Miakej kej Alex amo kinpaktia kichiuasej se ouij tekitl. Aaron, katli kikualchijchiua carros, kiijtoua: “Miakej moiljuiaj tepinajti kichiuasej se tekitl ‘tlen amo tlauel ipati’. Uan kiijtouaj kema kiasisej se kuali tekitl, ayokmo kichiuasej nopa”.

Miakej kiijtouaj amo kinamiki kichiuasej se ouij tekitl. Uelis pampa kineltokaj kema ipan televisión kinextiaj tlaj tlapijpixtosej miak uelis tlauel kuali itstosej. Matthew, kiijtoua: “Sekij moiljuiaj kichiuaj ouij tekitl san katli amo kiasikej se kuali tekitl”. Uan Shane, katli tlachpana kiijtoua: “Maseualmej nochipa kinekij kitlanisej miak tomij, uan amo tekitisej miak”.

Miakej kena kinpaktia tekitisej miak. Daniel, katli kipia 25 xiuitl uan tekiti kampa kalchiuaj, kiijtoua: “Tlaj tijchiuas ika tlen tikinpaleuis sekinok, tlauel tiyolpakis”. Uan Andre, katli kipia 23 xiuitl, kiijtoua: “Tlaj titekitis, temachtli tiyolpakis uan tijyolmatis tijchiua tlen mitspaktia. Tlaj amo titekitis miak, amo tiyolpakis uan amo mitspaktis moteki”.

¿Tlake kinpaleuijtok Daniel uan Andre kinpaktis tlauel tekitisej? Tlen kiijtoua Biblia. Biblia techmachtia ma tijchiuakaj kampeka, nochipa ma titekitikaj uan ma tiyolpakikaj ika tlen tijchiuaj.

¿Tlake tlen tetlajtolmaka Biblia uelis mitspaleuis xiyolpaki ika moteki? Ma tikitakaj se keski tlamantli ipan nopa seyok tlamachtili.