡Kema! Ijkuak tiauij itech okse altepetl tikinpaleuiaj oksekimej ma kixmatikan Jehová uan melauak tiktlaliaj tonemilis imak Jehová. Uan melauak tikmachiliaj ken techmaluia”.

 Se tokni tlen itoka Rudy tlen ichan Países Bajos uan noijki yomonamikti uan kipia kanaj 60 xiuitl, okijto: “Melauak techpaktia ‘achto tiktekichiuiliskej Jehová’ uan miakej tikintlapouiskej tlen amo keman itlaj okikakiayaj itech Jehová. Uan melauak tiyolpakij ijkuak ikaj kiselia tlen tlamachtia Biblia”.

Se tokni tlen itoka Sascha tlen ichan Alemania uan yikipia 40 xiuitl uan yomonamikti, okijto: “Nochipa ijkuak nio nitetlapouiti, miakej nikinmajsi tlen amo keman itlaj okikakiayaj itech Jehová. Melauak niyolpaki nikinpaleuis ma kixmatikan Jehová”.

Se tokni tlen itoka Atsuko tlen ichan Japón uan kipia kanaj 35 xiuitl, okijto: “Achto oniknekiaya totoka ma uiki Armagedón. Pero ijkuak oniuala Turquía, niktlasojkamatilia Jehová amo yikiualika Armagedón. Axkan okachi nikita ken kineki Jehová ma mochiua seki tlamantli, okachi nikneki itech nimotokis”.

Se tokni tlen itoka Alisa tlen ichan Rusia uan kipia kanaj 30 xiuitl, kijtoa: “Niktekichiuilis Jehová nechpaleuia ma nikita ye melauak yolkuali” (Sal. 34:8). Noijki kijtoa: “Jehová amo san noTajtsin, maski san tlen nechpanos nochipa iuan nimouika uan okachi nikixmati. Melauak niyolpaki, nechpanoa miak tlamantli kualtsin uan Jehová melauak nechteochiua”.

Ika nin campaña tlen omochi itech Turquía, yimiakej okimatkej kuali tlajtolmej itech Tekiuajkayotl. Pero ok titetlapouiskej. Tokniuan tlen oyajkej Turquía nochipa kinmajsij akinmej amo itlaj okikakiayaj itech Jehová. ¿Mitspaktiskia titetlapouiti itech se altepetl ken nin? Tla ijkon, xikilnamiki tlen kijtoa Juan 4:35: “Xiyektlachiakah iwa xikimitakah n tlátookteh, yotlachikawak iwa ya kuali se pixkas”. ¿Uelis titlapaleuis itech se altepetl kanin mota tlatoktli yochikauak uan yiuelis tikpixkas? Tla ijkon, xikita tlen moneki para tikchiuas nin tekitl. Tla okachi titetlapouis “itech nochi n tlaltíkpaktli” tikpias miak tlateochiualistli tlen amo keman timokuayejyekoa tikpias (Hech. 1:8).