Ipan xiuitl 1870 pejki kinixmatij Jehová itlajtoltemakauaj. Ipan nopa xiuitl, se keskij maseualmej katli momachtiyayaj Biblia ne Pittsburgh (Pensilvania, Estados Unidos) kipeualtijkej momachtiaj sejse tlamachtili tlen uala ipan Biblia. Kinejkej kimatisej tlaj katli tlamachtiyayaj ipan religiones nelia ya nopa tlamachtia Biblia. Teipa pejkej tlajtolmoyauaj, kichijkej amochtli, kiijkuilojkej tlamachtili ipan periódicos uan pejkej kichiuaj se pilamochtsi tlen nama tikixmatij kej Tlen Tematiltia tlen Jehová iTlanauatijkayo.

 Se tlakatl katli momachtiyaya Biblia motokaxtik Charles Taze Russell. Maske yaya kiijkuilok nopa achtoui pilamochtsi Tlen Tematiltia uan yaya tlayakanayaya ipan nopa tonali, amo kiijtosneki yaya kipeualtik ni religión. Russell uan sekinok Katli momachtiyayaj Biblia (uejkajkia kiampa motokaxtiyayaj) kinekiyayaj tematiltisej tlen Jesús tlamachtik uan kichiuasej kej nopa achtoui Cristo itokilijkauaj. Uan pampa Jesús yaya kipeualtik tlen tijneltokaj, tijmatij yaya techyakana uan yaya kichijtok ma tiitstokaj ipan ni religión (Colosenses 1:18-20).