¿Kenijkatsa moneki nimomaijtos? ¿Moneki nikompauis nopa padrenuestro?
Tlen Biblia kiijtoua
Nopa tlamaijtoli tlen padrenuestro techmachtia kenijkatsa uelis timomaijtosej uan kenke moneki timomaijtosej. Jesús kinmachtik itokilijkauaj kenijkatsa kinamikiyaya momaijtosej kema kiiljuijkej: “ToueyiTeko, xitechmachti kejatsa ma timomaijtokaj” (Lucas 11:1). Nopa tlamaijtoli tlen padrenuestro amo san ya nopa kikaki toTeotsij. a Ni tlamaijtoli eli san se neskayotl tlen kinextia kenijkatsa kinamiki timomaijtosej tlaj tijnekij toTeotsij ma techtlakakili.
Ipan ni tlamachtili tikitasej:
¿Tlake kiijtoua nopa tlamaijtoli tlen padrenuestro?
Nopa tlamaijtoli tlen padrenuestro eltok ipan Mateo 6:9-13. Ipan se keski Biblias uelis mopatla se keski tlajtoli. Ma tikitakaj san ome neskayotl:
La Biblia. Traducción del Nuevo Mundo: “ToTata tlen tiitstok ipan iluikak, ma moueyichiua motoka. Ma uala moTlanauatijkayo. Ma mochiua mopakilis ipan Tlaltipaktli, kej mochijtok iluikak. Xitechmaka nopa tlakualistli tlen moneki ipan ni tonali. Xitechtlapojpoljui tlen titlauikaj keja tojuantij nojkia tikintlapojpoljuiaj katli techtlauikiliaj. Amo xijkaua ma techyoltilana tlajtlakoli, uan xitechmanaui tlen Axkualtlakatl”.
Itlajtol Toteco Náhuatl de la Huasteca Oriental: “ToTeko toTata tlen tiitstok nepa iluikak. Nochi tlakamej ma kiueyichiuakaj motoka. Xiuala, xitlanauatiki nikaj. Ma kichiuakaj mopakilis nochi ipan ni Tlaltipaktli keja mochijtok nepa iluikak. Xitechmaka nopa tlakualistli tlen moneki mojmostla. Xitechtlapojpoljui totlajtlakoljuaj, keja tojuantij nojkia tikintlapojpoljuiaj tlen techixpanoj. Axaka xijkauili ma techyoltilana ma titlajtlakolchiuasej. Xitechmanaui tlen yajaya tlen axkuali”. b
¿Tlake kiijtosneki nopa tlamaijtoli tlen padrenuestro?
Jesús nochipa tlamachtik tlen kiijtoua Biblia, yeka san Biblia uelis techpaleuis ma tijkuamachilikaj tlake kiijtosneki nopa padrenuestro.
“ToTata tlen tiitstok ipan iluikak”
ToTeotsij techchijchijki uan techmakak tonemilis, yeka kinamiki tikiljuisej “toTata” (Isaías 64:8).
“Ma moueyichiua motoka”
ToTeotsij itoka Jehová. Ni tokajyotl eli tlatsejtseloltik, yeka moneki tijueyichiuasej uan tijuejkapantlalisej. Uan kiampa tijchiuaj kema tikiniljuiaj maseualmej nopa kuajkuali tlamantli tlen toTeotsij kinextia uan tlen mosentlalijtok kichiuas (Salmo 83:18; Isaías 6:3).
“Ma uala moTlanauatijkayo”
ToTeotsij iTlanauatijkayo eltok ipan iluikak uan Jesús eli nopa Tlanauatijketl. Jesús techmachtik ma tikiljuikaj toTeotsij ma tekichiua iTlanauatijkayo ipan Tlaltipaktli (Daniel 2:44; Apocalipsis 11:15).
