Kena. ToTeotsij motekipachoua kema kinita itekipanojkauaj mokokouaj. Yeka, Biblia kiijtoua: “Kema uetstos ipan tlaijiyouilistli, toTeotsij kitlalanas ipan itlapech” (Salmo 41:3). Tlaj tlauel timokokouaj, uelis tijchiuasej ni eyi tlamantli:

1.   Xikiljui toTeotsij ma mitspaleui tikijiyouis. Nopa “tlaseuilistli” tlen toTeotsij techmakas techpaleuis amo tlauel ma timokuesokaj uan ma tikijiyouikaj nopa kokolistli (Filipenses 4:6, 7).

2.   Nochipa xiyolpaki. Biblia kiijtoua: “Yolpakilistli tepaleuia keja eliskia se kuali pajtli. Pero kema se tlakatl moyolkuesoua kitlamiltia ichikaualis” (Proverbios 17:22). Kema tiyolpaktokej techpaleuia amo tlauel ma timokuesokaj uan amo ma timokokokaj.

3.   Ximotemachi teipa kuali tiitstos. Tlaj timotemachis teipa kuali tiitstos mitspaleuis tiyolpaktos maske timokokoua (Romanos 12:12). Biblia kiijtoua asis se tonali kema amo aka kiijtos “mokokoua” (Isaías 33:24). ToTeotsij kitlamiltis nochi kokolistli tlen ixtlamatinij amo ueltok kitlamiltiaj. Nojkia toTeotsij kichiuas ayokmo aka ma ueuejtia. Biblia kiijtoua: “Uajka itlakayo nopa tlakatl mochiuas keja se konetl itlakayo kipias chikaualistli keja se telpokatl” (Job 33:25).

 Xijmajto ni: Maske Jehová itlajtoltemakauaj timotemachiaj toTeotsij techpaleuis, kema tijpiaj se kokolistli tiauij kampa se tepajtijketl (Marcos 2:17). Amo tikiniljuiaj sekinok tlake pajtli kitekiuisej pampa sejse moneki kitlapejpenis ika tlake mopajtis.