Tlaj se maseuali kineki momakuepas, uajka amo kichiuas tlen Biblia kiijtoua: “Axkema xikijto: ‘Keja yajaya nechchijki, na nojkia nijchiuilis. Nijkuepilis ika nochi tlen fiero nechchiuilijtok’ ” (Proverbios 24:29). Tlen Biblia kiijtoua kinpaleuijtok miakej maseualmej amo ma momakuepakaj.

Ipan ni tlamachtili tikitasej:

•  ¿Tlauel amo kuali tlaj timomakuepasej?

•  ¿Tlake kichiua toTeotsij kema kintlatsakuiltia katli kichiuaj tlen amo kuali?

•  ¿Tlake mitspaleuis amo timomakuepas?

•  Tlen sekinok kineltokaj kema se akajya kineki momakuepas

 Kema se akajya techyolkokoua o techchiuilia tlen amo kuali, tikualanij uan tijnekij timomakuepasej. Maske kiampa tijnekiskiaj tijchiuasej, Biblia kiijtoua amo ma timomakuepakaj. ¿Kenke?

 ToTeotsij amo kipaktia ma timomakuepakaj. Ipan Biblia, Jehová a techiljuia: “Na noteki para nikinkuepilis tlakamej tlen fiero kichiuaj, uan kena, nikinkuepilis” (Romanos 12:19). Biblia kiijtoua katli kinchiuilijtokej tlen amo kuali, moneki moiljuisej kenijkatsa kisenkauasej nopa kuesoli uan kiampa amo momakuepasej (Romanos 12:18). ¿Tlake ueliskia tijchiuasej tlaj tijchijtokej kampeka tijsenkauasej nopa kuesoli ika kuali uan amo ueltok tijsenkauaj? Biblia kiijtoua ma timotemachikaj Jehová kisenkauas nopa kuesoli ika xitlaualistli (Salmo 42:10, 11).

 Ipan ni tonali, toTeotsij kinkauilia tlanauatianij ma kintlatsakuiltikaj katli kichiuaj tlen amo kuali (Romanos 13:1-4). Teipa, toTeotsij kintlatsakuiltis nochi katli kichijtokej tlen amo kuali uan kichiuas ayokmo ma titlaijiyouikaj (Isaías 11:4).

•   Amo nima xikualani (Proverbios 17:27). Kema se maseuali tlauel kualantok uelis kichiuas tlamantli tlen amo kuali uan teipa kiyolkokos tlen kichijki. Katli achtoui moiljuia tlake kiijtos o tlake kichiuas, kuali kitlapejpenia tlen kichiuas (Proverbios 29:11).

•   Achtoui ximoiljui kenke kiampa kichijki (Proverbios 18:13). Tlaj mitschiuilijkej tlen amo xitlauak, ximotlajtlani: “¿Nijmati kenke kiampa kichijki nopa maseuali? ¿Kiampa kichijki pampa tlauel motetsoptoya? ¿Amo kuali moiljuik tlen kichiuas?”. Kemantika se akajya mokuapoloua uan tojuantij timoiljuiaj kinejki techchiuilis tlen amo kuali.

 Tlen sekinok kineltokaj: Biblia kiijtoua amo ma timomakuepakaj, uajka amo uelis timomanauisej kema sekinok kinekisej techchiuilisej tlen amo kuali.

 Tlen melauak: Se akajya kena uelis momanauis o uelis kiniljuis tekichiuanij ma kipaleuikaj. Biblia kiijtoua ma tijchiuakaj kampeka amo ma moueyili se kualantli (Proverbios 17:14).