“Ma mochiua mopakilis ipan Tlaltipaktli, kej mochijtok iluikak”
Ipan iluikak amo aka mosisinia yon miki. ToTeotsij nojkia kiampa kineki ma tiitstokaj ipan Tlaltipaktli: kineki nochipa kuali ma tiitstokaj uan amo aka ma majmaui (Salmo 37:11, 29).
“Xitechmaka nopa tlakualistli tlen moneki ipan ni tonali”
Kema Jesús itstoya, maseualmej momajtoyaj kikuaj pantsi. Ni techilnamikilia san toTeotsij uelis techmakas tlen ika timopanoltisej (Hechos 17:24, 25).
“Xitechtlapojpoljui tlen titlauikaj keja tojuantij nojkia tikintlapojpoljuiaj katli techtlauikiliaj”
Ipan ni texto, nopa tlajtoli “tlen titlauikaj” kiijtosneki “totlajtlakoljuaj” (Lucas 11:4). Nochi titlajtlakolchiuaj, yeka moneki ma techtlapojpoljuikaj. Tlaj tijnekij toTeotsij ma techtlapojpoljui, achtoui moneki tojuantij titetlapojpoljuisej (Mateo 6:14, 15).
“Amo xijkaua ma techyoltilana tlajtlakoli, uan xitechmanaui tlen Axkualtlakatl”
Jehová amo kema kichiuas ma techpano se tlamantli tlen amo kuali san pampa kineki kiitas tlake tijchiuasej (Santiago 1:13). Satanás o Diablo kena kineki ma titlajtlakolchiuakaj, yeka Biblia nojkia kitokaxtia “Axkualtlakatl” (1 Juan 5:19; Mateo 4:1-4). Kema tikiljuiaj Jehová ma techmanaui, tijnekij ma techpaleui amo ma titlajtlakolchiuakaj yon ma tikixpanokaj itlanauatiljuaj.
¿Moneki nikompauis nopa padrenuestro kema nimomaijtos?
Jesús kiijtok nopa tlamaijtoli tlen padrenuestro pampa kinekiyaya techmachtis kenijkatsa moneki timomaijtosej, uan amo pampa kinekiyaya ma tikompauikaj. Kema Jesús ayamo kiijtouayaya nopa padrenuestro, kiniljuik itokilijkauaj: “Kema inmomaijtouaj ika toTeko Dios, amo xijchiuakaj keja tlakamej tlen axkiixmatij toTeko. Yajuantij san kiompauiaj miak uelta se tlajtoli” (Mateo 6:7). Uan kema sampa kinmachtik itokilijkauaj kenijkatsa kinamikiyaya momaijtosej, kitekiuik sekinok tlajtoli (Lucas 11:2-4).
Kema timomaijtosej moneki tikiljuisej toTeotsij tlen eltok ipan toyolo, tlen timoiljuiaj uan tlen tijyolmatij (Salmo 62:8).
¿Kenijkatsa moneki nimomaijtos?
Nopa padrenuestro kinextia kenijkatsa moneki timomaijtosej tlaj tijnekij toTeotsij ma techtlakakili. Xikita kenijkatsa tlen kiijtoua sekinok textos eli sanse ika tlen kiijtoua nopa tlamaijtoli tlen padrenuestro.
Moneki tijnojnotsasej san toTeotsij
Texto: “Ximomaijtokaj ika toTeko ika nochi tlen inmechpanotiuala. Xijtlajtlanikaj ma inmechmaka nochi tlen moneki uan xijtlaskamatikaj para nochi tlen inmechchiuilijtok” (Filipenses 4:6).
Tlen kiijtosneki: Kema peua ni tlamaijtoli kiijtoua “toTeko toTata”, nopa techmachtia san Jehová moneki tijnojnotsasej, uan amo Jesús, María yon teteyomej.
Moneki titlajtlanisej tlen kiyolpakiltis toTeotsij
Texto: “Tijmatij temachtli intla tijtlajtlaniaj toTeko tlen kinamiki ika tlen yajaya kineki, yajaya techtlakakilia” (1 Juan 5:14).
