Keman tikonkaki tajtolmej “ejkotiya ixpoliuilis”, ¿itech toni tiontanemilia? ¿Ke taltikpak ixpoliuis ika talolinilis, se tetsaujkaejekat oso se ueyi neteuilis? Keman tanemiliaj itech nejon sekin momoujtiaj, oksekin amo teyi kinemiliaj uan oksekin mokejkelouaj.

ITajtol Dios senkis kijtoua: “Ejkos tamilis” oso ixpoliuilis (Mateo 24:14, TNM). Itech Biblia ixpoliuilis no moixmati kemej “Armagedón” uan “ne ueyi tonal” tein Dios kiixtalijtok (Apocalipsis [Revelación] 16: 14, 16). Sayoj ke, taneltokalismej tel taman tamachtiaj tein kijtosneki nejon uan moijtoua miak taman tein tamouilil. Sayoj ke, ¿toni kijtosneki ixpoliuilis tein ika tajtoua Biblia? ITajtol Dios kimelaua. Uan amo sayoj nejon, no techpaleuia maj tikajsikamatikan ke ixpoliuilis amo uejkaua ejkos uan technextilia keniuj uelis timomakixtiskej. Maj tikitakan tein kijtoua, ijkon tikmatiskej ox melauak seki taman tein kijtouaj uan tein yekmelauj kijtosneki. Satepan tikitaskej toni yekmelauj ixpoliuis.

1. TALTIKPAK AMO IXPOLIUIS IKA TIT

   Biblia kijtoua: “Yejuatsin kichijchiuak taltikpak kampa ixyetok, nion keman kiajchiuaskej” (Salmo 104:5). Itech nejin tajkuilol uan itech okseki, Biblia techyekiluia ke Dios amo keman kiixpolos taltikpak uan amo keman kikauas maj nion teyi uan nion akin kiixpolo (Eclesiastés 1:4, Isaías 45:18).

2. IXPOLIUILIS IXYETOK KEMANIAN EJKOS

   Maski moajsij akin kinemiliaj ke ixpoliuilis amo ixyetok kemanian ejkos, Biblia kijtoua ke Dios kiixtalijya se tonal keman kiualkuis. Ompa tikixtajtoltiaj: “Amo aken kimatis in tonal [...]. Hasta in ángeles tech in eluiyak, uan Dios Ikonetsin amo no kimati. Ta, sayo Totajtsin Dios kimatok. Ika ya nojon ximoyekpiakan uan xiixpetantokan. [...] Porin amo nankimatij ton tonal” tein ixyetok (Marcos 13:32, 33). Kemej tikitaj, “Totajtsin” Dios kiixtalijya “ton tonal” kiualkuis ixpoliuilis.

3. IXPOLIUILIS AMO KIUALKUIS AKSA NION MOCHIUAS IKA SE UEYI TET TEIN UALEUAS ILUIKAK

   ¿Toni oso akoni kipeualtis ixpoliuilis? Amatajkuilol Apocalipsis tein moajsi itech Biblia, kijtoua: “Nikitak ke ualtatapotok ne eluiyaktsinko uan ompa ualkalankisak se istak caballo. Uan Cristo Jesús Yejuatsin panyetiuits uan yejua nijin itokaytsin: In Yolmelauaktsin porin Yejuatsin kichiuas ijkon keme moyektenkauak ya. [...] Nikitak ke mosentilijke ne ueyi okuilin iuan nochi in tayekanani de nikan taltikpak iuan nochi ninsoldados. [...] Para kiteuiske Yejuatsin ten inpan se caballo panyetiuits uan no kinteuiske nochi nisoldados” (Apocalipsis [Revelación] 19:11-21). Tein melauj, nejin tajkuilol kiixnextia se taman, sayoj ke uelis tikajsikamatiskej nejin: Dios kinualtitanis miak ángeles maj kinixpolokij akin kitauelitaj.

1. IXPOLIUISKEJ TALTIKPAKTEKIUAJYOMEJ

   Biblia kijtoua: “Dios akin nemi iluikak kitalis se tekiuajyot tein amo keman ixpoliuis. Uan nejin tekiuajyot amo panos imako okse xolal. Kikuechos uan kitalis itamilis nochi nejin tekiuajyomej, uan yejua uejkauas  nochipaya” (Daniel 2:44). Kemej tikitakej itech expatika taman tein moneki tikmatiskej ika ixpoliuilis, “tayekanani de nikan taltikpak” mosentiliskej “para kiteuiske Yejuatsin ten inpan se caballo panyetiuits uan no kinteuiske nochi nisoldados” (Apocalipsis 19:19). Sayoj ke iTekiuajyo Dios kinixpolos.

