KOMO seki xiujmej achto tionyaskia Sangir Besar (Indonesia), se taltsin tein youaliujtok ika ueyiat, xa tikonitaskia eyi tokniuan siuamej akin yetokej atentenoj. Maski axkan kinixmatij porin kinpaleuiaj oksekin maj kiajsikamatikan Biblia, yejuan kichiuayaj okse taman tekit keman ompa yetoyaj. ¿Toni kichiuayaj?

Yekinika, kalakiaj itech mar para kitemoskej temej tein uejueykej yeskiaj kemej pelotas de fútbol, uan kinmamayaj hasta atentenoj. Satepan, motaliayaj itech se silla de kouit uan ika se martillo kintajtapanayaj temej hasta maj mochiuakan okachi tsikitsitsin ke se piotet. Satepan, kitemayaj itech se bote uan monekia pankisaskej itech escalones para kisasakaskej hasta ininchan. Kisentilijtiayaj itech uejueyi koxtalmej, uan seki uejueyi carros kinuikayaj nejon koxtalmej. Ika nejon temej kinchijchiuayaj carreteras.

Semej nejon tokniuan monotsa Hulda. Yejua uelia okachi tekitia ke oksekin. Tomin tein ika kitaxtauiayaj uelia ika kinpaleuiaya ichankauan. Sayoj ke no kinekia kikuis nejon tomin para mokouilis teisa: kinekia se tableta para uelis kiitas JW Library^®. Hulda kimatia ke videos uan nochi tein moajsi itech nejon aplicación semi kipaleuiskia maj okachi kuali tanojnotsa uan maj okachi kuali kiajsikamati Biblia.

Itech se metsti uan tajko, Hulda mojmostaj kualkan tekitik ojome hora. Ika tet tein kitajtapanak, kipexontij se carro tein amo semi ueyi. Uan kiajxitij tomin para mokouilis se tableta.

Hulda kijtoj: “Maski semi nisiouik uan nimoxojxokolij porin nitetapanaya, niman nikelkauak keman nimokouilijkaya no tableta uan uelia nikuia para nitanojnotsas uan okachi kuali nimomachtis tein tikitaskiaj itech nechikolmej”. No kijtoj ke semi kikuik itableta keman peuak momoyaua kokolis COVID-19, porin uelia ika kikakia nochi nechikolmej uan uelia tanojnotsaya. ¡Semi tiyolpakij maj Hulda uelini kipiani tein kinekia!