YOMARA, Marcelo uan Hiver, yejuan eyi iknimej akin amo ueli tachiaj uan nemij itech se xolal ompa Guatemala. Yomara peuak momachtia Biblia iniuan itaixpantijkauan Jehová, satepan iikniuan no peuak momachtiaj. Sayoj ke amo ueliaj taixtajtoltiayaj ika braille. Yejua ika, tokniuj akin kinmachtiaya kinixtajtoltiliaya párrafos uan textos itech Biblia.

No ouij kinkisaya yaskej nechikolmej. Tein amo semi uejka kampa mosentiliayaj tokniuan, yetoya kemej 40 minutos uan yejuan amo ueliaj yayaj ininselti. Yejua ika tokniuan mopapatayaj para kinuikaskej. Uan keman peuak kitemakaj tamachtilis itech nechikol itajkotiampa semana, tokniuan kinpaleuiayaj maj uelinij kielnamikinij tein kijtoskiaj maski amo tachiayaj.

Itech metsti mayo xiuit 2019, itaixpantijkauan Jehová peujkej monechikouaj itech xolal kampa yejuan nemiaj, se tokniuj iuan isiuatsin akin katkaj precursores regulares ompa nemitoj. Yejuan kiixtalijkej kinpaleuiskej nejin eyi iknimej maj taixtajtoltikan uan maj tajkuilokan ika braille maski amo no kimatiaj keniuj kichiuaskej. Yejua ika kitemotoj amaixmej itech se biblioteca kampa kijtoua keniuj se kikuis braille para kimatiskiaj keniuj tamachtiskej.

Keman panokej seki metsti, yejuan ueliaj taixtajtoltiayajya ika braille uan nejon kinpaleuij maj okachi kuali mouikanij iuan Jehová. a Axkan Yomara, Marcelo uan Hiver tekititokej kemej precursores regulares, uan Marcelo semej tapaleuijkej itech nechikol. Semi kitekitilijtokej Jehová nochi semanas uan nejon kichiua maj okseki tokniuan no semi kitekitilikan Jehová.

Nejin eyi iknimej semi motasojkamatij porin tokniuan kintasojtaj uan kintelpaleuiaj. Yomara kijtoua: “Tokniuan technextilianij ke semi techtasojtaj desde ke tikinixmatkej”. Marcelo no kijtoua: “Itech tonechikol tikinpiaj totasojikniuan akin techpaleuiaj uan tipouij iniuan tokniuan itech nochi taltikpak akin semi motasojtaj”. Yomara uan iikniuan semi kinekij kiitaskej keman nochi taltikpak yeski se xochital (Sal. 37:10, 11; Is. 35:5).