Mateo 19:1-30
19 Ijkuak Jesús otlanki okintlapoui, okiski itech altepetl Galilea uan oajsito itempa altepetl Judea, okse lado itempa aueyatl Jordán.
2 Miakej oyajkej iuan Jesús uan ompa okinpajti kokoxkej.
3 Ijkuakon sekimej fariseos okitatoj Jesús porque okinekiayaj kiyejyekoskej uan okitlajtlanijkej: “¿Uelis se tlakatl kikauas isiua por itlaj tlen amo ipati?”.
4 Ye okinnankili: “¿Amo onankitlajtoltijkej toTajtsin Dios okichijchi tlakatl uan siuatl?
5 Noijki ¿amo onankitlajtoltijkej ye okijto: ‘Ikinon tlakatl kikauas ipapa uan imama, yetos iuan isiua uan mochiuaskej san se’?
6 Nin kijtosneki ayakmo yetoskej ome uan mochiuaskej san se. Ikinon nion se tlakatl makixelo tlen toTajtsin Dios yokisetili”.*
7 Fariseos okiluijkej Jesús: “¿Tleka Moisés otlanauati tla se tlakatl kikauas isiua, makimaka se amatl kanin kijtoua kikaua?”.
8 Ye okinnankili: “Moisés onamechkauili xikkauakan namosiua porque nanyoltlakuauakej. Pero amo ijkon opanouaya ijkuak toTajtsin Dios okichijchi achto tlakatl uan achto siuatl.
9 Ne namechiluia, tla se tlakatl kikauas isiua maski isiua amo oauilnenki* uan monamiktis iuan okse siuatl, tlakatl tlajtlakolchiuas porque auilnemis”.*
10 Discípulos okiluijkej: “Tla se tlakatl moneki nochipa yetos iuan isiua, okachi kuali amo mamonamikti”.
11 Jesús okinmilui: “Amo nochtin uelis yetoskej inselti. San akinmej kipiaj non tlateochiuali.
12 Sekimej amo monamiktiaj porque ijkon oneskej.* Oksekimej amo monamiktiaj porque okintekilijkej intlakayo. Pero oksekimej amo monamiktiaj porque kinekij kipaleuiskej Tekiuajkayotl tlen kajki iluikak. Amo mamonamikti akin amo kineki monamiktis”.
13 Ijkuakon Jesús okinuikilijkej sekimej konemej para inpan makintlali imauan* uan inpatka mamotlatlaujti. Pero discípulos okinmajuakej akinmej okinuikilijkej konemej.
14 Jesús okinmilui: “Xikinkauakan konemej nonauak maualakan uan amo xikintsakuilikan. Porque akinmej yolkualmej ken ninmej konemej, inmiaxka Tekiuajkayotl tlen kajki iluikak”.
15 Jesús inpan okintlali imauan uan oyajki.
16 Satepan se telpochtli omotoki inauak Jesús uan okitlajtlani: “Tlamachti, ¿tlen moneki kuali nikchiuas para nochipa niyoltos?”.
17 Ye okilui: “¿Tleka techtlajtlania tlen moneki kuali tikchiuas? Porque onka san se akin yolkuali. Pero tla tikneki nochipa tiyoltos, moneki nochipa tikintlakamatis* itlanauatiluan toTajtsin Dios”.
18 Telpochtli okitlajtlani: “¿Katli tlanauatilmej?”. Jesús okinankili: “Amo xitemikti, amo xiauilnemi,* amo xitlachteki, amo xitlakajkayaua,
19 xiktlakaita mopapa uan momama uan xikintlasojtla oksekimej ijkon ken te timotlasojtla”.
20 Telpochtli okilui: “Nochi non yinikchiua. ¿Tlen okachi moneki nikchiuas?”.
21 Jesús okinankili: “Tla tikneki nochi kuali tikchiuas, xiknemakati tlen tikpia uan tomin xikinmaka akinmej amitlaj kipiaj. Ijkon tikpias itlaj miak ipati ompa iluikak. Satepan nouan xiuiki”.
22 Ijkuak Jesús ijkon okijto, telpochtli sapanoua omoyolkoko uan oyajki porque okipiaya miak tlamantli.
23 Jesús okinmilui idiscípulos: “Ne namechiluia, akin kipia miak tomin oui kitas kalakis itech Tekiuajkayotl tlen kajki iluikak.
24 Oksepa namechiluia, akin kipia miak tomin oui kitas kalakis itech iTekiuajkayo toTajtsin Dios. Okachi amo oui panos se camello ijtik se aguja”.
25 Discípulos omotlajtlachialtijkej ijkuak ijkon okijto Jesús uan okijtojkej: “Tla ijkon, ¿akin uelis momakixtis?”.
26 Jesús okinyekitak uan okinmilui: “Tlakamej amo ueli kichiuaj nin tlamantli, pero toTajtsin Dios nochi ueli kichiua”.
27 Ijkuakon Pedro okilui: “Tejuan otikkajkej nochi tlen otikpiayaj uan mouan otiualajkej. Pero ¿tlen tikseliskej?”.
28 Jesús okinmilui: “Ne namechiluia, ijkuak nochi yankuik yetos uan ijkuak iKone Tlakatl motlalis ipan ueyi itrono, namejuan tlen nouan nankatej, nanmotlaliskej ipan 12 tronos uan nankinmixkomakaskej 12 ifamilias Israel.
29 Porque akin okika ichan, ikniuan, ipapa, imama, ikoneuan noso itlaluan porque omochi nodiscípulo, kiselis 100 veces okachi tlen okika uan satepan nochipa yoltos”.
30 “Pero miakej tlen katej tlayekapan, mokauaskej tlakuitlapan uan miakej tlen katej tlakuitlapan, panoskej tlayekapan”.
Notas
^ Noso “yokisepano”.
^ Ika griego moijtoua pornéia. Xikita diccionario kanin kijtoua auilnemi.
^ Noso “kikajkayauas isiua iuan okse siuatl”.
^ Noso “otlakatkej”.
^ Para makinteochiua.
^ Noso “tikinuelkakis”.
^ Noso “amo xikkajkayaua mosiua iuan okse siuatl”.
