Itlamia metstli noviembre, xiuitl 2016, tlauel tlaauetski ika norte tlen Italia, uan ipan se keski pilaltepetsitsij tlen mokaua ika sur tlen nopa altepetl Moncalieri, tlauel tlaatemik. Ipan se keski pilaltepetsitsij nopa atl kiasik kipano tlajko metro. Se periódico kiijtok: “Amo tleno kitsakuilik nopa atl”. Tekichiuanij nimantsi kinkixtijkej se 1,500 maseualmej, uan pampa nimantsi kinpaleuijkej, amo aka mijki. Maske kiampa kichijkej, miakej kipolojkej se keski tlamantli tlen kipixtoyaj.

Jehová itlajtoltemakauaj katli nopaya euaj, mokualchijchijkej uan nimantsi nojkia pejkej tlapaleuiaj. Ika palas kikixtijkej sokitl uan tlasoli tlen eltoya ipan ininchaj maseualmej, nojkia kikixtijkej muebles uan sekinok tlamantli tlen nojua ueliskia kitekiuisej. Se keskij toikniuaj kinuikiliyayaj sekinok toikniuaj tlakualistli uan sekinok tlamantli, maske kitsaktoyaj nopa ojtli kampa panoskiaj, nopa tekichiuanij kinkauilijkej ma panokaj uan kiampa asitoj kampa yauiyayaj. Jehová itlajtoltemakauaj amo san kinpaleuijkej sekinok Jehová itlajtoltemakauaj, nojkia kinpaleuijkej ininkalnechkauaj katli itstokej ipan sekinok religiones.

Ipan nopa sótanos tlen se edificio kampa onka apartamentos kalajki miak atl. Kema nopa servicios de rescate kitlamikixtijkej nopa atl ika se bomba, miakej Jehová itlajtoltemakauaj kipaleuijkej Antonio, se Jehová itlajtoltemajka, uan ichampoyouaj kema kipajpajkej ininsótano. Teipa, Jehová itlajtoltemakauaj kinpaleuijkej sekinok maseualmej katli itstokej ipan nopa edificio. Motekpankej uan tlapajpajkej ipan nochi nopa sótanos san ipan se keski horas. Nochi nopa maseualmej kintlaskamatiliyayaj. Viviana, se katli kipaleuijkej, kinechkauito isiua Antonio uan mochokiliyaya kema kiiljuik: “Nimitstlajtlania, xikintlaskamatili moikniuaj. ¡Amo aka kej inmojuantij!”.

Ipan se pilaltepetsi kampa nopa atl tlauel tlasosolok, nopa maseualmej kiitakej kenijkatsa Jehová itlajtoltemakauaj kinpaleuiyayaj katli kintlasosoljuilik nopa atl. Tlauel kinyololinik tlen kiitakej, yeka sekij nojkia pejkej kinpaleuiaj Jehová itlajtoltemakauaj uan kichijtiajkej kej ininjuantij kiniljuiyayaj.

Ipan ichaj se tlakatl tlauel tlasosolok nopa atl, uan kampa kiajokui icarro sokitemik. Nopa tlakatl tlauel mosentlachilik kema kinitak kenijkatsa chikueyij Jehová itlajtoltemakauaj tlapajpajkej naui horas kampa kiajokui icarro, uan amo mosiyajkajkej. Kinnajnauajki se keskij katli kipaleuijkej uan ipan redes sociales kintlaskamatilik “pampa nelia tlauel kipaleuijkej”.

Se Jehová itlajtoltemajka kiijtoua: “Tikinpaleuijkej miakej tokalnechkauaj katli amo Jehová itlajtoltemakauaj, miakej tlen inijuantij kipixtokej kipano 80 xiuitl. Sekij chokayayaj kema techtlaskamatiliyayaj nochi tlen tijchijtoyaj”. Se tlakatl katli eli católico uan tlauel tekiti ipan itiopa techtlaskamatilik pampa tijpaleuijkej, uan kiijtok: “Nelia yejyektsi nikitak kenijkatsa timopaleuiyayaj se ika seyok maske amo sanse titlaneltokaj”. Seyok tlakatl kiijtok: “Nechyolkokoua pampa miakej maseualmej san kinixmatij kej katli kalnemij domingos ika ijnalok uan amo kiijtouaj kenijkatsa tlauel tepaleuiaj”.