Jehová itlajtoltemakauaj kitekiuiaj miak Biblias kema momachtiaj. Maske kitekiuiaj miak Biblias, tlauel kipatiitaj nopa Traducción del Nuevo Mundo de las Santas Escrituras, tlen kichijtokej ipan miak tlajtoli. ¿Kenke tlauel kipatiitaj? Pampa kitekiuia toTeotsij itoka, xitlauak kitlajtolkueptokej uan amo ouij se kikuamachilia.

•   Kitekiuia toTeotsij itoka. Amo nochi katli kitlajtolkuepaj Biblia kiueyichiuaj toTeotsij, katli kichijki ma moijkuilo Biblia. Ipan se Biblia nesi inintoka kipano setenta maseualmej katli kitlajtolkuepkej, uan amo kema nesi toTeotsij itoka: Jehová.

   Ipan Traducción del Nuevo Mundo kena ijkuilijtok toTeotsij itoka kampa kinamiki nesis kej uejkajkia kiijkuilojkej, uan amo nesi inintoka katli kitlajtolkuepkej.

•   Xitlauak kitlajtolkueptokej. Sekij Biblias amo xitlauak tlen kiijtoua pampa amo kitlajtolkuepkej kej kiijkuilojkej Biblia. Sekij kej ni kitlajtolkueptokej Mateo 27:40: “Intla ta tiIkone toTeko, xitemo ipan nopa kuamapeli”. Maske kiampa kitlajtolkuepkej, kema pejkej kiijkuilouaj Biblia kitekiuijkej nopa tlajtoli “kuauitl”. Katli kitlajtolkuepkej Biblia kipatlakej ika tlajtoli “kuamapeli” pampa moiljuiyayaj Jesús mijki ipan se kuamapeli. Biblia amo tlamachtia ni, yeka ipan Traducción del Nuevo Mundo xitlauak kiijtoua: “Tlaj nelia tiIkone toTeotsij, ¡xitemo tlen nopa kuauitl tlen ika mitstlaijiyouiltiaj!”.

•   Amo ouij se kikuamachilia. Kema kitlajtolkuepaj se amatlajkuiloli amo san moneki xitlauak kitlajtolkuepasej, nojkia moneki amo ouij se kikuamachilis. Xikita kenijkatsa kitlajtolkueptokej sekij Mateo 5:3: “Xipakikaj inmojuantij tlen inmoiknonekij iixtla toTeko, uan inkimatij inteikneltsitsij”. Ni ouij se kikuamachilia pampa amo xitlauak kitlajkueptokej, yeka nopa Traducción del Nuevo Mundo kitlajtolkuepki kej: “Pakij katli kimatij moneki momachtisej toTeotsij iTlajtol”.

 Nopa Traducción del Nuevo Mundo tlauel kuali pampa kiueyichiua toTeotsij itoka, xitlauak tlen kiijtoua uan amo ouij se kikuamachilia, uan nojkia tlauel pankisa pampa amo tijnamakaj. Kej nopa miakej maseualmej uelij kipouaj Biblia ipan inintlajtol maske amo kipiaj tomij tlen ika kikouasej.