Ipan altepetl Australia, kej ipan sekinok altepemej, momiakilijtiauij maseualmej katli ya ueuejtixtokej. Sekij itstokej ipan se kali kampa kuali kinmokuitlauiaj uan kinmakaj tlen ika mopanoltisej.

Maske katli itstokej nopona kinmokuitlauiaj uan kinmakaj tlen ika mopanoltisej, kemantika sekij kuesiuij, momachiliaj ininseltsitsij uan moiljuiaj kintlauelkajtokej. Sejse semana ipan Portland, se altepetl tlen estado Victoria (Australia), Jehová itlajtoltemakauaj yauij ipan ome kali kampa itstokej katli ueuejtixtokej, kinyolchikauaj uan kiniljuiaj kuali itstosej teipa.

Jehová itlajtoltemakauaj katli nopona itstokej mosentiliaj ininuaya se keskij katli ya ueuejtixtokej uan kinpouiliaj se keski tlamachtili tlen uala ipan Biblia, kej tlen kichijki Jesús kema itstoya ipan Tlaltipaktli. Jason, se Jehová itlajtoltemajka, kiijtoua: “Tijpouaj se tlamachtili tlen eltok ipan Biblia ininuaya katli ya ueuejtixtokej uan teipa sansejko tikixtomaj tlen techmachtia”. Miakej tlen kitlakakiliaj tlen Biblia kiijtoua mokokouaj, yeka Jehová itlajtoltemakauaj kinyolchikauaj uan kiniljuiaj ma motemachikaj toTeotsij nechka kichiuas ayokmo ma onka kokolistli yon mikilistli.

Seyok Jehová itlajtoltemajka katli itoka Tony, kiijtoua: “Maske achtoui san tikinpaxalouayayaj tlajko hora, inijuantij kinekiyayaj ma tiuejkauakaj. Yeka, maske se tlen inijuantij techiljuik ma tiuejkauakaj ome horas, nama tikinkamanaljuiaj se hora”. Sekij katli ya ueuejtixtokej amo tlachiaj, amo uelij meuaj tlen inintlapech o amo uelij kitlalanaj se tlamantli, yeka kema Jehová itlajtoltemakauaj mokamanaljuiaj ininuaya, kinpaleuiaj uan kiniljuiaj ma kiijtokaj tlen kikuamachiliaj kema kinpouiliaj tlen Biblia.

Kema kinpaxalouaj, Jehová itlajtoltemakauaj uan katli nopona itstokej uikaj uikalistli tlen ika kiueyichiuaj toTeotsij. Katli ya ueuejtixtokej kinpaktiaj uikasej. John, a se tlakatl katli itstok ipan se tlen nopa kali kampa kinmokuitlauiaj katli ya ueuejtixtokej, kiijtok: “Techpaktia nopa uikalistli. Techpaleuia tijkuamachilisej tlen timomachtiaj uan tijtlepanitasej toTeotsij”. Judith, se siuatl katli ya ueuejtixtok uan amo tlachia, kitsontekotlalijtok se keski uikatl tlen tlauel kipaktia.

Jehová itlajtoltemakauaj nojkia kintekipachoua tlen kinpano katli ya ueuejtixtokej. Brian, se katli kinpaxaloua katli ya ueuejtixtokej, kiijtoua tlaj se akajya mokokoua, kipaxalouaj kampa kochi. Ya kiijtoua: “Timokamanaljuiaj ininuaya uan tikintlajtlaniaj kenijkatsa momachiliaj. Kemantika, titlakuepiliaj seyok tonali pampa tijnekij tijmatisej kenijkatsa itstokej”.

Katli ya ueuejtixtokej tlauel yolpakij pampa tikinpaxalouaj. Peter, katli yaui kampa mokamanaljuiaj sejse semana, kiijtoua: “¡Nelia tlauel nijneki xiualakaj!”. Judith kiniljuia katli kimokuitlauiaj: “¡Nama miércoles! Nijneki kuali nimokualchijchijtos pampa nijneki nias kampa timomachtiaj Biblia. Amo nijneki niasiti tiotlak”.

Katli ya ueuejtixtokej tlauel kinpaktia tlen momachtiaj uan nopa kinpaleuijtok ma monechkauikaj ika toTeotsij. Kema tlankej momachtiaj se tlamachtili tlen Jesús, Robert kiijtok: “Amo kema nijkuamachilijtoya ni tlapoualistli tlen Biblia. Nama kena nijkuamachilia”. David momachtik tlauel ipati momaijtos. Ya kiijtok: “Nechpaleuijtok nimouampojchiuas iuaya toTeotsij uan nikitas kej se akajya katli nelia itstok”.

Kimatisej Biblia kiijtoua teipa kuali tiitstosej, kinyolchikaua katli ya ueuejtixtokej. Lynette, katli itstok ipan se tlen nopa kali kampa kinmokuitlauiaj katli ueuejtixtokej, kiniljuik Jehová itlajtoltemakauaj: “Tlaskamati pampa intechyolchikajtokej ika Biblia”. Seyok siuatl kiijtok: “ToTeotsij inmechtitlantok”.

Margaret tlauel kipaktiyaya kema kipaxalouayayaj, yeka nama mosentilia ininuaya Jehová itlajtoltemakauaj. Kichiua ueyi kampeka pampa mokokoua uan axkuali nejnemi. Ya kiniljuik Jehová itlajtoltemakauaj: “Inmojuantij intechpaleuijtokej nojua ma tijnekikaj tiyoltosej”.

Katli tekitij ipan nopa kali kampa kinmokuitlauiaj tlen ueuejtixtokej nojkia tlauel kipatiitaj pampa Jehová itlajtoltemakauaj kinpaxalouaj. Anna, se Jehová itlajtoltemajka, kiijtoua: “Katli nopona tekitij kintlaneuij sekinok ma yakaj kampa mokamanaljuiaj ika Biblia pampa kiitaj teipa tlauel yolpakij”. Brian, kiijtoua: “Katli nopona tlatekipanouaj tlauel teiknelia uan tepaleuiaj. Kichiuaj kampeka tlapaleuisej”.

Ininchampoyouaj katli ya ueuejtixtokej tlauel yolpakij pampa kiitaj ininchampoyouaj kinpaktia ma kinmachtikaj. Se siuatl iichpoka kintlaskamatilik Jehová itlajtoltemakauaj uan kiniljuik: “Nelia tlauel kuali tlen inkichiuaj pampa inkinpaleuiaj nonana”.