Semi miak tomin taxtauaj para ininsoldados uan tein ika tateuitij.

•   “Itech xiuit tein tiualpanokej, taxtaujkej 2,2 billones de dólares para ininsoldados uan teposmej tein ika tateuitij. Amo keman ijkon tel miak tomin taxtaujtoyaj” (The Washington Post, 13 de febrero de 2024).

 Amo sayoj taxtauaj tel miak tomin. No kiualkui okse taman. Maj tiknemilikan tein panoua ompa Ucrania.

•   Soldados. Seki taixmatinij kiixejekouaj ke kemej 500,000 soldados momikilianij oso kinkokouanij desde ome xiuit tein uejkauakya neteuilis.

•   Akin amo soldados. Akin tekitij Naciones Unidas kinextiaj ke panoua 28,000 momikilianij akin amo soldados oso kinkokouanij. Uan no, se ueyichiujkej akin poui Naciones Unidas kijtoj: “Tein melauj, amo tikmatijok kanachin momikilianij oso kinkokouanij ompa kampa mochiujtok neteuilis”. a

 Semi tajyouiaj akin nemij kampa mochiua neteuilis itech nochi taltikpak.

•   114 millones. Yejua nejin akin, desde septiembre de 2023, kikaujteujkej ininchan porin mochiujtok neteuilis kampa kayomej.

•   783 millones. Yejua nejin akin semi tepitsin kipiaj tein kimajseuaskej. “Yejua neteuilis tein okachi kichiua maj onka mayan. 70% akin semi tepitsin kipiaj tein kimajseuaskej nemij kampa mochiujtok neteuilis” (Programa Mundial de Alimentos).

 ¿Ajsis tonal keman amo akin kipeualtis neteuilis? ¿Uelis tikchiaskej maj se tonal tiyolseujkanemikan? ¿Ajsis tonal keman amo tatasojtisok, mochiuas tein kitokaskej uan nochin kipiaskej tein kimajseuaskej? ¿Toni kijtoua Biblia?

 Itech Biblia, neteuilis tein mochiuaskia itech miak altepemej, moixnextia ika se caballo uan se akin youi ipanko nejon caballo.

•   “Nikitak ualaya okse caballo, chichiltik kemej tit. Akin ipanko yaya kimakakej tanauatil para kichiuas maj moteuikan uan maj momijmiktikan akin nemij nikan taltikpak, uan kimakakej se ueyi machete” (Apocalipsis 6:4).

 Nejon akin youi ipanko caballo kitojtokaj omen akin no youij ika caballos. Nejon kiixnextia mayan uan akin momikiliaj porin kokolispeuaj oso kinpanoua okseki taman (Apocalipsis 6:5-8). Para tikonmatis keniuj tikmatij ke mochiujtokya nejin tein Biblia kijtojka ke panoskia, xikonlero tamachtilis “¿Toni kiixnextiaj nauin akin youij ipanko caballos?”.

 Amo uejkaua, amo teyi mokuisok para kipeualtiskej neteuilis. ¿Akoni kichiuas maj pano nejon? Amo akin de nikan taltikpak. Biblia kijtoua:

•   Dios “kitamia neteuilismej noyampa taltikpak” (Salmo 46:9).

•   Dios kiyektalis nochi tein amo kuali tein kiualkuini neteuilis. “Kinuachilis nochi ininixayo, uan amo akin momikilisok, nion tayokoyas nion chokas nion tajyouis. Tamikya nochi tein achto techtajyouiltiaya” (Apocalipsis 21:4).

•   Dios kichiuas maj nochin yolseujkanemikan. “Notekitikauan moajsiskej kampa yolseujtoskej, itech kalmej kampa amo moujkayetoskej uan kampa kualtsin moseuiskej” (Isaías 32:18).

 Biblia kijtojka ke mochiuaskia neteuilis uan okseki taman tein mochiujtok axkan. Tikitaskej ke mochiujtokya nejon, kinextia ke amo uejkaua tiyolseujkanemiskej.

 ¿Keniuj kichiuas Dios maj tiyolseujkanemikan? Yejua kiixtalij maj iTaixyekanalis tein moajsi iluikak kichiua maj tiyolseujkanemikan (Mateo 6:10). Para tikonmatis toni nejon iTaixyekanalis uan toni kichiuas para tejuatsin, xikonita nejin video tein amo ueyi: ¿Toni iTekiuajyo Dios?