Itech xiujmej 1999 hasta 2015, itaixpantijkauan Jiova kinchijchiujkej panoua 5,000 Kalmej kampa Mosentiliaj ompa Centroamérica uan México. a Uan monekijok panoua 700 kalmej kampa mosentiliskej se millón itaixpantijkauan Jiova akin ompa nemij uan akin no youij tonechikoluan.

Seki xiujmej achto, tokniuan akin nemij itech nejin altepemej kinouijmakaya kinchijchiuaskej kalmej kampa mosentiliskej. Kemej neskayot, ompa México tel miakej itaixpantijkauan Jiova monechikouayaj ichan aksa. ¿Keyej? Se taman, porin miak xiujmej tanauatilmej tein kiixtalijkej tekiuanij amo kinkauayaj taneltokalismej maj kikouakan talmej. Sayoj ke, kemej itech xiuit 1990 mopatak tanauatil, uan itaixpantijkauan Jiova peujkej kinchijchiuaj miak Kalmej kampa Mosentiliaj. Maski ijkon, kichijchiuaskej se kali kinuikiliaya miak metsti.

Itech xiuit 1999, peuak mochijchiuaj okachi kalmej keman moixtalij se programa; Oloch Tokniuan akin Kichijchiuaj Kalmej kampa tiMosentiliaj peujkej tekitij kampa amo semi onkak tomin, kemej itech altepet México uan okseki chikome altepemej tein pouij Centroamérica. Itech xiuit 2010 uan hasta axkan, sucursal tein moajsi México kiixyekana nochi tekit tein mochiua itech nejon altepemej.

Tokniuan akin kalchijchiuaj kiixnamikij ouijkayomej keman tekitij itech xolalmej kampa ouij se ajsis. Yejua nejon tein kipanokej seki tokniuan akin kalchijchiuaj ompa Panamá, monekik kikuiskej lanchas tein ika yajkej itech ueyiat eyi horas uan ijkon ajsikej kampa kichijchiuaskiaj kali. Uan ompa Chiapas, México, okse Oloch Tokniuan akin Kichijchiuaj Kalmej monekik kitekitiltiskej se avioneta tein ika kiuikakej tein monekia kampa ouij se ajsis.

Miakpa, hasta akin amo itaixpantijkauan Jiova kinekij kiitaskej se yankuik Kali kampa tiMosentiliaj itech ininxolal. Kemej neskayot, se takat akin kayot Honduras kijtoj ke achto ke itaixpantijkauan Jiova kichijchiuaskiaj se kali kampa mosentiliskiaj, miakej ika tajtaniaj nejon tal porin ompa kinekiaj kichijchiuaskej se discoteca. Sayoj ke yejua amo kiuelitaya nejon. Yejua ika, keman itaixpantijkauan Jiova kiluijkej ke yayaj kichijchiuatij se Kali Kampa Mosentiliaj itech nejon xolal, kijtoj: “¡Nejon se tatiochiualis!”.

Itech miak xolalmej, miakej kimoujkaitaj keniuj chikauak tekitij itaixpantijkauan Jiova. Se takat kayot Guatemala kijtoj: “Kampa nikayot, siuamej sayoj tekitij ininkalijtik, sayoj ke keman mochijchiuak Kali kampa nanMosentiliaj tekitikej takamej uan no siuamej. Nikmoujkaita nikitas keniuj siuamej kisajsalouaj teposmej uan kialaxouaj tepamit. Nejon se kitelmoujkaita”. Sekin akin ompakauin nemij, hasta kinkouilianij tein kikuaskej uan tein tayiskej akin tekitij itech nejon kalmej.

Miakej kiuelitaj keniuj chijchiujtokej Kalmej kampa tiMosentiliaj. Itech se xolal ompa Nicaragua kampa mochijchiuak se Kali kampa tiMosentiliaj, se ingeniero kiluij tekiuaj ke nejon kali tel kuakualtsin uan tel kuali tein ika chijchiujtoya. Uan no, kijtoj ke itech nochi xolal amo onkaya okse kali maj okachi kuali chijchiujto.

Tein melauj, itaixpantijkauan Jiova no kiuelitaj kipiaskej se kualtsin kali kampa kiueyichiuaskej Dios. Kiitanij ke akin momachtijtokej Biblia okachi kinekij yaskej nechikolmej keman mochijchiua se yankuik Kali kampa tiMosentiliaj. Akin pouij itech se nechikol ompa altepet México uan tapaleuijkej maj mochijchiua se Kali kampa tiMosentiliaj kijtojkej: “Tiktasojkamatiliaj Jiova nejin tatiochiualis porin tikchijchiujkej se kualtsin kali kampa tikueyichiuaj”.