Nitlakatki ipan Santo Domingo, se ueyi altepetl tlen eltok ipan República Dominicana, tielij tinauij tiiknimej uan na niteipaejketl. Notatauaj kuali momachtijtoyaj uan kinekiyayaj ma tiitstokaj ininuaya maseualmej katli kuali monejnemiltiyayaj. Kema poliuiyaya naui xiuitl nitlakatiskia, inijuantij kinixmatkej se keskij misioneros mormones uan tlauel kinpaktik pampa kuali tenojnotsayayaj, amo sokiyojkej nemiyayaj uan kuali nesiyayaj. Ipan República Dominicana nochampoyouaj elkej katli achtoui mokalakijkej ipan nopa religión, tlen itoka Iglesia de Jesucristo de los Santos de los ­Últimos Días, tlen nojkia kiiljuiaj Iglesia Mormona.

Na nochipa nijchiuayaya tlen mochiuayaya ipan nopa religión, uan tlauel nechpaktiyaya pampa inijuantij kiijtouayayaj tlauel ma tikinpatiitakaj tochampoyouaj uan kuali ma timonejnemiltikaj. Tlauel niyolpakiyaya pampa nieliyaya mormón uan nimosentlalik nimochiuas misionero.

Kema nikaxitik 18 xiuitl, nochampoyouaj uan na tiajkej Estados Unidos pampa kinekiyayaj ma nia ipan se kuali universidad. Kema panok se xiuitl, notíos, katli elij Jehová itlajtoltemakauaj, techpaxalotoj Florida uan techtlanejkej ma tiakaj ipan se ueyi tlanechikolistli kampa momachtiaj Biblia. Tlauel nechpaktik pampa nikitak nochi kitemouayayaj ipan ininBiblia nopa textos tlen kiijtojtiauiyayaj uan kiijkuilouayayaj tlen moixtomayaya, yeka nikiniljuik ma nechmakakaj amatl uan se lapicero uan nojkia pejki nitlajkuiloua.

Kema tlanki nopa ueyi tlanechikolistli, notíos nechiljuijkej nechpaleuiskiaj nojua kuali ma nikixmati Biblia pampa kiitakej nijnekiyaya nielis misionero. Nechpaktik tlen nechiljuijkej, pampa nijmatiyaya miak tlamantli tlen nopa Libro de Mormón uan amo tlen Biblia.

Kema notíos tlakuepilijkej ininchaj, nojua tikamanaltiyayaj tlen Biblia ika teléfono. Nochipa nechiljuiyayaj ma nikita tlaj eli sanse tlen nijneltokayaya ika tlen Biblia kiijtoua. Kinekiyayaj noselti ma nikita tlake nelnelia tlamachtia Biblia.

Maske nimoiljuiyaya tlen tlamachtiyayaj ipan noreligión eliyaya melauak, amo nijmatiyaya tlaj eliyaya sanse ika tlen Biblia tlamachtia. Noaui nechtitlanilik nopa pilamochtsi ¡Despertad!, noviembre 8, 1995, tlen kichijchijtokej Jehová itlajtoltemakauaj, nopaya ualayaya ome tlamachtili tlen kiijtouayaya tlake kineltokaj mormones. Tlauel nimosentlachilik pampa amo nijmatiyaya miak tlamantli tlen kineltokaj ipan noreligión, yeka nijtemok kampa tlamachtiaj mormones ipan internet, uan nikitak nelia tlen kiijtouayaya nopa pilamochtsi. Kema niajki ipan se keski museos ipan altepetl Utah, nojkia kiampa nikitak.

Achtouia nimoiljuiyaya Biblia uan nopa Libro de Mormón tlamachtiyaya sanse tlamantli. Teipa, kema pejki kuali nijpoua Biblia, nikitak nopa amo nelia. Se neskayotl, ipan Ezequiel 18:4 Biblia kiijtoua nopa alma miki. Uan ipan nopa Libro de Mormón, ipan Alma 42:9 kiijtoua nopa alma axkema miki.

Uan amo san ya nopa, nojkia nikitak inijuantij tlamachtiyayaj moneki tlauel tijpatiitasej toaltepe. Se neskayotl, inijuantij kiijtouaj nopa xochimili Edén eltoya ipan condado de Jackson (Misuri, Estados Unidos). Nojkia, katli tlayakanaj ipan Iglesia kiijtouaj “kema toTeotsij iTlanauatijkayo tekichiuas, nopa bandera tlen Estados Unidos yejyektsi kiolinisej, nochi kitlepanitasej uan kiixnextis nochi sanse tielij uan uelis tijchiuasej tlen tijnekisej”.

Na nijnekiyaya nijmatis tlake kipanoskia noaltepe uan sekinok altepemej kema kiampa panoskia. Se tonali ika tiotlak, nechnojnotski se telpokatl katli nikixmatiyaya, ya momachtiyaya pampa kinekiyaya elis misionero, yeka nijtlatsintokik: “Tlaj onkaskia se tlauilankayotl uan maseualmej tlen moaltepe kinteuiskiaj katli itstokej ipan seyok altepetl, ¿timoteuiskia ininuaya mormones katli nopaya itstokej?”. Ya kiijtok kena, na nimoiljuiyaya amo kiampa kiijtoskia. Nojua nimomachtik tlen tlamachtiaj ipan noreligión uan nikintlajtlanik se keskij katli tlayakanayayaj nopaya, inijuantij nechiljuijkej tlen na nijnekiyaya nijmatis, ika yolik momatiskia.

Amo nechpaktik tlen nechiljuijkej. Pejki nimoiljuia kenke nijnekiyaya nielis misionero uan nikitak kiampa nijchiuayaya pampa nijnekiyaya nikinpaleuis maseualmej. Nojkia kiampa nijnekiyaya nijchiuas pampa sekinok tlauel kintlepanitaj. Maske ya nopa nijnekiyaya, amo nijmatiyaya miak tlamantli tlen toTeotsij. Na ipa nijpojtoya miak textos tlen Biblia, maske kiampa, amo kema nikitstoya kej kinamiki yon nijpatiitayaya. Nojkia amo nijmatiyaya tlake mosentlalijtok kichiuas toTeotsij ipan Tlaltipaktli uan kenijkatsa kineki ma itstokaj maseualmej.

Kema pejki nimomachtia Biblia ininuaya Jehová itlajtoltemakauaj, nijyekok miak tlamantli: kenijkatsa itoka toTeotsij, tlake techpano kema timikij, kenijkatsa Jesús kichiuas ma moaxiti tlen Jehová mosentlalijtok uan sekinok tlamantli. Nama kena pejki nikita tlake nelnelia tlamachtia Biblia uan tlauel nechpaktiyaya nikiniljuis sekinok tlen nimomachtiyaya. Maske ya nijmajtoya toTeotsij nelia itstok, nama ueliyaya nijnojnotsa sanse kej nijnojnotsaskia se kuali nouampo. Ipan julio 12, 2004, nimoatsonpoliuiltik uan nimochijki se tlen Jehová itlajtoltemakauaj uan kema panok chikuasej metstli, pejki senkistok nitlajtolmoyaua.

Nitlatekipanok makuili xiuitl ipan ueyi Kali Betel tlen Jehová itlajtoltemakauaj ipan Brooklyn (Nueva York). Tlauel niyolpaki pampa uelki nitlapaleuia kampa kikixtiaj Biblia uan sekinok amatlajkuiloli tlen kinpaleuia tlauel miakej maseualmej ipan nochi Tlaltipaktli. Uan nojua tlauel niyolpaki pampa nikinpaleuia sekinok ma kiixmatikaj toTeotsij.