“Kema nieliyaya siuapil, noikni nochipa nechmakiliyaya uan nechtlaijiljuiyaya. Uan kema nimonamiktik, noyexna nojkia nechtlaijiyouiltiyaya. Ya uan noyexta tlauel nechtekitiltiyayaj. Nijnekiyaya nimomiktis” (Madhu, a India).

 Organización Mundial de la Salud kiijtoua “ipan nochi Tlaltipaktli miakej siuamej tlauel kintlaijiyouiltiaj”. Nojkia kiijtoua, se tlen eyij siuamej kichiualtijtokej ma moteka iuaya se akajya o kimakilijtokej.

 Tlaj kiampa mitspanotok, uelis timajmaui kema tia kanajya pampa timoiljuia se akajya uelis mitsmakilis, mitstlaijiljuis o mitschiualtis ximoteka iuaya. Kema tikitas kintlaijiyouiltiaj siuamej uan kinmakiliaj, uelis timoiljuis amo aka kinpatiita. Pero, ¿kinpatiita Dios?

 Tlen Biblia kiijtoua: “Kinchijchijki tlakatl uan siuatl” (Génesis 1:27).

 Tlen kiijtosneki: Dios kichijchijki tlakatl uan siuatl, uan ya kineki ma tikintlepanitakaj. Nojkia kiiljuia se tlakatl “moneki kiiknelis isiua, sanse kej ya moiknelia”, amo kineki ma kichiualti ma kichiua san tlen ya kineki, amo ma kitlaijiljui yon ma kimakili (Efesios 5:33; Colosenses 3:19). Dios kineki siuamej kuali ma kiyolmatikaj.

 “Kema nieliyaya siuapil, se keskij noteixmatkauaj nechchiualtijkej ma nimoteka ininuaya. Uan kema nijpiayaya 17 xiuitl, katli nechtekimakatoya nechiljuik ayokmo nechtekimakaskia tlaj amo nimotekaskia iuaya. Uan kema nimonamiktik, noueue, notatauaj uan nokalnechkauaj kichijkej ma nijyolmati amo nopati. Pero teipa nikixmatki Jehová, b katli kichijchijtok nochi tlen onka. Nijyekok ya kinpatiita siuamej uan nopa nechpaleuijtok ma nimotemachi ya nechiknelia uan nechpatiita” (María, Argentina).

 Tlen Biblia kiijtoua: “Itstokej touampoyouaj tlen más techikneliaj que toikniuaj” (Proverbios 18:24).

 Tlen kiijtosneki: Se mouampo uelis mitspaleuis. Tlaj timoiljuia kiampa kichiuas, xikiljui tlen tijyolmati katli ipan timotemachia.

 “Ipan 20 xiuitl amo aka nikiljuijtoya tlaj se akajya nechchiualtik ma nimoteka iuaya. Pero nopa kichijki ayokmo ma niyolpaki, ma nimotetsopa uan tlauel ma nimokueso. Uan kema nikiljuik se nouampo tlen nechpanok, ya kuali nechtlakakilik uan nechpaleuik sampa kuali ma nijyolmati” (Elif, Turquía).

 Tlen Biblia kiijtoua: “Xijkauakaj imako [Dios] nochi tlen inmechkuesoua, pampa ya motekipachoua por inmojuantij” (1 Pedro 5:7).

 Tlen kiijtosneki: Kema tijnojnotsa Dios, ya nochipa mitstlakakilia (Salmo 55:22; 65:2). Dios tlauel mitsiknelia, uan ya uelis mitspaleuis ximopatiita.

 “Kema nikixmatki Jehová, nechpaleuik sampa kuali ma nijyolmati maske achtouia nechchiuilijkej tlen amo kuali. Nama ueli nikiljuia Dios nochi tlen nijyolmati. Ya eli nouampo uan nechkuamachilia” (Ana, Belice).

 Tlen Biblia kiijtoua: “Ta tikinmanauia iknotsitsij uan tlen tlaijiyouiaj. Keja nopa, tlakamej tlen san tlasenkaualmej ika sokitl ayok uelis kintemajmajtisej” (Salmo 10:18).

 Tlen kiijtosneki: Jehová nechka kitlamiltis tlen amo kuali uan nojkia ayokmo kikauas ma kintlaijiyouiltikaj siuamej.

 “Tlauel nechyolchikaua pampa nijmati Jehová nechka ayokmo kikauas ma kintlaijiyouiltikaj siuamej uan siuapilmej. Nama nijpia tlaseuilistli” (Roberta, México).

 Tlaj tijneki tijmatis sekinok tlamantli tlen mitspaleuis tikijiyouis tlen mitspano, kenke uelis timotemachis nelia moaxitis tlen Biblia kiijtoua uan kenijkatsa tlamachtiaj Jehová itlajtoltemakauaj, xitlajtlani ma mitsmachtikaj.

 Xijkixti ni tlamachti ika amatl.