Nitlakatki ipan se pilaltepetsi nechka tlen Roma. Tlauel nitlaijiyouik pampa amo nikixmatki nonana uan amo kuali nimouikayaya iuaya notata. Nimomatki nijchiuas tlen kichiuayayaj katli amo itstoyaj ininchaj.

Pejki nitlachteki kema nijpixtoya 10 xiuitl uan nikistejki nochaj kema nijpixtoya 12. Notata miakpa nechkixtito kampa nechtsaktoyaj. Nochipa nikinkualankanojnotsayaya maseualmej uan tlauel nimosisiniyaya. Kema nikaxitik 14 xiuitl nikistejki nochaj uan nimoiljuik ayokmo kema nitlakuepiliskia. Niitstoya ojtipa uan nijtekiuiyaya drogas. Kema tlayouayaya nijtlapouayaya se carro uan nopaya nikochiyaya, uan kema panoyaya tlajkoyoual nijtemouayaya kanke nimaltis.

Kuali nijmatki kenijkatsa nitlachtekis. Nikintlachtekiliyaya maseualmej katli yauiyayaj ipan ojtli uan ika tlayoua nikalakiyaya techaj. Tlauel nechixmatkej uan teipa nechtlanejkej ma nimosansejkotili ininuaya se pandilla katli nojkia tlachtekiyayaj. Nopa kichijki ma nitlachteki ipan bancos. Katli ininuaya nimomatiyaya tlauel nechtlepanitayayaj pampa tlauel nimosisiniyaya. Nochipa nijnemiltiyaya nopistola uan kema nikochiyaya nijtlaliyaya notsontetontsajla. Tlauel nimosisiniyaya, nijtekiuiyaya drogas, nitlachtekiyaya, nisiuanemiyaya uan nijtekiuiyaya tlajtoli tlen sokiyo. Policías nochipa nechtemojtinemiyayaj uan miakpa nechitskijkej. Miak xiuitl niitstoya cárcel uan ojtipa.

Kema nechkixtijkej kampa nechtsaktoyaj niajki nijpaxaloto se noaui. Ya uan omej nomachikniuaj eliyayaj Jehová itlajtoltemakauaj uan na amo nijmatiyaya. Inijuantij nechtlanejkej ma nia kampa mosentiliyayaj uan niajki pampa san nijnekiyaya nitlachiati. Kema tiasitoj, nijnejki nimoseuis tlaika uan kiampa nikinitaskia katli kisayayaj uan kalakiyayaj. Ipan nopa tonali nijuikayaya nopistola.

Nopa tlanechikoli tlauel nechpaleuik. Uan nimoiljuiyaya: “¡Amo nijneltoka tlen nikita!”. Nopaya san itstoyaj maseualmej katli kuali mouikayayaj uan tlauel yolpakiyayaj. Nojua nikilnamiki kenijkatsa nechselijkej Jehová itlajtoltemakauaj. ¡Kuali nijyolmatiyaya pampa amo kema niitstoya ininuaya maseualmej katli tlauel kuali ininyolo!

Pejki nimomachtia Biblia ininuaya Jehová itlajtoltemakauaj. Kema nijyekojtiauiyaya se keski tlamachtili, nikitak monekiyaya nijpatlas kej nimonejnemiltiyaya. Se neskayotl, tlauel nechpaleuik tlen kiijtoua Proverbios 13:20: “Se tlakatl tlen nemi ininuaya tlen tlalnamikij mochiuas tlalnamiki. Pero aki nemi ininuaya uiuimej, kipantis ajkeya kinpojpostekis iomiyouaj”. Nijkuamachilik ayokmo monekiyaya nimouikas ininuaya katli tlachtekiyayaj. Maske ouij nijmatki, Jehová nechpaleuik ayokmo ma nimouika ininuaya.

Nijchijki kampeka ayokmo nitlachichinas yon nijtekiuis drogas, kiampa kejuak nijpajpajki notlakayo. Nojkia nimoxinki, nimokixtilik nopipiloljua uan ayokmo nikijtok tlajtoli tlen sokiyo. Kema kiampa nijchijki, nikitak kena ueliskia nijkauas sekinok tlamantli.

Tlauel ouij nijmatki nimomachtis Biblia pampa amo kema nechpaktik nitlapouas yon nimomachtis. Yolik nikiknelijtiajki Jehová. Teipa, pejki amo kuali nijyolmati pampa notlalnamikilis nechyolkokouayaya. Nochipa nechyolkokouayaya tlen amo kuali tlen nijchijtoya pampa nimoiljuiyaya Jehová amo kema nechtlapojpoljuiskia. Kema kiampa nijyolmatiyaya, nijpouayaya kampa kiijtoua kenijkatsa Jehová kitlapojpoljuik David maske ya tlauel tlajtlakolchijki, nopa tlauel nechyolchikauayaya (2 Samuel 11:1–12:13).

Nojkia tlauel ouij nijmatki nitlajtolmoyauas kajkalpa (Mateo 28:19, 20). ¡Tlauel nimajmauiyaya nijpantis se akajya katli achtouia nitlaijiyouiltijtoya! Teipa ayokmo nimajmajki uan niyolpakiyaya nikinkamanaljuis maseualmej tlen toTeotsij, katli nochipa tetlapojpoljuia.

Miakej nouampoyouaj ya mijkej o kintsaktokej uan na nimomanauik pampa nikixmatki Jehová. Nojkia tlauel niyolpaki uan nimotemachia teipa nijselis kuajkuali tlamantli. Nijyekok nitlaneltokas, ayokmo nimoueyimatis uan amo nimosisinis, yeka nama kuali nimouika ininuaya sekinok. Tlauel niyolpaki pampa nimosiuajtik iuaya Carmen, se siuatl katli tlauel yejyektsi. Sentik tikinpaleuiaj tokalnechkauaj ma kimatikaj tlen Biblia tlamachtia.

Nama ayokmo nitlachteki. Kemantika nitekiti ipan bancos pampa nitlapojpoua uan amo pampa nijneki nitlachtekis.