Kampa timosentiliaj techmachtiaj tlen toTeotsij iTlanauatijkayo katli Jesús tlamachtiko kema itstoya ipan Tlaltipaktli (Lucas 8:1).

Ipan nopa kali tijueyichiuaj toTeotsij katli melauak. Nopaya techiljuiaj kanke titlajtolmoyauasej (Mateo 24:14). Ni kali amo sanse ininuejuexka uan amo sanse kinchiuaj, yon amo kinchijchiuaj ika tlemach tlamantli. Ipan miak kali amo mosentiliaj san tlen itstokej ipan se tlanechikoli. Ipan xiuitl tlen namanok panotok mochijtok tlauel miak kali (mochiua se makuili kali ipan se tonali) pampa momiakilijtiauij sekinok tlanechikoli. ¿Kenijkatsa tiuelij tijchiuaj ni tekitl? (Mateo 19:26.)

Tijchiuaj ika tomij tlen mosentilijtia uan temakaj ika nochi ininyolo. Nopa tomij tlen mosentilia kititlanij Betel, ni kitekiuiaj kampa kinekij kichiuasej se yankuik kali kampa mosentilisej.

Kichiuaj miakej toikniuaj tlen amo kintlaxtlauiaj. Ipan miak altepemej itstokej Toikniuaj Katli kichiuaj kali kampa timosentiliaj. Inijuantij uan sekinok tlen tlapaleuiaj ika nochi ininyolo, mokauaj ipan se tlanechikoli uan teipa yauij ipan seyok maske tlauel uejka mokaua. Inijuantij kinpaleuiaj toikniuaj kema kichiuaj nopa kali kampa mosentilisej. Ipan sekinok uejueyi altepemej itstokej toikniuaj tlen kiyakanaj nopa tekitl kema kichiuaj o kikualchijchiuaj kali kampa timosentiliaj. Maske toikniuaj tlen kuali kalchiuaj uan sekinok katli momachtijtokej miak kenijki kalchiuasej tlapaleuiaj kema mochiua nopa kali, toikniuaj katli monechikosej nopaya tlauel tekitij. Ni tekitl ueli mochiua pampa Jehová kiteochiua uan pampa toikniuaj tekitij ika nochi ininyolo (Salmo 127:1; Colosenses 3:23).

• ¿Tlake techmachtiaj ipan kali kampa timosentiliaj?

• ¿Kenijkatsa ipan nochi Tlaltipaktli tiuelij tijchiuaj kali kampa timosentiliaj?