Ijkuak monamiktiaj peua se yankuik kalchanejkej. Maski nochipa tikintlasojtlas uan tikintlakaitas motatajuan, axkan monamik okachi ipati. Uan uelis sekimej mokalchanejkauan amo kinpaktis tlen peuas tikchiuas. Pero principios bíblicos uelis mitspaleuiskej pampa kuali timouikas iuan mokalchanejkauan uan kuali ma yeto monamiktilis.

BIBLIA KIJTOA: “Xiktlakita mopapá iwa xiktlakita momamá” (Efesios 6:2). Nochipa moneki tikintlakaitas motatajuan maski yitikpias miak xiuitl. Pero noijki moneki tikilnamikis monamik noijki kinekis yetos iuan itatajuan. Pampa ‘akin tetlasojtla amo chauati’, amo moneki timokuayejyekos monamik okachi kintlasojtla intatajuan (1 Corintios 13:4, TNM; Gálatas 5:26).

TLEN UELIS TIKCHIUAS:

• Amo keman xikijto: “Mokalchanejkauan nochipa amo kuali tlajtoaj notech” noso “Monantsin amo keman kipaktia tlen nikchiua”

• Ximochijchikaua pampa tikajsikamatis tlen kimachilia monamik

BIBLIA KIJTOA: “Ik non, tlakatl kikauas itata uan inantsin, uan mosetilis iuan isiua, uan moneki mochiuaskej san se tlalnakayotl” (Génesis 2:24). Uelis satepan ijkuak timonamiktis motatajuan kinekiskej mitspaleuiskej uan kinekiskej mokajkalakiskej itech monamiktilis.

Namejuan ome nankijtoskej tlen uelis nankichiuaskej pampa amo okachi ma mokajkalakikan, uan moneki nankinmiluiskej ika tlasojtlalistli. Uelis nankinmiluiskej tlen nanmokuayejyekoaj ika tlakaitalistli (Proverbios 15:1). Pampa okachi kuali uelis timouikas iuan mokalchanejkauan moneki “nochipa ximoiknelikah iwa xitenotsakah, ximosepanyekwikakah”, tla ijkon nankichiuaskej uelis ‘nanmoxikoskej ika tlasojtlalistli’ (Efesios 4:2).

TLEN UELIS TIKCHIUAS:

• Tla mokalchanejkauan mokajkalakiaj itech monamiktilis uan non mitstekipachoa, kuali ximotlapoui iuan monamik pampa nankitaskej tlen uelis nankichiuaskej

• Ximokauakan tlen nankichiuaskej