Nopa achtoui carta tlen kintitlanilijkej Cristo itokilijkauaj tlen Corinto 16:1-24
16 Nama niinmechiljuis tlen nopa tomij tlen inkinekij inkisentilisej para inkinpaleuisej toikniuaj katli Dios* kiniyokatlalijtok.* Xijchiuakaj sanse kej nikiniljuik toikniuaj katli itstokej ipan nochi tlanechikoli tlen Galacia.
2 Ipan nopa achtoui tonali kema peua semana, sejse tlen inmojuantij moneki kiiyokatlalis se tlenijki, tlen inuelisej, para amo ma kisentilikaj kema na niasiti.
3 Uan kema niasiti nopaya, nikintitlanis ma yakaj Jerusalén nopa tlakamej katli inmojuantij inkiijtosej ipan inmocartas para uelis yasej, kiampa inijuantij kiuikasej nopa regalo tlen intemakasej ika nochi inmoyolo.
4 Pero tlaj nojkia monekis ma nia, uajka inijuantij yasej nouaya.
5 Nias niinmechpaxaloti kema ya nipanotos tlali Macedonia, pampa nipanoti ika Macedonia
6 uan uelis nimokauas se keski tonali inmouaya, o uelis nimokauas hasta kema ya panotos ipoual kema tlaseseya,* kiampa uelis inyasej nouaya se kentsi kampa na nias.
7 Pampa amo nijneki san niinmechitstikisati, nijneki nimokauas inmouaya se keski tonali, tlaj Jehová* kineki.
8 Pero nimokauas ipan Éfeso hasta panos nopa Iljuitl tlen Pentecostés,
9 pampa kejuak nechtlapouilijkej se ueyi puerta para más ma nitlatekipano, pero itstokej miakej katli amo kinpaktia tlen nijchiua.
10 Tlaj asiti Timoteo, xijchiuakaj kuali ma kiyolmati uan xijpaleuikaj amo tleno ma kitekipacho kema itstos inmouaya, pampa ya nojkia kichijtinemi iteki Jehová,* sanse kej na.
11 Uajka amo aka ma kiita kej amo tleno ipati. Xijpaleuikaj para kuali ma uala ipan iojui, kiampa uelis asiki kampa na, pampa nijchixtok ininuaya toikniuaj.
12 Toikni Apolos miakpa nikiljuik ma inmechpaxaloti ininuaya toikniuaj. Maske amo moiljuijtoya yas namantsi, kema uelis yas inmechitati.
13 Nochipa xitlachixtokaj, xiitstokaj intemachmej ipan tlen intlaneltokaj, amo ximajmauikaj,* xijpiakaj chikaualistli.*
14 Xijchiuakaj nochi ika tlaiknelili.
15 Nama noikniuaj, nijneki niinmechtlajtlanis se tlamantli. Inmojuantij inkimatij katli itstokej ipan ichaj Estéfanas elkej katli achtoui tlaneltokakej ipan tlali Acaya, uan inijuantij nochipa kintekipanojkej katli Dios kiniyokatlalijtok.
16 Uajka inmojuantij nojkia xikinkauakaj ma inmechyakanakaj maseualmej kej inijuantij, uan nochi katli tlapaleuiaj uan tekitij chikauak.
17 Niyolpaki pampa ualajkej Estéfanas, Fortunato uan Acaico, inijuantij tlauel nechpaleuijtokej maske inmojuantij amo initstokej.
18 Tlauel nechyolchikajtokej uan nojkia inmechyolchikajtokej. Uajka xijnextikaj inkinpatiitaj maseualmej katli kej nopa kichiuaj.
19 Katli itstokej ipan nochi tlanechikoli tlen tlali Asia, inmechontlajpalouaj. Áquila uan Prisca, uan nochi toikniuaj katli monechikouaj ininchaj, inmechontlajpalouaj ika tlaiknelili ipan toTeko.
20 Nochi toikniuaj inmechontlajpalouaj. Ximotlajpalokaj se ika seyok uan ximotsoponikaj kej iniknimej.
21 Na, Pablo, nikijkuiloua ika nomax ni tlajtoli tlen ika niinmechtlajpaloua.
22 Tlaj se akajya amo kiiknelia toTeko, ma eli tlatelchiuali. ¡ToTeko, timitstlajtlaniaj xiuala!
23 ToTeko Jesús ma kinexti ueyi iyolo ika inmojuantij.*
24 Niinmechiknelia nochi inmojuantij katli inelij itokilijkauaj Cristo Jesús.
Tlen ijkuilijtok tlatsintla
^ Kanajya kiijtouaj “toTeotsij”.
^ O “katli tlatsejtseloltikej”.
^ Kanajya kiijtouaj “seseua”.
^ O “xielikaj kej tlakamej”.
^ Kanajya kiijtouaj “tetikayotl”.
^ O “ma inmechmaka tlateochiualistli tlen amo kinamiki tijselisej”.
