Tinemiaj itech xolal Tellancourt, tein moajsi ompakauin itech altepet Francia. Nopopaj katka kayot Francia uan nomomaj kayot Italia. Keman nikpiaya chikueyi xiuit, timokaltalitoj Italia, itech se xolal kampa onkaya tatasojtilis tein moajsia ompakauin itech altepet Roma uan akin ompa nemiaj katkaj tekitinij. Nokalijtik onkayaj kuejmolmej; notatuan semi motajtolteuiayaj porin tomin amo ajsia.

Keman nikpiaya 15 xiujmej, nomomaj nechiluij maj okachi nikisa porin ijkon nikajsiskia akin iniuan kuali nimouikaskia. Peuak amo semiok nimoajsia nokalijtik uan niman peuak nimouika iniuan akin amo nechpaleuiayaj. Se tonal se takat akin moitaya yolkuali tajtoj nouan. Nikselij droga tein nechmakak, porin niknekia maj nechitakan ke katka niueyi. Niman peuak nikui droga uan niauilnemi. Miakpa noka mauiltijkej. Amo nikitaya keyej monekia niksentokas ninemis; amo nechtekipachouaya nimikis oso ninemis. Senkis nimomachiliaya noselti. Keman nikpiaya 16 xiujmej, niktemoj nimomiktis: nitayik nochi tayil tein teuintij tein kipiaya se botella uan nimopantamotak itech se ueyiat. Eyi tonal amo nitalnamikik.

Peuak nikita nemilis kemej moneki, sayoj ke peuak nitateuia uan nitakajkayaua. Nikiniluiaya taltikpakneminij ke niknekia nimotekas iniuan uan keman niajsia ininchan, nikinmakaya droga uan nikinichtekiliaya nochi tein kipiayaj tein patiyoj. Tanamakanij ika droga akin katkaj tamouililmej nechiluiayaj maj nikxejxelouani droga itech altepet Italia. Miakpa nikpiaya kuejmolmej iuan policía. Maski nonemilis senkis amo katka kualtsin, nikneltokaya ke moajsia se taman keyej ninemia. Yejua ika, niktataujtij Dios: “Sayoj nimitstajtania se xiuit maj niyolpakto uan maj niyolseujto”.

Keman nikpiaya 24 xiujmej nikixtalij nimokaltalitiuj Inglaterra. Ueliskia nikpolos nonemilis porin sekin akin kinamakayaj droga kinekiaj nechmiktiskej. Achto ke niyaskia, nikalpanoto nomomaj uan nikmoujkaitak nikitas ke Annunziato Lugarà kinojnotstoya ika Biblia. * Nikmatia ke achto katka tachtekkej, yejua ika nikmoujkaitak uan niktajtanij toni kichiuaya ompa. Nechtapouij tein monekik kipatas itech inemilis  tein kipaleuij maj mochiua itaixpantijkauj Jiova uan kichiuak maj nimotenkaua ke nikintemoskia itaixpantijkauan Jiova keman niajsiskia Inglaterra. Maski nikijtoj ke ijkon nikchiuaskia, keman niajsik ompa niksentokak nikchiua tein ipa nikchiujtoya.

Se tonal nikitak se itaixpantijkauj Jiova kitemakatoya amaix Tanejmachtijkej uan ¡Despertad! itech se ojti kampa tel miakej panouaj itech xolal Londres. Ompa nikelnamikik tein nimotenkauak nikchiuas uan niktajtanij ox ueliskia nechmachtis ika Biblia.

Tein nimomachtij ajsik itech noyolo. Kemej neskayot, nechyololinij tein kijtoua 1 Juan 1:9 kemej tamati toTajtsin Dios: “Komo timoteluiliaj ika ne totajtakoluan iuan Dios, ijkuakon Yejuatsin techtapojpoluis den totajtakoluan uan techchipautinemis de nochi pitsotik ten tikpiaj”. Nejon tajkuilol kipatak nonemilis, nikmachiliaya ke amo nichipauak porin nikchiujka miak taman tein amo kuali. Niman peuak niyouj nechikolmej itech Kali kampa Mosentiliaj iTaixpantijkauan Jiova, kampa nechselijkej ika miak pakilis. Keman nikitak ke kuali mouikayaj uan keniuj motasojtayaj, se taman tein nochipa niktemouaya, niknekik nipouis itech nejon nechikol tein mouikayaj kemej kalyetouanij.

Amo nechouijmakak nikauas droga uan auilnemilis; tein kemaj ouij nechkisak nikpatas kemej nitamatia. Nikitak ke monekia okachi nikinpoujkaitas uan nikinpaleuis oksekin. Tein melauj, niksentoka nimochikaua nimokixtilis seki taman tein amo kuali tein niknextia. Sayoj ke ika itatiochiualis Jiova, nikchiuani. Itech xiuit 1997, chikuasen metsti satepan ke nipeuak nimomachtia Biblia, nimoauij uan nimochiuak itaixpantijkauj Jiova.

Satepan ke nimoauij, nimonamiktij iuan se ichpoch akin itokay Barbara, akin no yekin mochiujka itaixpantijkauj Jiova. Semej akin kuali iuan nimouikaya peuak momachtij Biblia keman kiitak nochi taman tein nikpatak itech nonemilis. Axkan, yejua uan iikniuj siuat no itaixpantijkauan Jiova. Uan no ijkon kichiuak iikniuj noueyinan; akin kipiaya panoua 80 xiujmej keman peuak momachtij Biblia uan satepan moauij.

Axkan nitekititok kemej tayekankej itech se nechikol, nonamik uan nejua tipanouaj miak tonalmej tikteixmatiltiaj iTajtol Dios akin tajtouaj italiano ompa itech xolal Londres. Kemansa nimotayokoltia keman nikelnamiki kemej ninemia achto, sayoj ke Barbara nochipa nechyolchikaua. Axkan nikpiaya tein semi niknekia: kuali nimouikas iniuan nokalyetouanij uan no se tePopaj akin semi nechtasojta. Niktajtanij Dios se xiuit maj niyolpakto uan maj niyolseujto, sayoj ke nechmakani okachi.