IPAN Indonesia, ipan se isla tlen itoka Sangir Besar, itstokej eyij tosiuaikniuaj. Kemantika sansejko nemiyayaj ipan playa. Maske miakej kinixmatij pampa tlamachtiaj ika Biblia, kema nemiyayaj playa amo tlajtolmoyauayayaj. Uajka, ¿tlake kichiuayayaj?

Achtoui, kalakiyayaj aijtik, kitemouayayaj uejueyi tetl uan teipa kikixtiyayaj. Kema itstoyaj playa, moseuiyayaj ipan se silla uan ika se martillo kitlatlapatsayayaj nopa tetl. Teipa kitemayayaj nopa grava ipan botes uan ixtlejkoyayaj ipan escaleras kema kiuikayayaj ininchaj. Inijuantij kiajokuiyayaj nopa grava ipan uejueyi koxtali. Teipa, se keski camiones kiuikayayaj nopa koxtali, uan sekinok maseualmej kichijchiuayayaj carreteras ika nopa tetl.

Se tlen nopa tosiuaikniuaj itoka Hulda. Ya más tekitiyaya que nopa sekinok. Ika tlen kitlaxtlauiyayaj, kinpaleuiyaya ichampoyouaj. Pero ika nopa tomij tlen kitlaniskia, nojkia kinekiyaya mokouis se tablet tlen ika ueliskia kitekiuis aplicación JW Library^®. Hulda kimatiyaya nopa videos uan sekinok tlamachtili tlen eltoya ipan nopa aplicación, kipaleuiskia más kuali ma tlajtolmoyaua uan más kuali ma kikuamachili Biblia.

Mojmostla ika ijnalok, Hulda tekitiyaya ome horas. Kiampa kichijki se metstli uan tlajko. Ika nopa grava tlen kisentilik, kitemitik se camión tlen amo tlauel ueyi. Ika tlen kitlaxtlauijkej, mokouik se tablet.

Hulda kiijtok: “Maske tlauel nisiajki uan tlauel nixoxokoxki, kema nijkojki nopa tablet uan nikitak nechpaleuiskia nojua kuali ma nitlajtolmoyaua uan nima ma nimokualchijchiua para tlanechikoli, nimantsi nikilkajki nixoxokoxtoya”. Tosiuaikni nojkia kiijtok nopa tablet tlauel kipaleuik kema pejki momoyaua nopa ueyi kokolistli, pampa nama nochi mochiuaskia ika internet. ¡Tlauel tiyolpakij pampa Hulda uelki kipia tlen kinekiyaya!