Tlen kiijtosneki: Kema timomaijtosej uelis titlajtlanisej tlen toTeotsij kuali kiita. Jesús techmachtik tlauel ipati tlen Jehová kineki kichiuas, yeka ipan nopa tlamaijtoli tlen padrenuestro kiijtok: “Ma mochiua ipakilis”. Tlaj tijnekij tijmatisej tlake mosentlalijtok kichiuas toTeotsij ipan Tlaltipaktli moneki timomachtisej Biblia.
Uelis tikiljuisej toTeotsij nochi tlen techpano
Texto: “Nochi mokuesol xijkaua imako toTeko uan yajaya mitsmakas temachili” (Salmo 55:22).
Tlen kiijtosneki: ToTeotsij kitekipachoua tlen techpano. Yeka, ipan nopa tlamaijtoli tlen Jesús kiijtok kinextik amo kenijki tlaj tikiljuiaj Jehová tlen techpano. Nojkia uelis tikiljuisej ma techmaka tlen moneki uan ma techpaleui kuali tijtlapejpenisej tlen tijchiuasej, ma techpaleui kema tikixnamikij tlaouijkayotl uan ma techtlapojpoljui totlajtlakoljuaj. c
a Se neskayotl, kema Jesús uan itokilijkauaj sampa momaijtojkej, amo kiompauijkej tlen kiijtoua nopa tlamaijtoli tlen padrenuestro (Lucas 23:34; Filipenses 1:9).
b Ipan sekinok Biblias, kej Itlajtol Toteco Náhuatl de la Huasteca Oriental, kampa tlami nopa tlamaijtoli tlen padrenuestro kiijtoua se tlamantli tlen moixmati kej doxología (tlen kiijtouaj kema kiueyichiuaj toTeotsij): “Pampa ta moselti tijpia tlanauatili para nochi tijnauatis. San ta tijpia nopa chikaualistli tlen más ueyi. Uan san ta tijpia motlatlanex uan keja nopa elis para nochipa. San ya nopa”. Uan nopa Comentario Bíblico “San Jerónimo” kiijtoua: “Ipan nopa amatlajkuiloli tlen uejkajkia moijkuilok amo nesi nopa doxología”.
c Maske se keskij maseualmej kimatij moneki ma kintlapojpoljui toTeotsij, uelis amo momaijtouaj pampa moiljuiaj tlauel tlajtlakolchijtokej. Maske kiampa moiljuiaj, Jehová kiijtoua: “Xiualakaj nimantsi uan ma tijsenkauakaj tocuentas” (Isaías 1:18). Jehová nochipa kinpaleuis katli kitemouaj ika nochi ininyolo uan katli kinekij ma kintlapojpoljui.
Tlen nojkia mitspaktis tikitas
TLEN TEMATILTIA
¿Techpaleuia tlamaijtoli?
¿Timoiljuijtok toTeotsij amo mitstlakakilia kema timomaijtoua? Amo san ta kiampa timoiljuijtok.
TLAMACHTILI TLEN TLAUEL IPATI
¿Kitlakakilia toTeotsij nochi tlamaijtoli?
¿Kitlakakilia katli momaijtoua tlaj mosentlalia san ipan tlen ya kineki? ¿Kipaleuis toTeotsij kema se tlakatl momaijtoua tlaj kitlaijiyouiltia isiua?
TLEN TEMATILTIA
¿Kenke toTeotsij amo kikaki nochi tlamaijtoli?
Biblia kiijtoua tlake tlamaijtoli kinankilia toTeotsij uan tlake amo.
TLEN TEMATILTIA
“Xiuala, xitlanauatiki nikaj”: Tlauel miakej kiijtojtokej ni tlajtoli
¿Tlake moneki tijmatisej tlen toTeotsij iTlanauatijkayo uan kiampa tijkuamachilisej nopa tlamaijtoli tlen padrenuestro?