2. TAMIS UEJUEYI NETEUILISMEJ, TATEUILIS UAN TEIKAMAUILTILIS

   Dios ‘kitamis neteuilismej’ semanauak taltikpak (Salmo 46:9). Maj no tikitakan tein kijtoua nejin tajkuilol: “Akin melaujkej nemiskej itech taltikpak, uan akin amo motajtakolmakanij mokauaskej ompa. Sayoj ke akin amo yolkualmej ixpoliuiskej itech taltikpak, uan akin amo yolmelaujkej kinajchiuaskej itech taltikpak” (Proverbios 2:21, 22). Uan itech Apocalipsis no kijtoua ke Dios ‘kiyankuikatalis nochi ten ongak’ (Apocalipsis 21:4, 5).

3. IXPOLIUISKEJ TANELTOKALISMEJ TEIN AMO KICHIUANIJ TEIN DIOS KINEKI UAN KINKAJKAYAUANIJ TALTIKPAKNEMINIJ

   Keman amatajkuilol Jeremías tein moajsi itech Biblia ika tajtoua tayekananij itech taneltokalis akin takajkayauaj, kijtoua: “Tanauatianij kiteixmatiltiaj tein amo melauak; uan tiopixkamej, taixyekanaj ika tanauatil tein yejuan kipiaj. [...] Sayoj ke ¿toni kichiuaskej keman ejkos ixpoliuilis?” (Jeremías 5:31). ¿Toni kinpanos nejin tayekananij itech taneltokalis? Jesús kijtoua: “Kuak ne tonal de tatsakuiltilis ejkos ya, ijkuakon miakke nechiliske ijkuin: ‘Notekotsin, Notekotsin, tejuan tiktanextiliayaj ika in chikaualis de motokaytsin. Uan no ika motokaytsin tikinkalankixtiayaj in amokuali ejekame. Uan ika motokay tikchiuayaj miakke uejueyi mouiskatekit’. Pero ijkuakon Nejuatsin nikinyekkilis ijkuin: ‘Amo keman namechixmatik; niman ximajchiuakan’” (Mateo 7:21-23).

4. IXPOLIUISKEJ AKIN AMO YOLKUALMEJ UAN TEIKAMAUILTIANIJ

   Jesucristo kijtoj: “Ika ya nojon inpan in tagayot uetsikiu ueyi tatsakuiltilis de Dios. Porin kuak Yejuatsin uala nikan taltikpak keme se tanextsin, ijkuakon yejuan in tagayot sayo kuelitakke in tayouayanilot den tajtakol. Uan in tagayot kisekokauke Yejuatsin in yek tanextsin porin yejuan sayo kuelitayaj kichiuaske tachiualisme ten amo kualtia” (Juan 3:19). Ne uejkauj, itech itonaluan Noé, se takat akin kitekitiliaya Dios ika nochi iyolo, yejuatsin kinixpoloj nochin akin amo yolkualmej tein moajsiaj nikan taltikpak. Itech 2 Pedro 3:5-7, Biblia kijtoua: “Uan no tech ne uejkauxiume Totajtsin Dios kinkemiloko uan kinixpoloj nochi in taltikpakuani ika ne tetsaukakiouit. Uan Totajtsin Dios ika ichikaukatanauatil kinchialtijtok in taltikpak uan eluiyak para ne tonal kuak kintamichichinos ya. Uan no tech ne tonal de ueyi tatsakuiltilis, ijkuakon Dios kinixpolos nochi ne taka tamouiskapoloani”.

Ixpoliuilis tein mochiuak itech itonaluan Noé kiixnextia “ne tonal de ueyi tatsakuiltilis” uan ixpoliuilis tein amo uejkaua ejkos. Sayoj ke maj tikelnamikikan ke ne uejkauj, Dios amo kiixpoloj taltikpak, ta “ne taka tamouiskapoloani”, tein kijtosneki, akin kitauelitayaj. No ijkon, keman ejkos “ne tonal de ueyi tatsakuiltilis”, Dios kinixpolos nochin akin amo yolkualmej uan akin kiixpejpenaskej amo kitakamatiskej. Sayoj ke, akin kuali iuan mouika kipaleuis, ijkon kemej kipaleuij Noé uan ichankauan (Mateo 24:37-42).

¡Tel kualtsin tinemiskej keman Dios kiixpolos nochi tein amo kuali tein mochiujtok nikan taltikpak! Tein melauj: ixpoliuilis tein ika tajtoua Biblia yejua se kuali tanauatil tein nochin uelis kinpaleuis. Sayoj ke, xa tejuatsin tionmotajtanijtos ox poliui miak tonalmej keman ejkos ixpoliuilis uan toni uelis tikonchiuas uan ijkon tionmomakixtis. Maj tikitakan tein Biblia tanankilia.