JOHN ichampoyouaj itstoyaj ipan se pilaltepetsi tlen eltoya ipan Gujarat (India). Kema nechka asiskia xiuitl 1960, itata moatsonpoliuiltik uan mochijki se tlen Jehová itlajtoltemakauaj. Inana, makuiltij iikniuaj uan John tlauel kinpaktiyaya elisej católicos, yeka tlauel kualankej pampa inintata kipatlatoya ireligión.

Se tonali, itata kiiljuik John ma kikauiliti se tlenijki seyok toikni tlen tlanechikoli. Ijnalok, John tlauel ueyi momakpiltsontejki kema kitlapoyaya se lata. Ya kinekiyaya kineltokas itata, yeka momapijki uan yajki kiita itata iuampo.

Kema asito, isiua nopa toikni, katli nojkia eliyaya se tlen Jehová itlajtoltemakauaj, kiselik tlen kiuikiliyayaj iueue. Kema kiitak John momakpiltsontektoya, kinejki kipaleuis. Yeka kikixtik se keski tlamantli tlen ika kipajpakilik imax, kipajtilik uan kuali kimapijki. Teipa kimakak se té, uan kamanaltik iuaya tlen Biblia.

John pejki ayokmo tlauel kinkualankaita Jehová itlajtoltemakauaj. Yeka pejki kitlajtlania tosiuaikni se keski tlamantli tlen kinekiyaya kimatis. Ya moiljuiyaya Jesús eliyaya toTeotsij uan monekiyaya tijnojnotsasej María kema timomaijtosej, uan kiijtok itata amo moiljuiyaya nopa. Tosiuaikni, katli kiyekojtoya kamanalti gujarati, kiixtomilik John ipan itlajtol tlake kiijtouayaya Biblia. Teipa kimakak nopa pilamochtsi “Estas buenas nuevas del reino”.

Kema kipojki nopa pilamochtsi, kimatki ya nopa tlen melauak katli tlamachtiyaya Biblia. John yajki kiita katli tlayakanayaya ipan iglesia uan kitlajtlanik sanse tlen kitlajtlanijtoya tosiuaikni. Nopa sacerdote tlauel kualanki, kimajkauilik se Biblia uan kikualankatsajtsilik: “¿¡Nama tieli tiSatanás!? ¿Kanke kiijtoua Biblia Jesús amo eli toTeotsij? ¿Kanke kiijtoua amo kinamiki tijnojnotsasej María kema timomaijtosej? ¿¡Kanke!?”. John amo moiljuik tlaj kiampa kinankiliskia. Ya kinankilik: “Amo kema sampa nikalakis ipan se iglesia católica”. Uan nimantsi kiski.

John kinejki momachtis ininuaya Jehová itlajtoltemakauaj, kineltokak tlen momachtiyaya uan pejki kitekipanoua Jehová. Sekinok tlen ichampoyouaj nojkia kiampa kichijkej. Nojua nesi kampa momatsontejki uan kema kitlachilia, kiilnamiki ika miak tlaiknelili tlen panok kipia sesenta xiuitl, kenijkatsa pampa se akajya kipixki kuali iyolo iuaya kipaleuik ma kimati tlen melauak (2 Cor. 6:4, 6).