Kiampa kiijtojkej se keskij ixtlamatinij kema momachtijkej kenke tlauel tlatotonia uan tlaseseya ipan Tlaltipaktli. Tlaj ta titlaneltoka ipan toTeotsij uan timotemachia ya kitekipachoua tlen techpano, tlen kiijtojkej nopa ixtlamatinij uelis kichiuas ximoiljui kenijkatsa toTeotsij kichijchijki ni Tlaltipaktli iselti ma moyankuili.

Pero maseualmej kichijtokej miak tlamantli tlen ika kisokiuiaj Tlaltipaktli uan yeka ayokmo ueli iselti mokualtlalia. ¿Kenke uelis timotemachisej toTeotsij kimanauis Tlaltipaktli uan nojkia nemilistli?

Nopa textos tlen nesi ipan recuadro kinextia Tlaltipaktli amo nempoliuis uan nochipa tiitstosej nopaya.

• ToTeotsij kichijchijki Tlaltipaktli. “Kema pejki nochi tlen onka, Toteko Dios kichijki iluikaktli uan tlaltipaktli” (Génesis 1:1).

• Tlaltipaktli eli iaxka Dios. “[Jehová] a iaxka ni tlaltipaktli uan nochi tlen eltok ipani” (Salmo 24:1).

• ToTeotsij kichijchijki Tlaltipaktli para nochipa ma elto. “Ta kuali tijtlatskiltik ni tlaltipaktli para ma axmoijkuenis tlen kampa eltok” (Salmo 104:5).

• ToTeotsij kiijtok nochipa tiitstosej ipan Tlaltipaktli. “Pampa TOTEKO tlen kichijchijki iluikaktli uan tlaltipaktli [ . . . ] axkichijchijki para eltos kaktok. Kichijchijki uan kikualtlalik para ipan ma itstokaj tlakamej” (Isaías 45:18).

• ToTeotsij kiijtoua ipan Tlaltipaktli nochipa itstosej maseualmej. “Tlakamej tlen itstokej xitlauakej iixpa TOTEKO moaxkatisej nopa tlali tlen yajaya kinmakas, uan nepa itstosej para nochipa” (Salmo 37:29).

ToTeotsij tlauel kuali kichijchijki Tlaltipaktli, yeka nojua uelis moyankuilis tlaj maseualmej kitekiuiaj kej kinamiki tlen nikaj onka. Ipan se keski tlajtolpanextili tlen Biblia, toTeotsij kiijtoua ya kitlapejpenik nopa tonali kema kintsontlamiltis nochi tlen maseualmej kichiuilijtokej ni Tlaltipaktli (Apocalipsis 11:18).

Biblia kiijtoua kema ya panotos nochi ni tlamantli, toTeotsij kikualtlalis ni Tlaltipaktli uan kichiuas se yejyektsi xochimili. Uan nojkia kinteochiuas “nochi tlen yoltokej” (Salmo 145:16).